ރޭ މާލޭގައި ހިންގަން އުޅުނު މާރާމާރީއާ ގުޅިގެން މީހަކު ހައްޔަރު ކޮށްފިއެވެ.
ތޫނު ހަތިޔާރު ބޭނުންކޮށްގެން މި މާރާމާރީ ހިންގަން އުޅުނީ ރޭ 11:25 އެހާއިރު މަޖީދީ މަގުގައި ހުންނަ ޑައިނަމޯ ކައިރީގައެވެ. ނަމަވެސް ފުލުހުންގެ ހައި ވިޒިބިލިޓީ ފުލުހުން ވަނީ މި މާރާމާރީ ހުއްޓުވާފައެވެ.
ފުލުހުން ބުނީ މާރާމާރީ ހިންގަން އުޅުނު މައްސަލައިގައި 25 އަހަރުގެ ދިވެހި ފިރިހެނަކު ހައްޔަރު ކޮށްފައިވާ ކަމަށެވެ. އަދި މާރާމާރީ ހިންގަން އުޅުނު އިތުރު މީހުން ފިލާފައިވާ ކަަމަށް ވެސް އެ އިދާރާއިން ބުންޏެވެ.
މާރާމާރީ ހުއްޓުވުމުން ފިލަން ދުވި މީހުންގެ ތެރެއިން ދެ މީހަކު ފިލީ ސައިކަލު އެތަނަށް ދޫކޮށްލާފައި ކަމަށާއި އެ ސައިކަލު ޓޯވ ކޮށްފައިވައިވާ ކަމަށް ވެސް ފުލުހުން ބުނެފައިވެއެވެ.
މި މައްސަލަ އިތުރަށް ތަހުގީގު ކުރަމުން އަންނައިރު މާރާމާރީ ހިންގަން އުޅުނު މީހުން ދެނެގަތުމަށް ވެސް ފުލުހުން ދަނީ މަސައްކަތް ކުރަމުންނެވެ.
މާރމާރީ ހިންގަން އުޅުނު ސަރަހައްދުގެ މަގުމަތިން ކަތިވަޅިއެއް ފެނިފައިވާއިރު މަންޒަރުދުށް ބައެއް މީހުން "ރާއްޖެއެމްވީ" އަށް މައުލޫމާތު ދެމުން ބުނީ އެކަކު އަނެކެއްގެ ގައިގައި ކަތިވަޅިން ޖަހަން މަސައްކަތްކުރިކަމަށެވެ. އަދި ސަރަހައްދު ކޮންޓްރޯލްކުރުމަށް ފުލުހުން ޕެޕަރސްޕްރޭވެސް ޖެހިކަމަށް މަންޒަރު ދުށް މީހުން ބުނެފައިވެއެވެ.
