ވޯޓާސް ލިސްޓް އާންމުކޮށް، ޝަކުވާ ހުށަހެޅުމުގެ ފުރުސަތު ހުޅުވާލައިފި
12 ޖޫން 2023 | ހޯމަ 01:202023 ސެޕްޓެމްބަރ 9ށް 18 އަހަރު ފުރޭ، 282672 މީހުން އެބަތިބި
މީގެ ކުރިން ބޭއްވި އިންތިޚާބެއްގައި ވޯޓުލާ މަރުކަޒުގެ އޮފިޝަލުން ވޯޓާސް ލިސްޓު ޗެކްކުރަނީ
ރިޔާސީ އިންތިޚާބުގައި ވޯޓުލެވޭ މީހުންގެ ވޯޓާސް ލިސްޓު އާންމުކޮށް، ޝަކުވާ ހުށަހެޅުމުގެ ފުރުސަތު ހުޅުވާލައިފިއެވެ.
އިލެކްޝަންސް ކޮމިޝަނުން ވޯޓާސް ލިސްޓު އާންމުކޮށްފައިވަނީ އާދީއްތަ ދުވަހުއެވެ.
2023 ސެޕްޓެމްބަރ 9ށް 18 އަހަރު ފުރޭ 282672 މީހުންގެ ވޯޓުދިނުމުގެ ޙައްޤު ލިބިފައިވާ ލިސްޓު ދިވެހި ސަރުކާރުގެ ގެޒެޓްގައި ވަނީ ޝާއިޢުކޮށްފައެވެ. އިލެކްޝަންސް ކޮމިޝަނުން ބުނީ މި މަހުގެ ޖޫން 22 ވާ ބުރާސްފަތި ދުވަހުގެ ނިޔަލަށް ލިސްޓަށް ޝަކުވާ ހުށަހެޅުމުގެ ފުރުސަތު ވަނީ ހުޅުވާލާފައި ކަމަށެވެ.
އިލެކްޝަންސް ކޮމިޝަންގެ ނާއިބްރައީސް އިސްމާއީލް ހަބީބު ވިދާޅުވީ ވޯޓުލާމީހުންގެ ލިސްޓުގައި ނަން އޮތްތޯ ނުވަތަ ނަން އޮތީ ރަނގަޅަށްތޯ ޗެކް ކޮށްލުމަކީ، ވޯޓުލާމީހުންގެ ސައްހަ ލިސްޓެއް ތައްޔާރުކުރުމަށްޓަކައި، ޕާޓީތަކުންނާއި، ކެނޑިޑޭޓުންނާއި، ފަރުދީގޮތުން ވެސް ކުރެއްވުން ވަރަށް މުހިންމުކަމެެއް ކަމަށެވެ.
އެގޮތުން 1414 އަށް ގުޅައިގެން ނުވަތަ އެސް.އެމް.އެސްއެއް ފޮނުވައިގެން ވެސް ޗެކް ކޮށްލެއްވޭނެއެވެ. މި ލިސްޓު އީސީގެ ވެބްސައިޓުންނާއި، ރަށު ކައުންސިލްތަކާއި، ސިޓީ ކައުންސިލްތަކުގެ އިދާރާއިން ވެސް ބެލޭނެއެވެ.
އެސްއެމްއެސް ފޮނުއްވާނީ VR (space) ID number to 1414 އަށެވެ.
