އާބަންކޯ މިސްޓަރ މޯލްޑިވްސް 2023: މިސްޓަރ މޯލްޑިވްސް ޔާމީނަށް، ސްޕޯޓްސް ފިޒީކް އަޒްނީނަށް
4 ޖުލައި 2023 | އަންގާރަ 12:53ދެ އެތުލީޓުންވެސް ވަނީ ހަތަރު ފަހަރު އެވޯޑް ހޯދައި، އެންމެ ގިނަ ފަހަރު އެވޯޑް ހޯދި އެތުލީޓުންގެ ރެކޯޑް ހަދާފައި
އަޒްނީން
ބޮޑީ ބިލްޑިންގ އެސޯސިއޭޝަން އޮފް މޯލްޑިވްސްއިން އިންތިޒާމްކޮށްގެން ބޭއްވި 21 ވަނަ ނޭޝަނަލް ބޮޑީ ބިލްޑިންގ އެންޑް ފިޒީކް ސްޕޯޓްސް ޗެމްޕިއަންޝިޕް "އާބަންކޯ މިސްޓަރ މޯލްޑިވްސް 2023"ގައި މިސްޓަރ މޯލްޑިވްސްގެ ޓައިޓްލް މުހައްމަދު ޔާމީން (ޔާންބެ) އަދި ސްޕޯޓްސް ފީޒީކް ކެޓަގަރީން ޗެމްޕިއަންކަން އަޒްނީން ރަޝާދު ހޯދައިފިއެވެ.
ދެ އެތުލީޓުންވެސް ވަނީ ހަތަރު ފަހަރު އެވޯޑް ހޯދައި، އެންމެ ގިނަ ފަހަރު އެވޯޑް ހޯދި އެތުލީޓުންގެ ރެކޯޑް ހަދާފައެވެ. މިއަހަރުގެ މުބާރާތާއެކު ޔާންބެ ވަނީ ވިދިވިދިގެން ތިންވަނަ ފަހަރަށް މިސްޓަރ މޯލްޑިވްސްގެ ޓައިޓަލް ހޯދާފައެވެ. އޭގެ ކުރިން އޭނާ މިސްޓަރ މޯލްޑިވްސްގެ ޓައިޓަލް ހޯދީ 2017 ވަނަ އަހަރުއެވެ. އަޒްނީން ވަނީ ވިދިވިދިގެން ހަތަރު ފަހަރު ސްޕޯޓްސް ފިޒީކް ކެޓަގަރީން ޗެމްޕިއަންކަން ހޯދަފައެވެ.
މިދިޔަ އަހަރު ބޭއްވި ވޯލްޑް ބޮޑީބިލްޑިން ޗެމްޕިއަންޝިޕުގައި މި ދެ އެތުލީޓުންވެސް ވަނީ ރާއްޖެ ތަމްސީލުކޮށް, ފުރިހަމަ ކާމިޔާބެއް ހޯދާފައެވެ. އެގޮތުން، ބޮޑީބިލްޑިން ސުޕަ 90 ކިލޯގެ ކެޓަގަރީން ޔާންބެ ވަނީ ލޯ މެޑަލް ހޯދާފައެވެ. އަދި އަޒްނީން ވަނީ ސްޕޯޓްސް ފިޒީކް އަޕް 170 ސެންޓިމީޓަރުގެ ކެޓަގަރީން ރަން މެޑަލް ހޯދަފައެވެ. އަޒްނީން ވަނީ މިދިޔަ އަހަރު ބޭއްވި އޭޝިއަން ބޮޑީބިލްޑިންގ އެންޑް ފިޒިކް ޗެމްޕިއަންޝިޕްގައިވެސް މި ކެޓަގަރީން ރަން މެޑަލް ހޯދަފައެވެ. މީގެ އިތުރުން މި އަހަރު ބޭއްވި މޯލްޑިވްސް ސްޕޯޓްސް އެވޯޑުގައި "އެތުލީޓް އޮފް ދަ އިއަރ" ގެ އެވޯޑް ލިބުނީވެސް އަޒްނީނަށެވެ.
ސައުތު އޭޝިއަން ބޮޑީ ބިލްޑިންގ ޗެމްޕިއަންޝިޕް ހުކުރު ދުވަހު ރާއްޖޭގައި ފެށުމަށް ވަނީ ހަމަޖެހިފައެވެ. މި މުބާރާތްވެސް ބޭއްވުމަށް ހަމަޖެހިފައިވަނީ ސޯޝަލް ސެންޓަރުގައެވެ.
