ކްރިސްޓިއާނޯ ރޮނާލްޑޯ އޭނާގެ ފުޓުބޯޅަ ކުޅުމުގެ ކެރިއަރު ނިންމާލުމަށްފަހު ފުޓްބޯޅަ ކްލަބެއްގެ ވެރިއަކަށް ވުމުގެ ޝައުގުވެރިކަން ހުރިކަމަށް ބުނެފިއެވެ.
ބުދަ ދުވަހު ބޭއްވި އިވެންޓެއްގައި ރޮނާލްޑޯއާ ސުވާލުކޮށްފައި ވަނީ ރެއާލް މެޑްރިޑްގެ ކުރީގެ ތަރިން ރޮނާލްޑޯ ނަޒާރިއޯ އާއި ޑޭވިޑް ބެކަމް ފަދައިން ފުޓްބޯޅަ ކުލަބެއްގެ ވެރިއަކަށް ވުމުގެ ފުރުސަތު އޮތްތޯއެވެ. އޭގެ ޖަވާބުގައި ރޮނާލްޑޯ ބުނީ ފުޓްބޯޅައާއި ލީގުތައް ތަރައްގީވާ ގޮތް ފެންނަ ކަމަށާއި މީގެ އަހަރުތަކެއް ކުރިން އެކަމާ ވިސްނިކަމަށެވެ. އަދި ކުރިއަށް އޮތްތަނުގައި ކުލަބެއް ގަންނަން ބޭނުންވާކަމަށެވެ. ބެކަމްގެ އިންޓަ މިއާމީ އިން ވަނީ މެސީ އާއެކު އެއްބަސްވުމަކަށް އައިސްފައެވެ.
ދާދި ފަހުން ރޮނާލްޑޯގެ އެކުވެރި ކަރީމް ބެންޒެމާ ވަނީ ސައުދީ ޕްރޯ ލީގުގެ އަލް އިއްތިހާދާ ގުޅިފައެވެ. އެކަމާ ގުޅޭގޮތުން ރޮނާލްޑޯ ބުނީ ތިން އަހަރު ތެރޭގައި ދުނިޔޭގެ އެންމެ މުހިންމު ލީގުތަކުގެ ލިސްޓުގައި ސައުދީ ލީގު ހިމެނޭނެކަމަށެވެ. އަދި ބެންޒެމާ އެ ލީގަށް އައި އިރު، ކުރިޔަށް އޮތް ތަނުގައި އޭނާގެ ފަހަތުން އިތުރު ކުޅުންތެރިން ވެސް އަންނާނެކަމަށެވެ. ބެންޒެމާގެ އިތުރުން އެންގޯލޯ ކާންޓޭ ވެސް ވަނީ އިއްތިހާދާ ގުޅުމަށް އެއްބަސްވެފައެވެ.
ސައުދީ ލީގުގެ ޓީމުތަކުން ގިނަ ކުޅުންތެރިންތަކެއް ގެންނަން މަސައްކަތް ކުރާއިރު މަޝްހޫރު ގިނަ ކުޅުންތެރިންތަކެއް އެ ލިސްޓުގައި ހިމެނެއެވެ. އޭގެތެރޭގައި މަހްރޭޒް، ބުސްކެޓްސް، ޖޯޑި އަލްބާ، އެލެކްސިސް ސަންޗޭޒްގެ އިތުރުން ވިލްފްރެޑް ޒަހާ ފަދަ ކުޅުންތެރިން ހިމެނެއެވެ.
