ރ ފުއްގިރި ކުއްޔަށް ދޫކުރުމުގެ މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށް, ރިޝްވަތު ނެގި މައްސަލައިގައި ކުރީގެ ރައީސް އަބްދުﷲ ޔާމީނާއި، ކްރިކް ރިޒާގެ އިތުރުން 2 ކުންފުންޏެއްގެ މައްޗަށް އުފުލާފައިވާ ދައުވާގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި އަޑުއެހުމުގައި ދިވެހި ފުލުހުންގެ ޚިދުމަތުގެ ޑިޖިޓަލް އެވިޑެންސް ލެބޯޓަރީގައި ޑިޖިޓަލް އެވިޑެންސް އެގްޒެމިނަރެއްގެ ގޮތުގައި މަސައްކަތް ކުރައްވަމުން ގެންދަވާ އަބްދުﷲ ޝިފާޒުގެ ހެކިބަހުގެ ބާކީ ބައި ވަނީ ކުރިއަށް ގެންދަވާފައެވެ.  

އަންގާރަ ދުވަހު ބޭއްވި އަޑުއެހުމުގައި މި ހެކިވެރިޔާ ދައުލަތުން ކުރި ސުވާލުތަކަށް ޖަވާބު ދީފައިވާއިރު، ޝަރީއަތުގެ ވަގުތު ހަމަވުމުގެ ސަބަބުންނާއި، ގިނަ ދިފާއީ ވަކީލުންގެ އެދިލެއްވުމުގެ މަތިން، ހެކިވެރިޔާ ކްރޮސް އެގްޒެމިން ކުރުން ބުދަ ދުވަހަށް ފަސް ކުރެއްވީއެވެ.  

އޭނާގެ ހެކިބަސް ނަގަނީ މި މައްސަލައާ ގުޅިގެން ކިތާބީ ހެއްކެއްގެ ގޮތުގައި ހުށައަޅާފައިވާ މޯބައިލް ފޮރެންސިކް ރިޕޯޓާއި ގުޅިގެންނެވެ.

ހެކިވެރިޔާ ތަހުލީލުކޮށްފައިވަނީ އައިފޯނަކުން ނެގިފައިވާ ޑޭޓާތަކެކެވެ. އެއީ އަދީބުގެ ފޯނަކާއި، އަދީބުގެ ފޯނުގައި ހިމެނޭ ޑޭޓާތައް ހިމެނޭ ޕެންޑްރައިވެކެވެ.

އޭނާ ބުނީ، ހެކީގެ ގޮތުގައި ގެނެވުނު ތަކެތީގެ ޑްރައިވް ހުރީ އެންކްރިޕްޓް ކޮށްފައި (ޕާސްވޯޑެއް ބޭނުންކޮށްގެން ލޮކް ކޮށްފައި) ކަމަށެވެ. އެގޮތުން ޕާސްވޯޑު ހޯދުމަށްފަހު ޕެންޑްރައިވް ހުޅުވައި، އޭގައި ހުރި "ޒިޕް ފޯލްޑަރ"ތައް ބަލާފައިވާކަމަށް އޭނާ ބުންޏެވެ.

ޕެންޑްރައިވްގައި ހުރީ ފޯނަކުން އެކްސްޓްރެކްޓް ކޮށްފައިވާ ޑޭޓާތަކެއްކަމަށް ހެކިވެރިޔާ ވިދާޅުވިއެވެ.

ހެކިވެރިޔާ ވިދާޅުވީ، ރިޕޯޓު ތައްޔާރު ކުރުމަށް ތަހުގީގުކުރާ ފަރާތުން އެދިފައިވަނީ ވަކި މޯބައިލް ނަންބަރަކުން ކޮށްފައިވާ މުއާސަލާތުތަކެއް ހޯދުމަށްކަމަށެވެ.

ދެން ހާޒިރުކުރި ހެކިވެރިއަކީ ދިވެހި ފުލުހުންގެ ޚިދުމަތުން ތައްޔާރުކޮށްފައިވާ ރިޕޯޓަކާއި ގުޅިގެން ޚަބީރެއްގެ ގޮތުގައި ހާޒިރުކުރި ފަރާތެކެވެ. އެއީ މި މައްސަލައާ ގުޅިގެން ކިތާބީ ހެކީގެ ގޮތުގައި ހުށައަޅާފައިވާ ފިންގަރ ޕްރިންޓް އެނާލިސިސް ރިޕޯޓެވެ.

އެ ރިޕޯޓުގައި ވަނީ އަހުމަދ ކްރިކް ރިޒާގެ ފިންގަރ ޕްރިންޓް އަޅާކިޔާފައެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.