ސްޕެޝަލް އޮލިމްޕިކްސް ވޯލްޑް ގޭމްސްގައި ރާއްޖޭގެ ސުޖޫދް، ޒާނާ އަދި ލައިކާ ފައިނަލަށް

ޖަރުމަނުގެ ބަރލިންގައި ކުރިޔަށްދާ ސްޕެޝަލް އޮލިމްޕިކްސް ވޯލްޑް ގޭމްސްގައި ރާއްޖޭގެ ސުޖޫދް، ޒާނާ އަދި ލައިކާ ފައިނަލުން ޖާގަ ހޯދައިފިއެވެ.

މި މަހުގެ 17 ވަނަ ދުވަހުން ފެށިގެން 25 ވަނަ ދުވަހުގެ ނިޔަލަށް ކުރިޔަށްދާ ގޭމްސްގައި ރާއްޖެ ތަމްސީލުކުރާނީ ޖުމުލަ ހަ އެތުލީޓުންނެވެ. ރާއްޖެއިން ވާދަކުރަނީ އެތުލެޓިކްސްއާއި ބެޑްމިންޓަންގައެވެ.

ރާއްޖޭގެ ހުސައިން ސުޖޫދް ނާޝިދު ވަނީ ސްޓޭންޑިން ލޯންގް ޖަމްޕް އިވެންޓުގެ ފައިނަލުން ޖާގަ ހޯދާފައެވެ. އާއިޝަތު ލައިކާ ހުސައިންއާއި ޒާނާ އަލީ ޝަރީފް ވަނީ 200 މީޓަރު ދުވުމުން ފައިނަލަށް ދަތުރުކޮށްފައެވެ. ލައިކާ ރޭސް ނިންމާފައިވަނީ 49.60 ސިކުންތުންނެވެ. އަދި ޒާނާ ނިންމީ 1 މިނެޓާ 20 ސިކުންތުންނެވެ.

މިއަހަރުގެ މުބާރާތުގައި 190 ގައުމަކުން 7000ށްވުރެ ގިނަ އެތުލީޓުން ވަނީ ބައިވެރިވެފައެވެ.