އެމެރިކާގައި ދިވެހިރާއްޖޭގެ އެމްބަސީއެއް ހުޅުއްވުމަށް ފޮރިން މިނިސްޓަރު އަބްދުﷲ ޝާހިދު އެގައުމަށް ވަޑައިގެންފިއެވެ.
މިނިސްޓަރު ޝާހިދު ވަނީ އެމެރިކާއަށް ވަޑައިގެންކަން ހާމަކުރައްވައި ޓްވީޓެއް ކުރައްވާފައެވެ. މި ޓްވީޓުގައި ޝާހިދު ވިދާޅުވީ އެމެރިކާގައި ރާއްޖޭގެ އެމްބަސީ ހުޅުވިގެންދާނީ ވޮޝިންގްޓަން ޑީސީގައި ކަމަށެވެ.
މި ދަތުރުފުޅުގައި ޔޫއެސް ސަރުކާރުގެ ސެކެޓްރީ އޮފް ސްޓޭޓް އެންތަނީ ބްލިންކެންއާވެސް ބައްދަލުކުރައްވާނެކަން ޝާހިދު ވަނީ ހާމަކުރައްވާފައެވެ.
މި ދަތުރުފުޅަކީ ދެގައުމުގެ ގުޅުން އިތުރަށް ބަދަހިކޮށް ދެގައުމުގެ މަސްލަހަތު ހިމެނޭ މުހިންމު ކަންކަމާ ގުޅޭގޮތުން މަޝްވަރާކުރުމަށް ލިބޭ ފުރުސަތެއްކަން މިނިސްޓަރު ޝާހިދު ފާހަގަކުރެއްވިއެވެ.
ރާއްޖެއާ އެމެރިކާއާ ދެމެދު ސިޔާސީ ގުޅުން ގާއިމްކޮށްފައިވަނީ 1966 ވަނަ އަހަރުއެވެ.
