ސްވިޑްންގައި މުޞްޙަފް އެންދި މައްސަލާގައި އޯއައިސީގެ ކުއްލި ބައްދަލުވުމެއް ބާއްވައިފި
2 ޖުލައި 2023 | އާދީއްތަ 15:39މި ބައްދަލުވުމުގައި ދިވެހިރާއްޖޭގެ ފަރާތުން ތަޤްރީރުކޮށްފައިވޭ
އޯ.އައި.ސީ.ގެ ބައްދަލުވުމުގައި ރާއްޖެއިން ބައިވެރިވުން
އަޟްޙާ ޢީދު ދުވަހާ ދިމާކޮށް ސްވިޑްންގައި މުޞްޙަފް އެންދުމާ ގުޅިގެން، މިކަން އިތުރަށް ތަކުރާރުވިޔަ ނުދިނުމަށްޓަކައި އެޅިދާނެ ފިޔަވަޅުތަކާ ގުޅޭގޮތުން މަޝްވަރާކުރުމަށްޓަކައި އޯ.އައި.ސީ.ގެ މައި މަރުކަޒުގައި އޯޕަން-އެންޑެޑް ކުއްލި ބައްދަލުވުމެއް ބާއްވައިފިއެވެ.
މި ކުއްލި ބައްދަލުވުމުގައި، ދިވެހިރާއްޖޭގެ ފަރާތުން އޯ.އައި.ސީ.އަށް ކަނޑައަޅާފައި ހުންނަވާ ދާއިމީ މަންދޫބު އަދި ދިވެހިރާއްޖޭގެ ފަރާތުން ސަޢޫދީ ޢަރަބިއްޔާއަށް ކަނޑައަޅާފައި ހުންނަވާ ސަފީރު މުޙައްމަދު ޚަލީލް ބައިވެރިވެވަޑައިގެންނެވިއެވެ.
މި ބައްދަލުވުމުގައި ސްވިޑްންގައި މުޞްޙަފް އެންދި މައްސަލައާ ގުޅޭގޮތުން އެ މަނިކުފާނު ވަނީ ތަޤްރީރު ކުރައްވާފައެވެ.
އެމަނިކުފާނުގެ ތަޤްރީރުގައި އަޟްޙާ ޢީދު ދުވަހާ ދިމާކޮށް ސްވިޑްންގައި މުޞްޙަފް އަންދައި ހިންގައިފައިވާ މި ހަޑިހުތުރު އަމަލު ދިވެހި ސަރުކާރުން ހަރުކަށި އިބާރާތުން ކުށްވެރިކުރައްވާކަން ހާމަކުރެއްވިއެވެ. މީގެ އިތުރުން މިފަދަ އިޙްތިރާމް ކުޑަ ޢަމަލު ތަކުރާރުވުމަކީވެސް މުޅި ދުނިޔޭގެ އެތައް މިލިއަން މުސްލިމުންގެ ދީނީ ޝުޢޫރުތަކަށް އިހާނެތިކަން ލިބޭ ކަމެއް ކަމަށާއި، ހަމައެކަނި ޚިޔާލުފާޅުކުރުމުގެ މިނިވަންކަމުގެ މައްޗަށް ބިނާކޮށް މިފަދަ ޢަމަލުތައް ހިންގުމަށް ހުއްދަ ދިނުމަކީ ބަލައިގަނެވޭނެ ކަމެއް ނޫންކަން ފާހަގަކުރެއްވިއެވެ. އަދި އިސްލާމްދީނާ ދެކޮޅަށް ހިންގާ މިފަދަ ނަފްރަތު އުފެދޭ ޢަމަލުތައް ނިމުމަކަށް ގެނައުމަށްވެސް ދިވެހި ސަރުކާރުން ތަކުރާރުކޮށް ގޮވާލަމުންދާކަން ފާހަގަކުރެއްވިއެވެ.
