ރައްޔިތުންގެ މަޖިލީހުގެ ގުރައިދޫ ދާއިރާގެ ބައި އިލެކްޝަންގައި ވާދަކުރި 3 ކެންޑިޑޭޓުންގެ ފަރާތުން ހުށަހަޅާފައިވާ މާލީ ބަޔާންތަކަކީ ގާނޫނާއި އެއްގޮތްވާ ގޮތުގެ މަތިން ހުށަހަޅާފައިވާ މާލީ ބަޔާންތަކަކަށްނުވާތީ ކެންޑިޑޭޓުންނާއި، ކެންޑިޑޭޓުންގެ އިންތިޚާބީ އޭޖެންޓުން ގެތެރެއިން ކޮންމެ ފަރާތެއް 6000 ރުފިޔާ އިން ޖޫރިމަނާ ކުރުމަށް އިލެކްޝަންސް ކޮމިޝަނު(އީސީ)ން ނިންމައިފިއެވެ.
އެކަމާއި ގުޅިގެން އީސީގެ ނައިބު ރައީސް އިސްމާއީލް ހަބީބު ކުރެއްވި ޓްވީޓެއްގައި ވިދާޅުވީ މިއަހަރުގެ އޭޕްރީލް 15 ވަނަ ދުވަހު ބޭއްވި ގުރައިދޫ ދާއިރާގެ ބައި އިލެކްޝަންގައި ވާދަކުރި ތިން ކެންޑިޑޭޓުންގެ ފަރާތުން ހުށަހަޅާފައިވާ މާލީ ބަޔާންތަކަކީ އިންތިޚާބުތަކާއި ބެހޭ އާންމު ގާނޫނުގެ 73 ވަނަ މާއްދާގެ ހުށަހަޅާފައިވާ މާލީ ބަޔާންތަކެއް ނޫންކަމަށެވެ. އެހެންކަމުން އެ ގާނޫނުގެ 75 ވަނަ މާއްދާގެ ށ ގެ ދަށުން އެ އިންތިޚާބުގައި ވާދަކުރި ތިން ކެންޑިޑޭޓުންނާއި ކެންޑިޑޭޓުންގެ އިންތިޚާބީ އެޖެންޓުން ގެތެރެއިން ކޮންމެ ފަރާތެއް 6000 ރުފިޔާއިން ޖޫރިމަނާކުރުމަށް އީސިން ނިންމާފައިވާކަމަށެވެ. އަދި އެފައިސާ ޖުލައި މަހުގެ 15 ވަނަ ދުވަހުގެ ކުރިން ދެއްކުމަށް ކެންޑިޑޭޓުންނަށް އަންގާފައިވާކަމަށް ހަބީބު ވިދާޅުވިއެވެ.
ހަބީބު އިތުރަށް ވިދާޅުވީ މާލީ ބަޔާނުގައި ގާނޫނު ލާޒިމްކުރާ މިންވަރަށް ފުރިހަމަ ވާންޖެހޭ ކަންކަން ފުރިިހަމަ ނުވާނަމަ، ކުރިޔަށް ހުރި އިންތިޚާބުތަކުގައި ވާދަކުރާ ހުރިހާ ކެންޑިޑޭޓުންނާ މެދު ވެސް މިފަދައިން ޢަމަލުކުރާ ގޮތަށް ކޮމިޝަނުން ނިންމާފައިވާކަމަށެވެ.
އިންތިހާބުތަކާ ބެހޭ އާންމު ގާނޫނުގައިވާ ގޮތުން އިންތިހާބު ބާއްވާ ދުވަހުން ފެށިގެން 21 ދުވަހުގެ ތެރޭގައި ރަޖިސްޓްރީކޮށްފައިވާ އޮޑިޓަރަކު އޮޑިޓްކޮށްފައިވާ ކެނޑިޑޭޓުންގެ މާލީ ބަޔާން ހުށަހަޅަންޖެހެއެވެ. އަދި އެ ބަޔާނުގައި އިންތިހާބުގެ ހަރަދުތަކާއި ފައިސާ ހޯދި ގޮތާއި އެ ދިން ފަރާތްތަކާއި، އެކަމުގެ މުއާމަލާތްތަކާއި ގުޅޭ ތަފްސީލީ މައުލޫމާތުތައް ހިމަނަންޖެހެއެވެ.
ގުރައިދޫ ދާއިރާގެ ބައި އިލެކްޝަން ބޭއްވީ އެދާއިރާގެ މެންބަރު ކަމުގައި ހުންނެވި އިބްރާހިމް ރިޒާ އަވަހާރަވުމާއި ގުޅިގެންނެވެ. ބައި އިލެކްޝަންގައި ވާދަކުރެއްވީ ވެރިކަން ކުރާ މައި ޕާޓީ އެމްޑީޕީގެ ފަރާތުން އިބްރާހިމް ޝާޒާއި، އިދިކޮޅު ޕީޕީއެމް އިން ހުސައިން ރިޒާގެ އިތުރުން އެމްއެންޕީގެ ކެންޑިޑޭޓު އަލީ އާރިފެވެ. އަދި އިންތިހާބު ކާމިޔާބުކޮށް، މެމްބަރުކަމަށް އިންތިހާބުވެވަޑައިގެންނެވީ އެމްޑީޕީގެ ކެނޑިޑޭޓް އިބްރާހިމް ޝާޒުއެވެ.
