އާޖެންޓީނާގެ ކެޕްޓަން ލިއޮނެލް މެސީ 2026 ވަނަ އަހަރުގެ ވޯލްޑް ކަޕްގައި ކުޅުމުގެ ވިސްނުމެއް ނެތް ކަމަށް ބުނެފިއެވެ.

އުމުރުން 35 އަހަރުގެ މެސީގެ މޮޅު ކުޅުމާއެކު އާޖެންޓީނާ އިން މިދިޔަ އަހަރު ގަތަރުގައި ބޭއްވި ވޯލްޑް ކަޕު ވަނީ ކާމިޔާބުކޮށްފައެވެ. އެއީ މެސީ ކުޅުނު ފަސް ވަނަ ވޯލްޑް ކަޕު މުބާރާތެވެ.

ނިމުނު ވޯލްޑް ކަޕަކީ އޭނާގެ އެންމެ ފަހު ވޯލްޑް ކަޕު ކަމަށް މުޅި މުބާރާތުގައި މެސީ ތަކުރާރުކޮށް ބުނި ނަމަވެސް އާޖެންޓީނާގެ ކޯޗު ލިއޮނަލް ސްކަލޯނީ އާއި އޭނާގެ ޓީމުގެ ކުޅުންތެރިންނާއި ސަޕޯޓަރުން ތިބީ އެމެރިކާ، މެކްސިކޯ އަދި ކެނެޑާގައި 2026 ވަނަ އަހަރު ކުޅޭ ވޯލްޑް ކަޕްގައި ހަތް ފަހަރު ބެލޮން ޑިއޯ ކާމިޔާބުކުރި މެސީ ފެންނާނެ ކަމުގެ އުއްމީދުގަ އެވެ.

ބޭރުގެ ނޫހަކަށް މައުލޫމާތު ދެމުން މެސީ ބުނީ ގަތަރު ވޯލްޑް ކަޕަކީ އޭނާގެ އެންމެ ފަހު ވޯލްޑް ކަޕު ކަމަށާއި ކަންކަން ކުރިއަށްދާ ގޮތް ބަލާނެކަމަށެވެ. ނަމަވެސް މިވަގުތު އޮތްގޮތުން ކުރިއަށް އޮތް ވޯލްޑް ކަޕަށް ނުދާނެކަމަށް މެސީ ވަނީ ބުނެފައެވެ.

ގަތަރުގައި ބޭއްވި މުބާރާތުގައި މެސީގެ ދައުރު އޮތީ އޭނާގެ ކެރިއަރުގައި އޭނާއަށް ނުލިބުނު ހަމައެކަނި ބޮޑު ޝަރަފަށް ކުރި އިންތިޒާރު ނިމުމަކަށް ގެނައުމަށެވެ. މެސީ ވަނީ ހަތް މެޗުގައި ހަތް ގޯލު ޖަހައި، 1986 ވަނަ އަހަރު ގަދަ 16 ތައާރަފް ކުރި ފަހުން އެއް ވޯލްޑް ކަޕްގެ ކޮންމެ ރައުންޑެއްގައި ލަނޑު ޖެހި ފުރަތަމަ ކުޅުންތެރިޔާގެ ޝަރަފު ހޯދާފަ އެވެ. އަދި މެސީ ވަނީ ފައިނަލް މެޗުގައި ފްރާންސް ކޮޅަށް ދެ ލަނޑު ޖަހާފައެވެ. މީގެ އިތުރުން އޭނާ ވެފައިވަނީ 1982 ވަނަ އަހަރު ގޯލްޑަން ބޯލް އެވޯޑް ތައާރަފްކުރި ފަހުން ދެ ފަހަރެއްގެ މަތިން އެވޯޑް ހޯދި ފުރަތަމަ ކުޅުންތެރިޔާއަށެވެ.

އަންނަ ބުރާސްފަތި ދުވަހު އޮސްޓްރޭލިއާ އާއި އޭގެ ހަތަރު ދުވަސް ފަހުން އިންޑޮނޭޝިއާއާ ދެކޮޅަށް ކުޅޭ އެކުވެރިކަމުގެ މެޗަށް މެސީ ހުރީ އާޖެންޓީނާއާއެކު ޗައިނާގައި އިންޓަނޭޝަނަލް ޑިއުޓީގަ އެވެ.