ރާއްޖޭގައި އޮންލައިން ވިޔަފާރި ފުޅާވެގެންގޮސް މިއަދު ކޮންމެ އެއްޗެއްވެސް އޮންލައިންކޮށް ލިބެންހުރެއެވެ. އެހެންވެ ގިނަ ބަޔަކު މިހާރު ޚިޔާރުކުރަނީވެސް އޮންލައިން ވިޔަފާރިތަކެވެ. އެއީ ކާކުކަން ނޭނގި ކޮންމެ އެއްޗެއްވެސް ގަނެވިއްކޭތީއެވެ. މިގޮތަށް ވިއްކާ ތަކެތީގެ ތެރޭގައި ރާއްޖެއަށް އެތެރެކުރުން މަނާ ތަކެއްޗާއި ވިއްކުން މަނާ ތަކެތިވެސް ހިމެނެއެވެ.
ރާއްޖޭގެ ގާނޫނު އަސާސީ ބުނާގޮތުން، ޖިންސީ ގުޅުން ހިންގުމަށްޓަކައި ޖިންސީ ގުނަވަން ސިފަކޮށްދޭގޮތަށް ހަދާފައިވާ ތަކެތި ރާއްޖެއަށް އެތެރެކުރުމަކީ މަނާކަމަކެވެ. އަދި ޖިންސީ އެދުންވެރިކަން އިތުރުކުރުމާއި ޖިންސީ ގުނަވަންތަކަށް ތަފާތު ބަދަލުތައް ގެނައުމަށާއި ގުޅުން ހިންގުމުގައި ބޭނުން ކުރެވިދާނެ ފަދަ ބާވަތްތަކުގެ ތެރެއިން، ހަށިގަނޑުގެ އެތެރެއަށާއި ބޭރަށް ޖެހުމަށް ބޭނުންކުރާ ސްޕްރޭ ނުވަތަ އޮއިންޓްމަންޓްފަދަ ތަކެއްޗަކީވެސް މި ގާނޫނުގެ ދަށުން ރާއްޖެއަށް އެތެރެކުރުން މަނާ ތަކެއްޗެވެ. އެހެންނަމަވެސް މިހާރު މިތަކެތި ރާއްޖޭގައި އަންނަނީ ފުޅާ ދާއިރާއެއްގައި ވިއްކަމުންނެވެ. އެ ތަކެތި ވިއްކަން ޚާއްސަ ޕޭޖުތައްވެސް އިންސްޓަގްރާމާއި ފޭސްބުކްގައި ހުރެއެވެ.
މިގޮތަށް ޕޭޖުތައް ހަދައިގެން ތަކެތި ވިއްކަނީ ކާކުކަން ނޭނގޭ ގޮތަށް ވިޔަފާރި ކުރެވޭތީއެވެ. އެގޮތަށް ވިޔަފާރިކުރާ ޕޭޖުތަކުގެ ފޮލޯވަރުންވެސް މަދެއްނޫނެވެ. އެހެންކަމުން އެ ޕޭޖުތަކުން ގާނޫނާ ޚިލާފަށް ވިއްކާ ތަކެތި ގަންނަ މީހުންވެސް މަދު ނޫންކަން އެނގެއެވެ. ގިނައިން ތިބެނީ "ފޭކް" އެކައުންޓުތަކެވެ. އެއީ ގަންނަ މީހާވެސް އޭނާއަކީ ކާކުކަން އަންގަން ބޭނުން ނުވާތީ، އެކަމަށް ޚާއްސަކޮށްގެން ހަދާފައިވާ އެކައުންޓުތަކެއްކަމަށް ބެލެވެއެވެ.
ޖިންސީ ގުޅުން ހިންގުމަށް ބޭނުންކުރާ ތަކެތީގެ އިތުރުން، ގޮތް ނޭނގޭ ބޭހާއި ތަފާތު ސަޕްލިމެންޓުވެސް އެއީ ސިއްހީ ގޮތުން ރައްކާތެރި ތަކެތިކަމަށް ބުނެ، އޮންލައިން ޕޭޖުތަކުގައި ވިއްކައެވެ. މިގޮތަށް ވިއްކާ ބައެއް ތަކެތި ފާހަގަކުރެވި، އެއީ ސިއްހަތަށް ނުރައްކާތެރި ތަކެތިކަމަށް ބުނެ ހެލްތު ޕްރޮޓެކްޝަން އެޖެންސީން ދޭތެރެދޭތެރެއިން ބަޔާންތައްވެސް ނެރެއެވެ. ނަމަވެސް އެތަކެތި ވިއްކުމަކަށް ހުއްޓުމެއްނާދެއެވެ.
މިފަދަ ޕޭޖުތައް ރާއްޖޭގައި ދުވަހަކަށް ފަހު ދުވަހެއް އިތުރުވަމުން އަންނައިރު އުފެދޭ ސުވާލަކީ، އެ ތަކެއްޗަކީ ރާއްޖެއަށް އެތެރެކުރުންވެސް މަނާކަމަށް ގާނޫނުގައި ކަނޑައަޅާފައިވާ ތަކެއްޗަށް ވާއިރު، ރާއްޖެއަށް އެތެރެ ކުރެވެނީ ކިހިނެއްބާވައެވެ. އެފަދަ ތަކެތި ރާއްޖޭގައި ފާޅުކަން ބޮޑު ގޮތެއްގައި ވިއްކަމުން އަންނައިރު އެކަން ހުއްޓުވުމަށް ފިޔަވަޅުތައް ނޭޅެނީބާވައެވެ.
ރާއްޖޭގައި އޮންލައިން ވިޔަފާރިތަކުން ބޭނުން އެއްޗެއް ބޭނުން އަގުތަކެއްގައި ވިއްކަމުން އަންނަނީ އެ ވިޔަފާރިތައް ރެގިއުލޭޓް ނުކުރެވޭތީއެވެ. ނަމަވެސް ފާޅުގައި ގާނޫނާ ޚިލާފު ކަންކަން ކުރަމުން އަންނައިރު، އެފަދަ ކަންކަން ރެގިއުލޭޓްކުރެވޭނެ އިންތިޒާމުތައް ހަމަޖައްސައި އެކަންކަން ހުއްޓުވަން އެބަޖެހެއެވެ.
ރާއްޖެއަށް އެތެރެވުން ހުއްޓުވަންވީ ހަމައެކަނި މަސްތުވާތަކެއްޗެއް ނޫނެވެ. ގާނޫގައި ވަކި ހުއްދައެއްނެތި ރާއްޖެއަށް އެތެރެކުރުން މަނާކަމަށް ބުނާ ހުރިހާ އެއްޗެއްވެސް އެތެރެކުރުން ހުއްޓުވަން ސަމާލުކަން ދޭންޖެހެއެވެ. އަދި އެތަކެތި އެތެރެކުރާ ފަރާތްތައް ހޯދައި، އެ މީހުންނާމެދު ގާނޫނީ ފިޔަވަޅުވެސް އަޅަން ޖެހެއެވެ.
