ގުޅީފަޅު ހިއްކަމުން ދާތީ އެ ހިސާބުން ދަތުރު ކުރާއިރު ސަމާލު ވުމަށް ޓްރާންސްޕޯޓް މިނިސްޓްރީން އަންގައިފިއެވެ.
ޓްރާންސްޕޯޓް މިނިސްޓްރީން ގުޅީފަޅު ރިކްލަމޭޝަން ފޭސް 2 – ގުޅިފަޅު ސަރަހައްދުގައި ދަތުރުކުރާ އުޅަނދުތަކުގެ ސަލާމަތާއިގުޅޭ ގޮތުން ނެރުނު އިއުލާނެއްގައި ބުނީ، އެރަށު ބިންހިއްކުމުގެ މަސައްކަތްތައް ފެށިގެން ކުރިއަށްދާތީ އެ ސަރަހައްދުން ކަނޑުދަތުރުފަތުރު ކުރާ ފަރާތްތަކުން ބިންހިއްކުމުގެ މަސައްކަތުގައި ބޭނުންކުރާ އުޅަނދުފަހަރަށް ސަމާލުކަން ދީގެން ދަތުރު ކުރުމަށް އަންގާ ކަަމަށެވެ. އަދި އުޅަނދު ފަހަރުގެ ވެރިންނަށާއި ކެޕްޓަނުން މިކަމަށް ސަމާލުވުމަށް ވަނީ އެދިފައެވެ.
ގުޅިފަޅު ހިއްކުމުގެ ދެވަނަ ފިޔަވަހީގެ މަސައްކަތް ކުރުމަށް ހަވާލުކޮށްފައި ވަނީ ނެދަލޭންޑްސްގެ ބޮސްކާލިސް ކުންފުންޏާއެވެ. ގާތްގަނޑަކަށް 120 މިލިއަން ޔޫރޯގެ މި މަޝްރޫއުގެ ދަށުން ގުޅީފަޅު ތަރައްގީކުރުމަށް އެ ކުންފުންޏާ ހަވާލުކޮށްފައިވާއިރު، ގުޅީފަޅުގެ ފުރަތަަމަ ފިޔަވަހީގެ މަސައްކަތްވެސް ކޮށްފައިވަނީ އެ ކުންފުނިންނެވެ. މާލެއާ ގާތްގަނޑަކަށް ހަތަރު ވަރަކަށް ކިލޯމީޓަރު ދުރުގައި އޮތް ގުޅީފަޅު ތަރައްގީކުރުމުގެ މަސައްކަތަކީ ސަރުކާރުގެ ސްޓްރެޓީޖިކް ޕްލޭންގެ ތެރޭގައިވެސް ހިމެނޭ ކަމެކެވެ. އެގޮތުން އެތަނުގެ ޕޯޓްގެ މަސައްކަތާއި، ކްލައިމެޓް އެޑަޕްޓިވް ސިފަތަކާއެކު އެތަން ތަރައްގީކުރުމަށް ވަނީ ނިންމާފައެވެ. ގުޅީފަޅު ތަރަައްގީވެގެން ދާއިރު އެތަން ވެގެންދާނީ ކަނޑުގެ ލޮނުގަނޑު އުފުލުމުން ލިބޭ ގެއްލުން ކުޑަވާ ގޮތަށް ތަރައްގީކޮށްފައިވާ ތަނަކަށެވެ.
ގުޅީފަޅު ބިން ހިއްކުމުގެ މަޝްރޫއުގެ ފުރަތަމަ ފިޔަވަހީގެ ދަށުން ބޮސްކާލިސް އާ ހަވާލުކޮށްގެން 192 ހެކްޓަރުގެ ބިން ވަނީ ހިއްކާފަ އެވެ. އެމްޓީސީސީއާ ހަވާލުކޮށްގެން ވެސް ގުޅީފަޅުން ބިން ހިއްކާފައިވެއެވެ.
