ތައިލެންޑުގައި ކުރިއަށް ދިޔަ އެކަޑަމީތަކުގެ މުބާރާތުން ރާއްޖޭގެ ވެލެންސިއާ އަށް ރިހި މެޑަލް

ތައިލެންޑުގައި ކުރިއަށް ދިޔަ އެކަޑަމީތަކުގެ ފުޓުބޯޅަ މުބާރާތުގައި ވާދަކޮށް ރާއްޖޭގެ ކުލަބު ވެލެންސިއާގެ 10 އަހަރުން ދަށުގެ އެކަޑަމީން ރިހި މެޑަލް ހޯދައިފި އެވެ.

ތައިލެންޑު އިންޓަނޭޝަނަލް ޔޫތު ކަޕްގެ ނަމުގައި ކުރިއަށް ދިޔަ މުބާރާތުގައި ޖުމުލަ 16 އެކަޑަމީއެއް ވަނީ ވާދަކޮށްފަ އެވެ. އޭގެ ތެރެއިން ރާއްޖޭގެ ކުލަބު ވެލެންސިއާ ހިމެނުނު ގްރޫޕްގައި ދެން އޮތީ، ހޮންގްކޮންގްގެ އެކަޑަމީއަކާއި، ސިންގަޕޫރުގެ އެކަޑަމީއެއްގެ އިތުރުން ތައިލެންޑުގެ ދެ އެކަޑަމީ އެވެ. މި ގްރޫޕުން ވެލެންސިއާ އަށް ހަތަރު ވަނަ ލިބުނު މެޗު ކުޅެން ޖެހުނީ، ޕްލޭޓް ކެޓަގަރީގަ އެވެ. އެ ކެޓަގަރީގައި ވާދަކޮށް ވެލެންސިއާ ވަނީ ފައިނަލްގައި ކުޅެފަ އެވެ. އެހެން ނަމަވެސް ފައިނަލްގައި 1-0 އިން ބަލިވެ، ވެލެންސިއާ އަށް ވަނީ ރިހި މެޑަލް ލިބިފަ އެވެ.

މިއީ ތައިލެންޑުގައި އަހަރަކު ތިން ފަހަރު އެކަޑަމީތަކަށް ޚާއްސަކޮށްގެން ކުރިއަށްގެންދާ މުބާރާތެކެވެ. މި މުބާރާތުގައި ރާއްޖޭގެ އިތުރުން ވަނީ އެހެން ޤައުމުތަކުގެ އެކަޑަމީ ވެސް ބައިވެރިވެފަ އެވެ. އެގޮތުން ފާހަގަކޮށްލެވޭ ޤައުމުތަކުގެ ތެރޭގައި، ޖަޕާން، ޗައިނާ، ހޮންގްކޮންގް، ތައިލެންޑު، ސިންގަޕޫރު، މެލޭޝިޔާ އަދި އިންޑޮނީޝިއާ ހިމެނެ އެވެ.

ވެލެންސިއާ އަކީ ރާއްޖޭގައި އެކަޑަމީ ހިންގަމުން އަންނަ އެންމެ ފާހަގަކޮށްލެވޭ އެއް ކުލަބެވެ. އެ އެކަޑަމީން އުފެދެމުން އަންނަ ޒުވާން ކުޅުންތެރިން އަންނަނީ އިންޓަރ ސްކޫލް މުބާރާތްތަކުގައި ވެސް މޮޅު ކުޅުމެއް ދައްކަމުންނެވެ. މީގެ އިތުރުން ސީނިއާ ފެންވަރުގައި ވެސް އެ ކުޅުންތެރިން އަންނަނީ ހުނަރު ދައްްކަމުންނެވެ.