ކާރުތަކަށް ތެޔޮ އަޅާ ދެމުން، ވިންޑްޝީލްޑްތައް ފޮހެ ސާފުކޮށްދިނުމުގެ މަސައްކަތުގައި އަވަދި ނެތި އުޅެމުން ދިޔަ ފަލަސްޠީނުގެ ޒުވާން ރެފިއުޖީ، މުޙައްމަދު އަލް-ގަޒާވީ، އޭނާއަށް ލިބޭ ކޮންމެ ހުސް ވަޤުތެއްގެ ބޭނުން ހިފަނީ ފަހަރެއްގައިވެސް ހިންދެމިލުމަށް ނުވަތަ ސަކަރާތް ޖަހާ މަޖާ ކުރުމަކަށް ނޫނެވެ. ހުސްކޮށް ލިބެނީ ކިތަންމެ ކުޑަ ހިނދުކޮޅެއް ކަމުގައި ވީ ނަމަވެސް، އޭނާ ވަޤުތުކޮޅުގެ ބޭނުން ހިފަނީ އޮންލައިން ކޯސްތައް ފުރިހަމަ ކުރުމަށެވެ. ހުރިހާވެސް ޢުއްމީދެއް ގުޅިފައި އޮތީ މަރކެޓިންގް ރޮނގުން އޭނާ ފުރިހަމަ ކުރަމުންދާ ބެޗެލަރޒް ޑިގްރީގެ ސަނަދު ހާސިލު ކުރުމާއެވެ.

ގަޒާވީއަކީ ޠަލާލު އަބޫ ޣަޒާލީ ޑިޖިޓަލް ޔުނިވަރސިޓީ (ޠަޣްޑޫ) އިން އޮންލައިންކޮށް ހިންގާ ޑިގްރީ ޕްރޮގްރާމްތަކުގައި ބައިވެރިވެގެން އުޅޭ އެތައް ދަރިވަރުންނެއްގެ ތެރޭގައި ހިމެނޭ ޒުވާނެކެވެ. 2 ދަރިންގެ ބައްޕައެކެވެ.

އުރުދުންގެ ވެރިރަށް އައްމާންގައި ދިރިއުޅެމުންދާ 33 އަހަރުގެ ގަޒާވީގެ ޢުއްމީދަކީ ލިބިފައި އޮތް ސްކޮލަރޝިޕްގެ ސަބަބުން އޭނާއާއި، އޭނާ ފަދަ، ފަލަސްޠީނުގެ އެހެން ރެފިއުޖީންނަށް އެހީތެރިކަމެއް ލިބުމެވެ. ހުވަފެންތައް ޙަޤީޤަތަކަށް ހެދުމަށް އެންމެ ފިޔަވަޅެއް ނަމަވެސް ކުރިއަށް ޖެހިލުމަށް އެހީއަކަށް ވުމެވެ.

2018 ވަނަ އަހަރު އުފެއްދި ޠަލާލު އަބޫ ޣަޒާލީ ޑިޖިޓަލް ޔުނިވަރސިޓީ (ޠަޣްޑޫ) އަކީ ފަލަސްޠީނުގެ ވިޔަފާރިވެރިޔާ ޠަލާލް އަބޫ ޣަޒާލީގެ ތަނެކެވެ. މަޤްޞަދަކީ، ދަތުރުފަތުރު ކުރުމަށް ހުރި ހުރަސްތަކާއި އިޤްތިޞާދީ ތަކުލީފުތަކާ ކުރިމަތިލާން ޖެހިފައި ވާ ރެފިއުޖީންނަށް ޢުއްމީދުގެ އަލިކަން ގެނެސްދިނުމެވެ.

ދަރިވަރުން އެއްވެސް ޚަރަދެއް ކުރަން ނުޖެހޭ ގޮތަށް، ފުޅާ ދާއިރާއެއްގައި މާސްޓަރޒް ޕްރޮގްރާމްތައްވެސް މި ޔުނިވަރސިޓީގައި ހިންގައެވެ. މެދުއިރުމަތީގެ އެކި ހިސާބުތަކުގައި ދިރިއުޅެމުންދާ ފަލަސްޠީނުގެ ރެފިއުޖީންނަށް ފަސޭހަ ކަމާއިއެކު މަތީ ތަޢުލީމު ހާސިލު ކުރެވޭނެ މަގު ތަނަވަސް ވާނެ ގޮތަށެވެ.

ޢުމުރުން 85 އަހަރުގެ އަބޫ ޣަޒާލީއަކީވެސް ރެފިއުޖީއެކެވެ. ފަލަސްޠީނު ރެފިއުޖީންގެ ޖީލެއް އުޖާލާ މުސްތަޤުބަލެއްގެ ކުރިމަގަށް ގެންގޮސްދެވުމަކީ އޭނާ ކުރަމުންދާ ފޮނި ޢުއްމީދެކެވެ.

ހުޅަނގު އައްސޭރި، ޤުދުސް، ޣައްޒާ އަދި އުރުދުންގައި ތިބި ފަލަސްޠީނުގެ ރެފިއުޖީންގެ ތެރެއިން މިހާރުވެސް 250 އަށް ވުރެ ރެފިއުޖީން ވަނީ ޠަލާލު އަބޫ ޣަޒާލީ ޑިޖިޓަލް ޔުނިވަރސިޓީ (ޠަޣްޑޫ)ގެ ޕްރޮގްރާމްތަކުގައި ދަފުތަރު ކޮށްފައެވެ. ޠަޣްޑޫއިން ހިންގާ ޕްރޮގްރާމްތަކުގެ ތެރޭގައި އަރޓިފިޝަލް އިންޓެލިޖެންސް، ސަޕްލައި ޗެއިން މެނޭޖުމަންޓް، ޑިޖިޓަލް މަރކެޓިންގް، ފިކުރީ މުދާ އަދި އައިޓީސީގެ ދާއިރާގެ ކޯސްތައް ހިމެނެއެވެ.

އަމިއްލަ ވަޒަން ކަމުގައި ވީ ނަމަވެސް، ރެފިއުޖީއެއްގެ ގޮތުގައި ޣައްޒާގައި ދިރިއުޅެމުން ޠަޣްޑޫގެ ދަރިވަރެއް ކަމަށް ވާ މުޙައްމަދު ޖޫދީ ބުނި ގޮތުގައި، ޑިޖިޓަލް ޔުނިވަރސިޓީއިން ހިންގާ ކޯސްތަކުގައި ކިޔަވާދޭ އެއްޗެއްސަކީ، އަންނަން އޮތް އަހަރުތަކުގައި ވަޒީފާގެ ބާޒާރުތަކުން އެ ހުނަރުތަކަކާއި މަޢުލުމާތަށް ޑިމާންޑް ކުރާނެ އެއްޗެއްސެވެ.

އިންސާނަކަށް ވީތީ ލިބިދޭންޖެހޭ އަސާސީ ޙައްޤުތަކުން މަޚްރޫމުވެފައި ވާ ޙާލު، ފިތިބާރުވެ ތޮއްޖެހިފައި ވާ ރެފިއުޖީ ކޭމްޕުތަކުގައި ފަލަސްޠީނުގެ ގިނަ ޢަދަދެއްގެ ރައްޔިތުން ދިރިއުޅެމުންދާތާ މިހާރު އެތައް އަހަރެއް ވަނީ ފާއިތުވެފައެވެ. ކޭމްޕުތަކުގެ ހާލަތު އިންތިހާއަށް ގޯހެވެ. މިއީ ވަޤުތީ ބޯހިޔާވަހިކަން ހަމަޖައްސާ ދިނުމުގެ މަޤުޞަދުގައި ހުޅުވި ކޭމްޕުތަކެއް ކަމުގައި ވީ ނަމަވެސް، މިހާރު އެއީ އެތައް ބައެއްގެ ދާއިމީ ހިޔާވައްސެވެ. ރެފިއުޖީންގެ އެތައް ޖީލެއް އުފަންވީ މި ކޭމްޕުތަކަށެވެ. ފަލަސްޠީނުގެ ރެފިއުޖީންގެ މައްސަލައަކީ، މުޅި ދުނިޔޭގެ ނިސްބަތުން ބަލާއިރުވެސް، ހައްލެއް ނުހޯދި، އެންމެ ގިނަ ދުވަހަށް ދިގުލާ ގޮސްފައި ވާ ރެފިއުޖީ ކާރިޘާއެވެ.