ފަހު މެޗުގައި މޮޅުވެ ލާޒިއޯއަށް ދެވަނަ، އިންޓަ މިލާންއަށް ތިންވަނަ

އިޓާލިއަން ލީގުގެ ފަހު މެޗުގައި ލާޒިއޯ މޮޅުވެ ދެވަނަ ހޯދިިރު، ޓޮރީނޯ ބަލިކޮށް އިންޓަ މިލާން ތިން ވަނައިގަ ސީޒަން ނިންމާލައިފިއެވެ.

އެމްޕޯލީ އާ ބައްދަލުކުރި މެޗު ލާޒިއޯ އިން ކާމިޔާބުކޮށްފައިވަނީ 2-0 ގެ ނަތީޖާއަކުންނެވެ. މެޗުގެ ފުރަތަމަ ހާފު ނިމުނީ އެއްވެސް ޓީމަކަށް ލަނޑެއް ނުޖެހިއެވެ. ނަމަވެސް ދެވަނަ ހާފު ފެށިގެން ތިންވަނަ މިނެޓުގައި ލާޒިއޯގެ އެލެސިއޯ ރޮމަގްނޯލީ ވަނީ ލަނޑެއްޖަހާ އެ ޓީމަށް ކުރިހޯދައިދީފައެވެ. މެޗުގެ 89 ވަނަ މިނެޓުގައި އެމްޕޯލީގެ ނިކޮލޯ ކެމްބިއާގީއަށް ދެވަނަ ރީނދޫ ކާޑު ދެއްކުމުން މެޗު ނިންމާލަން ޖެހުނީ 10 ކުޅުންތެރިންނާ އެކުއެވެ. އޭގެ ތިން މިނެޓު ފަހުން ލާޒިއޯއަށް ލީޑު ފުޅާކޮށްދިނީ ލުއިސް އެލްބާޓޯއެވެ.

ހޮނިހިރު ދުވަހު ޓޮރީނޯގެ ދަނޑުގައި ކުޅުނު މެޗު އިންޓަ މިލާނުން ކާމިޔަބުކޮށްފައިވަނީ 1-0 ގެ ނަތީޖާއަކުންނެވެ. މެޗުގެ ހަމައެކަނި ލަނޑު 37 ވަނަ މިނެޓުގައި ރޮމޭލޫ ލުކާކޫ ތަނަވަސްކޮށްދިން ފުރުސަތަކުން ކާމިޔާބުކޮށްދިނީ މާސެލޯ ބްރޮޒޮވިޗެވެ.

ލީގު ޗެމްޕިއަންކަން ނަޕޯލީ އިން ހޯދިއިރު، ލާޒިއޯ އަށް ދެވަނަ ލިބުނީ 74 ޕޮއިންޓާއެކުއެވެ. އިންޓަމިލާން އަށް ލިބިފައިވަނީ 72 ޕޮއިންޓެވެ. އޭގެ ފަހަތުން އޭސީ މިލާން އަށް ބާކީ އެއް މެޗު އޮތްނަމަވެސް އެ ޓީމަށް ލިބިފައިވަނީ 67 ޕޮއިންޓެވެ. މިއީ 22 އަހަރުތެރޭގައި ލާޒިއޯ ތިން ވަނައަށްވުރެ މަތިން ނިންމާލި ފުރަތަމަ ފަހަރެވެ.

އިންޓަމިލާން އަށް މި ސީޒަނުގައި ބާކީ އޮތީ ފަހުގެ ތާރީހެއްގައި އެ ޓީމު ކުޅެން ޖެހޭ އެންމެ މުހިންމު މެޗެވެ. އެއީ ހޮނިހިރު ދުވަހު މެންޗެސްޓާ ސިޓީ އާ ބައްދަލުކުރާ ޗެމްޕިއަންސް ލީގު ފައިނަލް މެޗެވެ.