ފުއްގިރި ޚިޔާނާތް: މޯބައިލް ފޮރެންސިކާ ގުޅޭ ހެކިބަސް ނަގައިފި، ދިފާއުން ސުވާލު ކުރުން މާދަމާ
ނެގޭ ޑޭޓާތަކާމެދު އަމަލުކުރެވޭ ގޮތްތަކާ ގުޅޭގޮތުންވެސް ހެކިވެރިޔާ، ހެކިބަސް ދެމުން ވަނީ ވާހަކަދައްކާފައި
ކްރިމިނަލް ކޯޓް
ރ. ފުއްގިރި ކުއްޔަށް ދޫކުރުމުގެ މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށްގެން ރިޝްވަތު ނެންގެވި މައްސަލާގައި ކުރީގެ ރައީސް އަބްދުﷲ ޔާމީނުގެ މައްޗަށް އުފުލާފައިވާ ދައުވާގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށްގެންގޮސްފިއެވެ.
މި އަޑުއެހުމުގައި ދިވެހި ފުލުހުންގެ ޚިދުމަތުގެ ޑިޖިޓަލް އެވިޑެންސް ލެބޯޓަރީގައި ޑިޖިޓަލް އެވިޑެންސް އެގްޒެމިނަރެއްގެ ގޮތުގައި މަސައްކަތްކުރަމުން ގެންދާ އަބްދުﷲ ޝިފާޒުގެ ހެކިބަސް ވަނީ ނަގާފައެވެ.
އޭނާގެ ހެކިބަސް ނަގާފައިވަނީ މި މައްސަލައާ ގުޅިގެން ކިތާބީ ހެތްކެއްގެ ގޮތުގައި ހުށަހަޅާފައިވާ މޯބައިލް ފޮރެންސިކް ރިޕޯޓާ ގުޅިގެންނެވެ.
އޭނާ ވަނީ ޑިޖިޓަލް އެވިޑެންސް ލެބޯޓަރީއަށް ގެނެވޭ ހެކިތައް ތަހުލީލުކޮށް، ރިޕޯޓު ތައްޔާރުކުރާގޮތާ ގުޅޭގޮތުން ތަފްސީލީ ގޮތެއްގައި މައުލޫމާތު ހިއްސާކޮށްފައެވެ. އެގޮތުން ޑިޖިޓަލްކޮށް "ޑޭޓާ އެކްސްޓްރެކްޓް" ކުރެވޭގޮތާ ގުޅޭގޮތުން އޭނާ ވަނީ ދައުލަތުގެ ސުވާލުތަކަށް ޖަވާބުދީފައެވެ.
މިސާލަކަށް ޑޭޓާ ނަގާއިރު، ފޯނެއް ނުވަތަ އެ އާލާތެއްގައި ބޭނުންކުރަންޖެހޭ ވަކި ޚާއްސަ މެތަޑެއް އޮންނަކަން ފާހަގަކޮށް ހެކިވެރިޔާ ބުނީ، އެކްސްޓްރެކްޓް ކުރެވޭ ޑޭޓާތައް ބެލެނީވެސް ވަކި ޚާއްސަ ގޮތަކަށް ކަމަށެވެ.
އެގޮތަށް ނެގޭ ޑޭޓާތަކުގެ އިންޓެގްރިޓީ ހިފެހެއްޓުމަށްޓަކައި އެ ނެގޭ ޑޭޓާތަކާމެދު އަމަލުކުރެވޭ ގޮތްތަކާ ގުޅޭގޮތުންވެސް ހެކިވެރިޔާ ހެކިބަސް ދެމުން ވަނީ ވާހަކަ ދައްކާފައެވެ.
ހެކިވެރިޔާ ތަހުލީލުކޮށްފައިވަނީ އައިފޯނަކުން ނެގިފައިވާ ޑޭޓާތަކެކެވެ. އެއީ އަދީބުގެ ފޯނަކާއި، އަދީބުގެ ފޯނުގައި ހިމެނޭ ޑޭޓާތައް ހިމެނޭ ޕެންޑްރައިވެކެވެ.
މި ހެކިވެރިޔާ ދައުލަތުން ކުރި ސުވާލުތަކަށް ޖަވާބު ދީފައިވާއިރު، ޝަރީއަތުގެ ވަގުތު ހަމަވުމުގެ ސަބަބުންނާއި، ގިނަ ދިފާއީ ވަކީލުންގެ އެދުމުގެމަތިން، ހެކިވެރިޔާ "ކްރޮސް އެގްޒެމިން" ކުރުން ބުދަ ދުވަހަށް ވަނީ ފަސްކުރައްވާފައެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.
