މާލެ ސަރަހައްދުގެ އެމަޖެންސީ އިންޖީނުގޭގެ މަސައްކަތް ނިންމާލައިފި
މިއީ 20.2 މެގަވޮޓުގެ ޕަވަޕްލާންޓެއް ހިމެނޭ އިންޖީނުގެއެއް
ކުއްލި ހާލަތްތަކުގައި ބޭނުން ކުރުމަށް ހެދި އިންޖީނުގެ
ގްރޭޓާމާލެ ސަަރަހައްދަށް ހާއްސަކޮށްގެން އެމަޖެންސީ ހާލަތްތަކުގައި ބޭނުން ކުރުމަށް ހެދި އިންޖީނުގޭގެ މަސައްކަތް ނިންމާލައިފިއެވެ.
މި އެމަޖެންސީ އިންޖީނުގެ ހަދާފައިވަނީ ހުޅުމާލޭގެ ބައު އިންޖީނުގެ ހުރިތަނުގައެވެ. މިއީ 20.2 މެގަވޮޓުގެ ޕަވަޕްލާންޓެއް ހިމެނޭ އިންޖީނުގެއެއް ކަަމަށް ސްޓެލްކޯއިން މައުލޫމާތު ދެއެވެ.
ސްޓެލްކޯގެ މެނޭޖިންގ ޑިރެކްޓަރު އަހުމަދު ޝަރީފު ވިދާޅުވި ގޮތުގައި މި އިންޖީނުގެއަކީ މާލެ ސަރަހައްދުގައި ކަރަންޓު ބޭނުން ކުރާ މިންވަރު ފަހަކަށް އައިސް އިތުރުވެ، އިންޖީނުގެތަކަށް ބާރުބޮޑުވަމުންދާތީ ފެށި މަސައްކަތެއް ކަމަށެވެ. އަދި ކުއްލި ހާލަތްތަކުގައި ބޭނުން ކުރުމަށް ހާއްސަކޮށްގެން ހެދި އިންޖީނުގޭގެ ސަބަބުން މައްސަލައެއް ދިމާވި ނަމަވެސް ހުއްޓުމެއް ނެތި ކަރަންޓު ފޯރުކޮށްދެވޭނެ ކަމަށް އޭނާ ވިދާޅުވިއެވެ.
ސްޓެލްކޯއިން ބުނިގޮތުގައި މި ޕަވަރޕްލާންޓަކީ، އެ ކުންފުނީގެ މެނޭޖިންގ ޑިރެކްޓަރު އަހުމަދު ޝަރީފްގެ ބެއްލެވުމުގެ ދަށުން، އެ ކުންފުނީގެ އަތޮޅުތެރޭގައި އަދި ގްރޭޓާމާލޭގެ އިންޖީނުގެތަކުގެ ތިބި، އެ މަސައްކަތަށް އެންމެ ގާބިލް މުވައްޒަފުން ހިމަނައިގެން އެކުލަވާލި ޓީމަކުން ކޮށްފައިވާ ބުރަ އަދި އަވަސް މަސައްކަތެކެވެ. އަދި މިއީ ސްޓެލްކޯގެ ތާރީހުގައި ވެސް މިހާ ކުރު މުއްދަތެއްގެ ތެރޭގައި މިހާ ގިނަ އިންޖީނުތަކެއް އެއްފަހަރާ ކޮމިޝަންކޮށް ނިންމާލެވުނު ފަހަރުކަން ވެސް އެ ކުންފުނިން ވަނީ ފާހަގަކޮށްފައެވެ.
މީގެ އިތުރުން މި އިންޖީނުގޭގެ ސަބަބުން މާލޭއާއި ހުޅުމާލޭގެ ބޮޑެތި ޖެންސެޓްތައް އޯވާރހޯލް ކުރުމަށް ނިއްވާލުމުގެ ފުރުސަތު ލިބި އެ ޖަނަރޭޓަރުތަކުގެ އެފިޝަންސީ އިތުރުކުރުމަށް ފުރުސަތު ލިބިގެންދާނެ ކަމަށް ވެސް އެ ކުންފުނިން ބުނެއެވެ.
