ކުރީގެ ކްރިކެޓް ކޯޗަށް 53 އަހަރުގެ ޖަލު ޙުކުމެއް

ކޯޗުކަން ކޮށްދިން ކުދިންތަކަކާއެކު ބަދުއަޚުލާގީ އަމަލު ހިންގި ކަމަށް ތުހުމަތު ކުރެވޭ ގައުމީ ކްރިކެޓް ޓީމުގެ ކުރީގެ ކޯޗު އާސިފް އަމީން ޚާން 53 އަހަރަށް ޖަލަށް ލާން ކްރިމިނަލް ކޯޓުން ޙުކުމް ކޮށްފިއެވެ.

ސައުތު އެފްރިކާގެ ރައްޔިތެއްކަމަށްވާ މުހައްމަދު އާސިފް އަމީންގެ މައްޗަށް އުފުލާފައިވާ ދައުވާތަކުގެ ތެރޭގައި, ކުޑަކުއްޖަކު އިތުބާރު ކުރަންޖެހޭ މަގާމެއްގައި ހުރި މީހަކު އެކުއްޖާއާއެކު ޖިންސީ އަމަލެއް ހިންގުމުގެ ކުށުގެ 3 ދައުވާއަކާއި، ހަޑިހުތުރު އެއްޗެހި ކިއުމާއި ހަޑިހުތުރު ބަސް ބޭނުން ކުރުމުގެ ކުށުގެ ދައުވާއަކާއި، ޖިންސީ ގޯނާ ކުރުމުގެ ކުށުގެ 3 ދައުވާއަކާއި، ޖާއިޒު މަގުސަދެއް ހާސިލުނުވާނެ އަމަލަކުން މާއްދީ ގޮތުން ހުތުރު ހާލަތެއް އުފެއްދުމުގެ ކުށުގެ 2 ދައުވާއެއް ހިމެނެއެވެ.

އޭނާގެ މައްޗަށް 9 ދައުވާއެއް އުފުލާފައިވާއިރު، އޭގެ ތެރެއިން 7 ދައުވާއެއް ވަނީ ސާބިތުވެފައެވެ. ސާބިތުވެފައި ނުވަނީ ޖާއިޒު މަޤްސަދެއް ޙާސިލު ނުވާނެ އަމަލަކުން، މާއްދީގޮތުން ހުތުރު ޙާލަތެއް އުފެއްދުމުގެ ކުށުގެ އެއް ދައުވާއާއި، ކުޑަކުއްޖަކު އިތުބާރުކުރަންޖެހޭ މަޤާމެއްގަައި ހުރި މީހަކު، އެ ކުޑަކުއްޖާއާއެކު ޖިންސީ ޢަމަލެއް ހިންގުމުގެ ކުށުގެ އެއް ދައުވާއެވެ. ބާކީ ހުރި ދައުވާތައް އޭނާގެ މައްޗަށް ވަނީ ސާބިތުވެފައެވެ.

ކުށް ސާބިތުވާކަމަށް ކަނޑައަޅައި، އަދަބު ކަނޑައަޅާފައިވަނީ ހޮނިހިރު ދުވަހު މި މައްސަލައިގައި ސިއްރުކޮށްގެން ކުރިއަށް ދިޔަ އަޑުއެހުމުގައެވެ.

އޭނާގެ މައްޗަށް ކަނޑައަޅާފައިވާ އަދަބުތަކަށް ބަލާއިރު، ޖިންސީ ގޯނާކުރުމުގެ ކުށުގެ 3 ދައުވާވެސް ސާބިތުވެ، އެއިން ކޮންމެ ދައުވާއަކާއި ގުޅިގެން އޭނާ 7 އަހަރަށް ޖަލަށް ލާން (ޖުމުލަ 21 އަހަރު) ވަނީ ޙުކުމްކޮށްފައެވެ.

އޭގެ އިތުރުން، ކުޑަކުއްޖަކު އިތުބާރުކުރަންޖެހޭ މަޤާމެއްގަައި ހުރި މީހަކު، އެ ކުޑަކުއްޖާއާއެކު ޖިންސީ ޢަމަލެއް ހިންގުމުގެ ކުށުގެ އެއް ދައުވާއާ ގުޅިގެން 17 އަހަރުގެ ޖަލު ޙުކުމެއްވެސް އައިސްފައިވާއިރު، އޭގެ ދެވަނަ ދައުވާއާ ގުޅިގެން 15 އަހަރުގެ ޖަލު ޙުކުމެއް ވަނީ އިއްވާފައެވެ.

އޭނާގެ މައްޗަށް އުފުލާފައިވާ ޖާއިޒު މަޤްސަދެއް ޙާސިލު ނުވާނެ އަމަލަކުން، މާއްދީގޮތުން ހުތުރު ޙާލަތެއް އުފެއްދުމުގެ ކުށުގެ ދައުވާއާ ގުޅިގެން އައިސްފައިވަނީ 22 ދުވަހުގެ ޖަލު ޙުކުމެކެވެ.

އަދި ހަޑިހުތުރު އެއްޗެއް ކިޔުމާއި ހަޑިހުތުރު ބަސް ބޭނުންކުރުމުގެ ކުށުގެ ދައުވާއާ ގުޅިގެން އައިސްފައިވަނީ 1 މަހާއި 15 ދުވަހުގެ ޖަލު ޙުކުމެކެވެ.

ޖުމުލަ 53 އަހަރުގެ ޖަލު ޙުކުމެއް އޭނާގެ މައްޗަށް ވަނީ އިއްވާފައެވެ.

ޖިންސީ ގޯނާ ކުރިކަމުގެ ތުހުމަތުގައި އާސިފް އެންމެ ފުރަތަމަ ހައްޔަރު ކޮށްފައިވަނީ 2019 ވަނަ އަހަރުގެ އޮކްޓޫބަރު މަހުގެ ކުރީ ކޮޅުގައެވެ. އޭރު އޭނާ ހައްޔަރުކުރީ ފުރަން އެއަރޕޯޓުގައި ހުއްޓައެވެ.

އެހެންނަމަވެސް މުއްދަތު ޖެހުމަށް ކޯޓަށް ގެންދިޔުމުން 24 ގަޑިއިރު ފާއިތުވުމާ ގުޅިގެން ކްރިމިނަލް ކޯޓުން އޭނާ ދޫކޮށްލިއެވެ. އޭގެ ފަހުން ހައިކޯޓުން އަމުރެއް ނެރެ އޭނާ ފުލުހުންގެ ބެލުމުގެ ދަށަށް ގެންދިޔައެވެ.

މައުލޫމާތު ލިބިފައިވާ ގޮތުގައި ޒުވާން ކްރިކެޓް ކުޅުންތެރިންނަށް އާސިފް ވަނީ އެކި ފަހަރު މަތިން ޖިންސީ ގޯނާ ކޮށްފައެވެ. އަދި އޭގެ ތެރޭގައި އޭނާ އެ އަމަލު ހިންގި ކަމަށް ތުހުމަތު ކުރެވޭ 18 އަހަރު ނުފުރޭ ކުޅުންތެރިންވެސް ހިމެނޭ ކަމަށްވެއެވެ.

މީގެއިތުރުން އާސިފްގެ މައްސަލަ ފެންމަތިވެފައި އޮއްވައި، އޭނާއަށް އެއްވެސް ފިޔަވަޅެއް ނާޅައި ރާއްޖެއިން ފުރުވާލަން ކްރިކެޓް ބޯޑް އޮފް މޯލްޑިވްސްއިން މަސައްކަތް ކުރި ކަމުގެ އަޑުތައް ވެސް އޭރު ފެތުރިގެން ދިޔައެވެ.