އިންޑިޔާ މީހުން އެންމެ ގިނައިން ދަތުރުކުރާ ގައުމަކީ އެމެރިކާ

އިންޑިޔާ ރައްޔިތުން އެންމެ ގިނައިން ދަތުރުކުރާ ގައުމަކީ އެމެރިކާ ކަމަށް ވުމާއެކު، އިންޑިޔާގެ ދެ ސަރަހައްދެއްގައި ދެ ކޮންސިޔުލޭޓް ގާއިމުކުރުމުގެ މަސައްކަތް އެމެރިކާއިން ފަށައިފިއެވެ.

އިންޑިޔާގެ ބޮޑުވަޒީރު ނަރެންދްރަ މޯދީ މިހާރު އެމެރިކާއަށް ކުރައްވަމުން ގެންދަވާ ދަތުރުފުޅުގައި ދެ ގައުމުގެ ގުޅުން ވަނީ އައު އުސްމިންތަކަކަށް މިސްރާބު ޖަހާފައެވެ. މޯދީ ގެންދަވަނީ އެމެރިކާގެ ގިނަ އިންވެސްޓަރުންތަކެއް އިންޑިޔާގައި އިންވެސްޓްކުރުމަށް ބާރު އަޅުއްވަމުންނެވެ. އަދި އެމެރިކާއިން އަންނަނީ ގިނައިން ވިސާ ދޫކުރުމަށް ބާރުއަޅަމުންނެވެ.

ފާއިތުވި 2022 ވަނަ އަހަރު ފުރަތަމަ ފަހަރަށް ދެކުނު އޭޝިޔާ ގައުމުތަކުން އެންމެ ގިނަ ފަތުރުވެރިން އެމެރިކާއަށް ދިޔަ ގައުމަކަށް އިންޑިޔާ ވަނީ ވެފައެވެ. ޓޫރިޒަމް ކޮންޒަލްޓެންސީ އައިޕީކޭ އިންޓަރނޭޝަނަލްއިން ބުނާގޮތުގައި، 2022 ވަނަ އަހަރު އިންޑިޔާއިން އެމެރިކާއަށް ދިޔަ ފަތުރުވެރިންގެ އަދަދު ވަނީ، ޗައިނާއާއި ދެކުނު ކޮރެއާ އަދި ޖަޕާނުން އެމެރިކާއަށް ދިޔަ ފަތުރުވެރިންގެ އަދަދަށްވުރެ ގިނަވެފައެވެ.

އެމެރިކާގެ ޓްރެވަލް އެސޯސިއޭޝަންގެ ސީއީއޯ ޖިއޮފް ފްރީމެން ވިދާޅުވާގޮތުގައި، ދުރު މުސްތަގުބަލަށް ވިސްނާއިރު އިންޑިޔާ ކަހަލަ އައު މާކެޓެއް ވެގެންދާނީ އެމެރިކާއަށް ފައިދާކުރަނިވި މާކެޓަކަށެވެ.

އެމެރިކާގެ ރައީސް ޖޯ ބައިޑަންއާއި އިންޑިޔާގެ ބޮޑުވަޒީރު ނަރެންދްރަ މޯދީ ނެރުއްވި، ގުޅިފައިވާ ބަޔާނުގައި ވަނީ، އިންޑިޔާގެ ދެ ސިޓީއެއްކަމުގައިވާ ބެންގަލޫރުގަޔާއި އަހުމަދުއާބާދުގައި ކޮންސިޔުލޭޓް ހުޅުވާނެކަމަށް ވިދާޅުވެފައެވެ.

ބަޔާނުގައިވާ ގޮތުން ވިޔަފާރި ދަތުރުތަކާއި، ފަތުރުވެރިކަމުގެ ގޮތުންނާއި އެނޫންވެސް ބޭނުންތަކުގައި ދަތުރުކުރެވޭނެ އިތުރު ގޮތްތައް ހޯދުމަށް އޮފިޝަލުންނަށް ލަފާދެއްވާފައިވެއެވެ.

މިއަހަރުގެ ފުރަތަމަ ފަސް މަސްދުވަހު އިންޑިޔާ ރައްޔިތުން އެމެރިކާއަށް ދަތުރުކުރި މިންވަރު ވަނީ ކޮވިޑް-19 ޕެންޑަމިކްގެ ކުރިން ދަތުރުކުރި މިންވަރަށްވުރެ އިތުރުވެފައިކަން، އެމެރިކާގެ ޑިޕާޓްމަންޓް އޮފް ކޮމަރސް ނޭޝަނަލް ޓްރެވަލް އެންޑް ޓުއަރިޒަމް އޮފީހުންގެ ޑާޓާތަކުން ހާމަވެއެވެ. ޕެންޑަމިކަށްފަހުވެސް ޗައިނާ ގެ ފަތުރުވެރިން އެމެރިކާއަށް ދަތުރުކުރުން ވަނީ މަޑުޖެހިފައެވެ.

މިދިޔަ އަހަރު އެންމެ ގިނަ އިންޑިޔާ ރައްޔިތުން ދަތުރުކުރި ގައުމުތަކުގެ ލިސްޓުގައި ތިންވަނާގައި އޮތީ އެމެރިކާއެވެ. 2019 ވަނަ އަހަރު އެމެރިކާ އޮތީ އަށްވަނާގައެވެ.

އިންޑިޔާގެ ރައްޔިތުން އެމެރިކާއަށް ދަތުރުކުރާ މިންވަރު އިތުރުވެފައިވާ އެއް ސަބަބެއްކަމަށް، އިންޑިއަން އެސޯސިއޭޝަން އޮފް ޓުއަރ އޮޕަރޭޓަރސްގެ ރައީސް ސާޖިވް މެހެރާ ވިދާޅުވަނީ ދިރިއުޅުން އެމެރިކާއަށް ބަދަލުކުރާ މިންވަރު އިތުރުވެގެންދިޔުމެވެ. އެކަމުގެ ސަބަބުން އެމީހުންގެ މައިންބަފައިންނާއި އާއިލާތަކަށް އެމެރިކާއަށް ދަތުރުކުރަންޖެހޭ މިންވަރު އިތުރުވަނީކަމަށް ސާޖިވް ވިދާޅުވިއެވެ.