ވިދިވިދިގެން ދެވަނަ ފަހަރަށް ލައިޕްޒިގް އިން ޖަރުމަނު ކަޕު ކާމިޔާބުކޮށްފި

ފައިނަލް މެޗުގައި އެއިންޓްރަކްޓް ފްރޭންކްފާޓް ބަލިކޮށް ވިދިވިދިގެން ދެވަނަ ފަހަރަށް ލައިޕްޒިގުން ޖަރުމަނު ކަޕު ކާމިޔާބުކޮށްފިއެވެ.

ވާދަވެރި ކުޅުމެއް ފެނިގެންދިޔަ މި މެޗުގެ ފުރަތަމަ ހާފު ނިމުނީ އެއްވެސް ޓީމަކަށް ލަނޑެއް ނުޖެހިއެވެ. ނަމަވެސް މެޗުގެ 71 ވަނަ މިނެޓުގައި ލައިޕްޒިގްގެ ކްރިސްޓޮފާ އެންކުންކޫ ވަނީ ލަނޑެއް ޖަހާ، ޓީމަށް ކުރިހޯދަދީފައެވެ. އެ ލަނޑަކީ މި ސީޒަނުގައި އޭނާ ޖެހި 23 ވަނަ ލަނޑެވެ. 25 އަހަރުގެ ފޯވާޑު މި ސީޒަން ނިމުމަށްފަހު ޗެލްސީއާ ގުޅުން ގާތެވެ.

މެޗު ނިމެން ފަސް މިނެޓަށް ވެފައިވަނިކޮށް ލައިޕްޒިގް އަށް ލީޑު ފުޅާކޮށްދިނީ އެންކުންކޫ ތަނަވަސްކޮށްދިން ފުރުސަތަކުން ޑޮމިނިކް ސްޒޮބޮސްޒްލައިއެވެ. އެ ލަނޑާއެކު ޖަރުމަނު ކަޕުގެ ޗެމްޕިއަންކަން ލައިޕްޒިގުން ހޯދީ 2-0 ގެ ނަތީޖާއަކުން މެޗު ކާމިޔާބުކޮށްގެނެވެ.

މީގެ 14 އަހަރު ކުރިން އުފެދުނު ލައިޕްޒިގް ވަނީ ވޭތުވެދިޔަ ފަސް އަހަރު ތެރޭ ޖަރުމަނު ކަޕުގެ ފައިނަލް ހަތަރު ފަހަރު ކުޅެފައެވެ. 2019 އަދި 2021 ގައި ބަލިވި ނަމަވެސް، ޖެހިގެން އައި ދެ އަހަރު އެ ޓީމުން ވަނީ ޖަރުމަނު ކަޕު ކާމިޔާބުކޮށްފައެވެ.