ޓައިވާންގައި ކިންދަގާޑްންއަށް ދާ އުމުރުގެ ތުއްތު ކުދިންނަށް ޓީޗަރުން ޑްރަގް ދޭކަމުގެ ޝަކުވާތަކެއް ފެންމަތިވެއްޖެއެވެ. މިގޮތުން ނިއު ޓައިޕޭ ސިޓީގެ ބައެއް ޕްރީސްކޫލްތަކުގެ ޓީޗަރުން (މިހާރު ބައެއް ގައުމުތަކުގައި މަނާކޮށްފައިވާ ކޯފް ސިރަޕްތައްވެސް ހިމެނޭގޮތުން) ކުދިންނަށް ބޭސް ދޭކަން ހާމަވެފައިވަނީ، ގެއަށް ދިއުމަށްފަހު ކުދިންގެ ކިބައިން ފެންނަމުންދާ އަލާމާތްތަކުންނެވެ. އޭގެ ތެރޭގައި "ވިތުޑްރޯވަލް ސިމްޕްޓަމްސް" ކިޔާ ސިފަތައް ފެންނަމުންދާކަމަށް ވެއެވެ. އެއީ ޑްރަގް ބޭނުންކުރާ މީހުން އެކަން ހުއްޓާލައިގެން ހުންނަ ވަގުތު އެމީހުންގެ ކިބައިން ފެންނަ ސިފަތަކެވެ.

އެގައުމުގައި ފާހަގަކުރާ ލޫނާ ހޮލިޑޭގައި ކުދިން ގޭގައި ތިބި ދުވަސްތަކުގައި ކުދިންގެ ކިބައިން ފެންނަންފެށި ކަންކަމުގެ ތެރޭގައި؛ އަވަސް އަވަހަށް ރުޅި އައުމާއި، ހިމޭނުން ނުތިބެވުމާއި، އަކުނިވަޔަށް ދެމުމާއި އަދި ނިދީގައި ހަޅޭއްލެވުން ފަދަ ކަންކަން ހިމެނެއެވެ. މިކަމާގުޅިގެން ކުދިންނާ ވާހަކަދެއްކުމުން އެނގިފައިވަނީ ސްކޫލުން "ކޮންމެވެސް ބޭހެއް" ކުދިންނަށް ދެމުންދާކަމެވެ.

މިމައްސަލާގައި އެޕްރިލް އަދި މޭމަހު ބެލެނިވެރިން އިދާރާތަކަށް ޝަކުވާކުރުމާ ގުޅިގެން ސަރުކާރުން ތަހުގީގެއް ފަށާފައި ވީނަމަވެސް، އެކަމާބެހޭ ތަފްސީލް ސަރުކާރުން ހާމަކުރަމުން ނުދާކަމަށް ބުނެ ބުދަ ދުވަހުވެސް ވަނީ ބެލެނިވެރިން މަގުމައްޗަށް ނިކުމެ އިހުތިޖާޖް ކޮށްފައެވެ. ކުދިންނަށް ދޭކަން މިހާރު އެނގިފައިވާ ބޭސްތަކުގެ ތެރޭގައި، އެ ބޭހަށް އެޑިކްޓްވާ ސެޑޭޓިވްތަކާއި ނުރައްކާތެރި މާއްދާތައް ހުރެގެން ގިނަ ގައުމުތަކެއްގައި މިހާރު މަނާކޮށްފައިވާ ކޯފް ސިރަޕް ހިމެނޭކަމަށް ޚަބަރުތައް ބުނެއެވެ. މީގެ ބައެއް ބޭސްތަކުގައި ފެނޮބާބިޓަލްއާއި "ބެންޒޯސް" ފަދަ، ވަކި ޚާއްސަ ގޮތަކަށް، އަދި ވަކި އުމުރުފުރާއަކަށް ނޫނީ ނުދެވޭ މާއްދާތައް އެކުލެވޭ ބޭސްތައް ހިމެނެއެވެ.

މިކަމާ ގުޅިގެން ލޯކަލް އިދާރާތަކުން ކުރި ތަހުގީގުތަކަށްފަހު ހަތަރު ޑޮކްޓަރުން ކުށްވެރިވާކަން ސާބިތުވެ، އެމީހުންގެ ލައިސަންސްވަނީ ހިފަހައްޓާފައެވެ. އަދި 1.4 މިލިއަން ޓައިވާން ޑޮލަރުން (46،121 އެމެރިކާ ޑޮލަރުން) ވަނީ ޖޫރިމަނާކޮށްފައެވެ. ފެނަބާބިޓަލްއަކީ އާންމުގޮތެއްގައި އެޕިލެޕްސީ (ވެއްޓޭ ބަލި) ފަދަ ބަލިތަކަށް ފަރުވާކުރުމަށާއި އަދި ސަރޖިކަލް އެނެސްތޭޝިޔާއަށް ބޭނުންކުރާ ބޭހެކެވެ. އަދި ބެންޒޯސްއަކީ ޑިޕްރެސްވާ މީހުންނަށް ދޭ ޑްރަގަކަށްވާއިރު، މިބޭސް އާންމުކޮން ދެނީ "އެންޒަޔަޓީ" ހުންނަ މީހުންނަށާއި ނިދުމުގައި ދަތިތައް ކުރިމަތިވާ މީހުންނަށެވެ.

މިކަމުގައި ކުރެވުނު ތަހުގީގުގެ ތެރެއިން ބައެއް ޓީޗަރުން ކުށަށް އިއުތިރާފްވެފައި ވީނަމަވެސް، ފަހުން ބުނެފައިވަނީ ކުދިންނަށް ބޭސްދެނީ ބެލެނިވެރިންގެ ރުހުމުގައި ކަމުގައެވެ. ނަމަވެސް ބެލެނިވެރިން ބުނެފައިވަނީ ބާބިޗުރޭޓްސް އެކުލެވޭ ބޭސްތައް ކުދިންނަށް ދޭން އެއްބަސްވެފައި ނުވާނެކަމަށެވެ.

މިކަމާގުޅިގެން ޓައިވާނުގެ ޕްރީސްކޫލްތަކުގެ ޓީޗަރުންނާއި ސްޓާފުންނަށް ވަނީ އާންމުންގެ ނަފްރަތު އަމާޒުވެފައެވެ. އަދި ޓައިޕޭ ސިޓީ ހޮސްޕިޓަލުންވަނީ، ލޭގައި ސެޑެޓިވްސް އެކުލެވޭތޯ ބެލުމަށް ޕްރީސްކޫލް ކުދިންނަށް ހިލޭ ބްލަޑް ޓެސްޓްތައް ހެދޭނެ އިންތިޒާމް ހަމަޖައްސައިދީފައެވެ.

މައުލޫމާތު: ވިއޯން ނިއުސް