ރޮނަލްޑޯގެ 199 ވަނަ މެޗުން ޕޯޗުގަލް މޮޅު، ވިދާލީ ބުރޫނޯ ފެނާންޑޭޒް

ޤައުމީ ޓީމަށް ރޮނަލްޑޯ ކުޅުނު 199 ވަނަ މެޗުން ޕޯޗްގަލް މޮޅުވެއްޖެއެވެ.

ޔޫރޯ ކޮލިފައިންގައި ބޮސްނިޔާ އަތުން ޕޯޗްގަލް މޮޅުވީ 3-0 ނެވެ. މެޗުގައި ވިދާލީ މެންޗެސްޓަރ ޔުނައިޓެޑްގެ މިޑްފީލްޑަރ ބުރޫނޯ ފެނާންޑޭޒްއެވެ. މެޗުގައި ޕޯޗްގަލްގެ ފުރަތަމަ ލަނޑު ބާނާޑޯ ސިލްވާ ޖެހީ ބުރޫނޯ ފެނާންޑޭޒް ތަނަވަސްކޮށްދިން ފުރުޞަތަކުންނެވެ. އެއީ ފުރަތަމަ ހާފްގެ ފަހު މިނެޓުގައެވެ. އަދި ދެވަނަ ހާފްގައި ދެވަނަ ލަނޑާއި, ތިންވަނަ ލަނޑު ޖެހީ ބުރޫނޯ ފެނާންޑޭޒްއެވެ. ތިންވަނަ ލަނޑު އޭނާ ޖެހީ މެޗުގެ އިތުރު ވަގުތުގައެވެ. 38 އަހަރުގެ ރޮނަލްޑޯ މެޗު ފުރިހަމަ ކުރިޔަސް ލަނޑެއް ނުޖެހުނެވެ. އެކަމަކު އޭނާއަކީ އަދިވެސް ޤައުމީ ޓީމަށް އެންމެ ގިނަ މެޗު ކުޅެ, އެންމެ ގިނަ ލަނޑު ޖެހި ކުޅުންތެރިޔާއެވެ.

ޕޯޗްގަލް އޮތީ ކުޅުނު ތިން މެޗުންވެސް މޮޅުވެ ކޮލިފައިންގ ގްރޫޕް ޖޭގެ އެއްވަނާގައެވެ. ބޮސްނިޔާ އޮތީ ހަ ޓީމް ހިމެނޭ ގްރޫޕްގެ ހަތަރު ވަނާގައެވެ. އެއީ ތިން މެޗުން ތިން ޕޮއިންޓާއެކުއެވެ. ދެވަނާގައި އޮތީ ސްލޮވޭކިޔާއެވެ.