ފުލުހެއްގެ ގައިގައި ޖަހާ މާރާމާރީ ހިންގި މައްސަލައިގައި ހޯދަމުންދިޔަ އަންސާމް އަމިއްލައަށް ފުލުހުންނާ ހަވާލުވެއްޖެ
10 ޖޫން 2023 | ހޮނިހިރު 17:28މުޙައްމަދު އަންސާމް އިބްރާހީމް ހޯދުމަށް އިއުލާނުކޮށްފައިވަނީ ޖޫން 7 ވަނަ ދުވަހު
ފުލުހުން ހޯދަމުންދިޔަ މުޙައްމަދު އަންސާމް އިބްރާހީމް
ފުލުހެއްގެ ގައިގައި ޖަހާ މާރާމާރީ ހިންގި މައްސަލައަކާއި މަސްތުވާތަކެތީގެ މައްސަލައެއްގައި ހައްޔަރުމަށްޓަކައި ހޯދަމުންދިޔަ ޏ. ފުވައްމުލައް ސިޓީ/ ދަޑިމަގު.ބޭރެފީށި، މުޙައްމަދު އަންސާމް އިބްރާހީމް ހައްޔަރުކޮށްފިއެވެ.
ފުލުހުން ބުނީ އުމުރުން 23 އަހަރުގެ މުޙައްމަދު އަންސާމް އިބްރާހިމް ހައްޔަރުކޮށްފައިވަނީ ބުރާސްފަތި ދުވަހުގެ ހަވީރުގެ ވަގުތެއްގައި ހުޅުމާލެ ޕޮލިސް ސްޓޭޝަނަށް އަމިއްލައަށް ހާޒިރުވުމުން ކަމަށެވެ.
ހުޅުމާލޭގައި މެއި 21 ވަނަ ދުވަހުގެ ވަގުތެއްގައި ބަޔަކު ބައިވެރިވެގެން ފުލުހެއްގެ ގައިގައި ޖަހާ މާރާމާރީ ހިންގި މައްސަލައާއި އޭނާގެ މައްޗަށް ތުހުމަތުކުރެވޭ މަސްތުވާތަކެތީގެ މައްސަލައެއްގައި ކޯޓު އަމުރެއްގެ ދަށުން ހައްޔަރުކުރުމަށްޓައި މުޙައްމަދު އަންސާމް އިބްރާހީމް ހޯދުމަށް އިއުލާނުކޮށްފައިވަނީ ޖޫން 7 ވަނަ ދުވަހުއެވެ.
