މަސްތުވާތަކެތި ބޭނުން ކުރުމުގެ މައްސަލައެއްގައި އިންތިގާލީ އިންސާފުގެ އޮމްބަޑްސްޕަރސަން އޮފީހުގެ އިންވެސްޓިގޭޓަރަކު 6 ދުވަހަށް ބަންދުކުރުމަށް ކްރިމިނަލް ކޯޓުން އަމުރުކޮށްފިއެވެ.
ހ.ކުއްޅަވަށްމާގޭ މުޙައްމަދު އިބްރާހީމް ހައްޔަރުކުރީ މަސްތުވާތަކެތި ބޭނުން ކުރުމުގެ ކުށުގެ ތުހުމަތުގައެވެ. އޭނާއަކީ މަސްތުވެގެން އޮފީހަށް ގޮސް މުވައްޒަފުންނަށް ފުރައްސާކުރާ ކަމުގެ ތުހުމަތުވެފައިވާ ފަރާތެކެވެ.
އޭނާގެ ބަންދުގެ މުއްދަތު ހަމަވާނީ 20 ޖޫން 2023 ގައެވެ.
ކޯޓު އަމުރުގައި ބަޔާންކޮށްފައިވާ ގޮތުގައި އޭނާގެ މައްޗަށް ތުހުމަތު ކުރެވޭ މިންވަރަށް ކޮންމެވެސް މިންވަރެއްގެ ހެކި ހުށައަޅާފައިވެއެވެ.
އޭނާ ބަންދުކޮށްފައިވަނީ މުޖުތަމައުގެ ސަލާމަތާއި ރައްކާތެރިކަމަށްޓަކައެވެ. އަދި އޭނާ ބަންދުކުރިއިރު މަސްތުވާތަކެއްޗާ ބެހޭ ޤާނޫނުގެ 123 ވަނަ މާއްދާއަށްވެސް ވަނީ ރިއާޔަތްކޮށްފައެވެ.
އޭގެ އިތުރުން، އޭނާއަކީ ކުށުގެ ރެކޯޑު އޮންނަ ފަރާތެއްކަންވެސް ކޯޓު އަމުރުގައި ވަނީ ބަޔާންކޮށްފައެވެ. މިފަހަރުވެސް އޭނާ ހައްޔަރުކުރުމަށްފަހު އޭނާގެ ކުޑަކަމުދާ ތަކެތި ޓެސްޓުކުރިއިރު، އެތަކެތި ވަނީ އޯޕީއައި އަދި ބެންޒޯއަށް ޕޮޒިޓިވްވެފައެވެ.
އެހެންނަމަވެސް އެ ތުހުމަތުގެ ދިފާއުގައި އޭނާގެ ފަރާތުން ބުނެފައިވަނީ މަސްތުވާތަކެތީގެ ވަގުތީ ނަތީޖާއިން ދައްކާ އޯޕީއައި އަދި ބެންޒޯއަކީ މަސްތުވާތަކެއްޗާ ބެހޭ ޤާނޫނުގެ ޖަދުވަލެއްގައި ހިމެނޭ ބާވަތެއް ނޫން ކަމަށެވެ.
