މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ މެންބަރުންނަށް، ވަކި ފަރުދަކަށްވުރެ އެ ޕާޓީ އާއި ޤައުމު މުހިންމުވުމަކީ ލިބުނު ވަރަށް ބޮޑު ކާމިޔާބީއެއް ކަމަށް އެ ޕާޓީގެ ޗެއަރޕާސަން ފައްޔާޒު އިސްމާއީލް ވިދާޅުވެއްޖެއެވެ.

ފައްޔާޒު މިފަދައިން ވިދާޅުވީ އެމްޑީޕީއަށް 18 އަހަރު ފުރުމާ ގުޅިގެން އާދީއްތަ ދުވަހުގެ ރޭ ދެއްވި ހާއްސަ ބަސްދީގަތުމެއްގައެވެ. އެ ބަސްދީގަތުމުގައި ފައްޔާޒު ވަނީ އެމްޑީޕީ އުފެދިގެން އައި ގޮތުގެ މައްޗަށް އަލިއަޅުއްވާލައްވައި، ޕާޓީއަށް މިހާތަނަށް ޚިދުމަތް ކުރެއްވި ބޭފުޅުންނަށާއި ޕާޓީގެ މެންބަރުންނަށް އަހަރީ ދުވަހުގެ ތަހުނިޔާ ވިދާޅުވެފައެވެ.

ފައްޔާޒު ވިދާޅުވީ އެމްޑީޕީ އުފެދުނުތާ މާގިނަ ދުވަހެއް ނުވަނީސް 2008 ވަނަ އަހަރު ވެރިކަމާ ހަވާލުވިނަމަވެސް އޭގެ ތިން އަހަރުފަހުން އަނެއްކާވެސް ޕާޓީ މަގުމަތިވެ، އެ ޕާޓިން ހޯދި ކާމިޔާބީގައި މުސްތަގުބަލަށް ކުރި އުއްމީދާއެކު ހަމަޖެހިލާނެ ފުރުސަތު ނުލިބި ހަތް އަހަރު ދުވަސް ވަންދެން މަގުމަތީގައި ގަނަތެޅެން ޖެހުނު ކަމަށެވެ. ނަމަވެސް އަނެއްކާވެސް 2018 ވަނަ އަހަރު އެމްޑީޕީން ރާއްޖެ ސަލާމަތުގެ އައްސޭރިއަށް ގެންދިޔަކަން އޭނާ ފާހަގަކުރެއްވިއެވެ.

އޭނާ ވިދާޅުވީ 2018 ވަނަ އަހަރު އެމްޑީޕީން ވެރިކަމާ ހަވާލުވުމުން ރައްޔިތުންނަށް ހަމަނޭވާ ލެވުނު ކަމަށާއި އެތައް އަހަރަކުުން ދިގުލައިގެން ދިޔަ އެތައް ތަކުލީފެއްގެ ހައްލު މިއަދު ރައްޔިތުންނަށް ލިބިފައިވާ ކަމަށެވެ. އަދި އަސާސީ ޚިދުމަތްތަކާއި އިގްތިސާދީ ފުރުސަތުތަކާއި ސިއްހަތާއި ތައުލީމާއި ބޯހިޔާވަހިކަން މި ވެރިކަމުގައި ހަގީގަތަކަށްވަމުންދާކަން ވެސް ފާހަގަކުރެއްވިއެވެ.

އެމްޑީޕީގެ ވެރިކަމުގައި ރާއްޖެއަށް ލިބުނު ކާމިޔާބީތައް ފާހަގަކުރައްވައި ފައްޔާޒު ވިދާޅުވީ އެ ކާމިޔާބީއަށް ވާސިލުވެފައި ވަނީ ފަސޭހަ ދަތުރަކުން ނޫން ކަމަށެވެ. އެގޮތުން، އެތެރޭގެ ގޮންޖެހުންތަކުން ކުރިމަތިވި ތަކުލީފުތަކަކީ ސިޔާސީ ޕާޓީއަކުން ތަހައްމަލު ކުރާނެ އެންމެ އުނދަގޫ މަރުހަލާ ކަމަށާއި ކެތްތެރިކަމާއެކު ޕާޓީގެ މަސަލަހަތު ހިފެހެއްޓި، ޑިމޮކްރަސީގެ ހަމަތަކަށް އެންމެ ކުރިއަށް ނެރެގެން ހިތި ހަގީގަތްތަކާއެކު ލިބުނީ ތަޖުރިބާއެއް ކަން ފާހަގަކުރެއްވިއެވެ. އަދި އެ ތަޖުރިބާއިން ލިބުނު ފިލާވަޅަކީ ކުރިއަށްއޮތްތަނުގައި ކާމިޔާބީއަށް ހުޅުވާލެވުނު ދޮރެއް ކަމަށް ވެސް ފައްޔާޒު ވިދާޅުވިއެވެ.

މިއީ އެމްޑީޕީ ޅަފަތުން އަރައިގަތް ދުވަސްކަން ފާހަގަކުރައްވައި ފައްޔާޒު ވިދާޅުވީ މިއަދު އެ ޕާޓީގެ މެންބަރުން ކުރަން އޮތް ކަމަކީ އެކުގައި ނުކުމެ ޕާޓީއަށް ރިޔާސީ ދެވަނަ ދައުރު ކާމިޔާބު ކުރުން ކަމަށެވެ. ފާއިތުވި ފަސް އަހަރު ހޯދުނު ކާމިޔާބީ ޒަމާންތަކަށް ދެމެހެއްޓޭނީ އެގޮތުމުގެ މަތިންކަން އޭނާ ފާހަގަކުރެއްވިއެވެ.

މީގެ އިތުރުން 9 ސެޕްޓެމްބަރު 2023 ވެގެންދާނީ އަމިއްލަ ރަށުގައި އާއިލާއާއެކު ރަނގަޅު އާމްދަނީ ލިބޭނެ މަގަށް ހުޅުވޭ ބޮޑު ދޮރާށިން ވަދެވޭނެ ދުވަސް ކަމަށާއި އެއީ ރާއްޖޭގެ ހުރިހާ ރަށަކަށް ފަހިވާން އޮތް އުފާވެރި ދިރިއުޅުމުގައި ހެޔޮފާހަގަ ޖަހާ ދުވަސް ކަމަށް ވެސް ފައްޔާޒު ވިދާޅުވިއެވެ.

ފައްޔާޒު ވިދާޅުވީ ނިމިގޮސް ގެއްލެމުންދާ އަނިޔާވެރި އަދި ލާއިންސާނީ މާޒީ އިޔާދަ ކުރުމަށް ހިމަ ނާރެއްހާ ޖާގަ ވެސް ދެން އެމްޑީޕީން ނުދޭނެ ކަމަށެވެ.