މެންޗެސްޓަރ ޔުނައިޓެޑުން ޑެހެއާއަށް ކޮންޓްރެކްޓެއް ހުށަހަޅަން މަސައްކަތް ކުރަނީ

މެންޗެސްޓަރ ޔުނައިޓެޑުން، ޑޭވިޑް ޑެހެއާގެ އެއްބަސްވުމުގައި އުފެދިފައިވާ މައްސަލަ ހައްލުކުރުމުގެ ގޮތުން އޭނާއާ މަޝްވަރާކުރުމަށް ރާވަމުން އަންނަ ކަމަށް ރިޕޯޓްތައް ބުނެފިއެވެ.

އޯލްޑް ޓްރެފޯޑްގައި ޑެހެއާ ހަދާފައިވާ އެއްބަސްވުމުގެ މުއްދަތު ހުކުރު ދުވަހު ވަނީ ރަސްމީކޮށް ހަމަވެފައެވެ. މިކަމުގެ ސަބަބުން ގޯލްކީޕަރު ފްރީ އެޖެންޓަކަށް ވާނެއެވެ. ނަމަވެސް ފުޓުބޯޅަ ޑިރެކްޓަރ ޖޯން މަރޓޯފް ހިމެނޭހެން ކުލަބުގެ އިސްވެރިން ވަނީ ޑެހެއާއާ އަމިއްލައަށް ބައްދަލުކޮށް، އޭނާގެ އެއްބަސްވުމުގެ ހާލަތާ ބެހޭގޮތުން މަޝްވަރާ ކުރަން ޝައުގުވެރިކަން ފާޅުކޮށްފައެވެ.

ހުކުރު ދުވަހު ޔުނައިޓެޑުން ނެރުނު ބަޔާނެއްގައި ވަނީ، ޑޭވިޑް ޑެހެއާގެ އެއްބަސްވުމުގެ މުއްދަތު ހަމަވާން އޮތްނަމަވެސް ގިނަ ދުވަސްތަކެއް ވަންދެން މަސައްކަތްކުރި ކީޕަރާއެކު މަޝްވަރާތައް އަދިވެސް ކުރާކަމަށެވެ.

ކޯޗު އެރިކް ޓެން ހާގް ބުނީ ސްޕެއިންގެ ކީޕަރު މަޑުކުރަން ބޭނުންވާ ކަމަށާއި، ނަމަވެސް ހަފުތާއަކު ގާތްގަނޑަކަށް 375،000 ޕައުންޑުގެ މުސާރަ ކުޑަކުރަން ކުލަބުން ބޭނުންވާ ކަމަށެވެ. ޑެހެއާގެ އެއްބަސްވުން 2024 ވަނަ އަހަރާ ހަމައަށް އެއް އަހަރަށް އިތުރު ކުރުމުގެ ފުރުސަތު ޔުނައިޓެޑަށް އޮތްނަމަވެސް އެ މާއްދާ ޓްރިގަރ ނުކުރަން ޔުނައިޓެޑުން ވަނީ ނިންމާފައެވެ.

މެންޗެސްޓާ ޔުނައިޓެޑުން ވަނީ އިންޓަރ މިލާނުގެ ކީޕަރު، އަންޑްރޭ އޮނާނާ ހޯދުމުގެ މަސައްކަތްވެސް ފަށާފައެވެ. އަޔެކްސްގައި އެކުގައި ހޭދަކުރި ދުވަސްތަކަށްފަހު ޓެން ހާގަށް ކެމަރޫންގެ ކުޅުންތެރިޔާ ރަނގަޅަށް އެނގެއެވެ. މީގެ އިތުރުން އެފްސީ ޕޯޓޯގެ ޑިއޯގޯ ކޮސްޓާއާއި ބްރެންޓްފޯޑްގެ ޑޭވިޑް ރާޔާއަށް ވެސް ޝައުގުވެރިކަން އެބަހުއްޓެވެ.

ޔުނައިޓެޑުން ޓޮމް ހީޓަންގެ އެއްބަސްވުން އިތުރުކޮށްފައިވާއިރު، މިދިޔަ ސީޒަން ނޮޓިންހަމް ފޮރެސްޓްގައި ލޯނު އުސޫލުން ހޭދަކުރުމަށްފަހު ޑީން ހެންޑަސަން ވަނީ އެނބުރި ކުލަބަށް އައިސްފައެވެ.

މިދިޔަ ސީޒަނުގެ ޕްރިމިއަރ ލީގުން ރެލިގޭޝަނުން ސަލާމަތްވުމަށްފަހު ހެންޑަސަން ދާއިމީކޮށް ސޮއިކުރަން ފޮރެސްޓުން ވަނީ ޝައުގުވެރިކަން ފާޅުކޮށްފައެވެ.