ގެވެށި އަނިޔާ ހުއްޓުވުމުގެ ގާނޫނުގެ 4 ވަނަ މާއްދާގެ ހ ގައި ބަޔާންކޮށްފައިވާ ގޮތުގައި ގެވެށި އަނިޔާގެ އަމަލަކީ ގެވެށި ގުޅުމަކުން ގުޅިގެންވާ މީހުންގެ ތެރެއިން އެކަކު، އެގުޅުމުގައި ހިމެނޭ އަނެކާގެ ނުވަތަ އަނެކުންގެ މައްޗަށް ކުރިކަމަކުން، ގެވެށި އަނިޔާގެ ޝިކާރައަކަށްވީ މީހާގެ ރައްކާތެރިކަމަށް ނުވަތަ ސިއްހަތަށް ނުވަތަ ދުޅަހެޔޮ ކަމަށް ގެއްލުމެއް ލިބޭފަދަ ނުވަތަ އެފަދަ ގެއްލުމެއް ލިބިދާނެކަމުގެ ބިރު އިހްސާސްވާފަދަ އަމަލެއް ހިންގުމެވެ. ގެވެށި އަނިޔާގެ ތެރޭގައި ހިމެނޭ އަނިޔާގެ އަމަލުތަކަކީ ކޮބައިތޯ ސުވާލުކޮށްފިނަމަ އާންމުކޮށް މީހުން ދޭނެ ޖަވާބަކީ ޖިސްމާނީ އަނިޔާ، ޖިންސީ އަނިޔާ އަދި މުދަލަށް ގެއްލުންދިނުން ފަދަ އަމަލުތަކެވެ. ނަމަވެސް ގެވެށި އަނިޔާ ހުއްޓުވުމުގެ ގާނޫނުގައި ގެވެށި އަނިޔާގެ ގޮތުގައި 17 ބާވަތެއްގެ އަމަލެއް ބަޔާންކޮށްފައިވެއެވެ.

އެހެންކަމުން ގާނޫނުގައި ބަޔާންކޮށްފައިވާ ގެވެށި އަނިޔާގެ ބާވަތްތަކަށް އަހުލުވެރިވުމަކީ ގެވެށި އަނިޔާއާ ދެކޮޅަށް ކުރާ މަސައްކަތަށް ލިބިދޭނެ ބާރެކެވެ. އެގޮތުން ބަހުގެ ހަމަލާ ދިނުމާއި ނަފްސާނީ ގޮތުން އަނިޔާކުރުމަކީ ގާނޫނު ބުނާގޮތުން ގެވެށި އަނިޔާގެ ތެރޭގައި ހިމެނޭ ކަމަކަށްވާއިރު އެއީ ގެވެށި އަނިޔާގެ ގޮތުގައި އެއް ބަޔަކަށް ނުދެކުވުމަކީވެސް ވެދާނެކަމެކެވެ.

ބަހުގެ ހަމަލާ އަދި ނަފްސާނީ އަނިޔާ ކުރުމަކީ އަނިޔާ ކުރާ ފަރާތްތަކުން، އަނެކާގެ މައްޗަށް ބާރު އަދި ކޮންޓްރޯލު ފޯރުވުމުގެ ނިޔަތުގައި ބޭނުންކުރާ އުކުޅެކެވެ. މިއީ ވަކި ޖިންސަކަށް ނުވަތަ ވަކި ބާވަތެއްގެ ގެވެށި ގުޅުމަކަށް ހާއްސަ އަނިޔާއެއް ނޫންކަމަށްވާތީ، މިފަދަ އަނިޔާތައް ދެނެގަންނަން އެނގުމަކީ ކޮންމެހެންވެސް މުހިންމު ކަމެކެވެ. މިފަދަ އަނިޔާ ކުރާފަރާތްތަކުގެ މަގްސަދަކަށް ވެފައިވަނީ ތަފާތު އެކި އުކުޅުތައް ބޭނުން ކޮށްގެން އަނިޔާ ލިބޭ ފަރާތް ބަލިކަށިކޮށްލާ، އަމިއްލަ ނަފްސަށް އޮންނަ އިތުބާރުދަށްކޮށްލުމެވެ.

މީގެ ތެރޭގައި ހިމެނޭ ބައެއް ކަންކަމަކީ ހިތްހަމަނުޖެހޭ ނަންނަމުން މުޚާތަބުކޮށް ފުރައްސާރަކުރުމާއި މަލާމާތްކުރުމާއި ނަފްސާނީ ގޮތުން ބާރު ފޯރުވުމުވެ. މީގެއިތުރުން ނަފްސާނީ ގޮތުން ނުފޫޒު ފޯރުވައިގެން އަނިޔާ ލިބޭ ފަރާތުގެ އަމިއްލަ ހަމަބުއްދިއާމެދު ޝައްކުވާފަދަ ގޮތްތަކަށް އަމަލުތަކާއި ބަސް ބޭނުންކުރުމާއި އަނިޔާގެ އަމަލެއްކޮށްފާނެ ކަމުގެ ބިރު ދެއްކުންވެސް ފެތެނީ މިބާވަތުގެ އަނިޔާ އަށެވެ.

ބަހުގެ ހަމަލާ ދިނުމާއި ނަފްސާނީ ގޮތުން ކުރާ އަނިޔާ ލިބެމުންދާ ނިޝާންތަކުގެ ގޮތުގައި ފާހަގަކުރެވޭނީ ހާސްވުމުގެ ބަލި ފެނުމާއި ސިއްހީ ބައްޔަކަށްނުވެ ދިގު ދެމިގެންދާ ގޮތެއްގައި ސްޓްރެސްވުމުގެ އަލާމާތްތައް އިހުސާސްވެ ތަހައްމަލުކުރުމާއި ދިގުދެމިގެންދާ ބިރުވެރިކަމެއްގެ ތެރޭގައި ހުރުމެވެ. މީގެއިތުރުން އަމިއްލަ ނަފުސަށް ގެއްލުންދިނުމާއި އަމިއްލަ ނަފުސަށް އޮންނަ އިތުބާރު ކުޑަވުމާއި އެހެން މީހުންނަށް އިތުބާރު ކުރަން ފަސްޖެހުމަކީވެސް މިފަދަ އަނިޔާ ލިބެމުންދާކަމުގެ ނިޝާންތަކެވެ.

ގެވެށި އަނިޔާއަކީ އޭގެ ޒާތުގައި އެއަނިޔާ ތަހައްމަލުކުރާ ކޮންމެ މީހަކުވެސް ކޮންމެސް ވަރެއްގެ ނަފްސާނީ އަސަރުތަކެއް ކުރުވާކަމެކެވެ. ގިނަފަހަރަށް އަނިޔާ ލިބޭ މީހުން ނަފްސާނީ އަނިޔާއަކީ އާދައިގެ ކަމެއްގެ ގޮތުގައި ބަލައެވެ. ނަމަވެސް ގިނަދުވަސްވާވަރަކަށް ނަފްސާނީ ގޮތުން މީހާ ބަލިކަށިކޮށްލާ ދިރިއުޅުން މަތި ފޫހިވެ އެކަހެރި ދިރިއުޅުމެއް އުޅެން ފެށެއެވެ. އެހެންކަމުން މިފަދަ އަނިޔާތައް ލިބޭ މީހުން އަނިޔާއިން އަރައިގަތުމަށް މަސަައްކަތްކުރަން ޖެހެއެވެ. އަދި އެފަދަ އަނިޔާއެއް މީހަކު ތަހައްމަލުކުރާކަން ތިމާއަށް އެނގޭނަމަ އެކަމަކުން އެމީހަކު ސަލާމަތްކުރުމަށް ތިމާއަށް ކުރެވުނު ކޮންމެ ކަމެއްކޮށްދީ އެހީތެރިކަން ފޯރުކޮށްދޭންޖެހެއެވެ.

ސޯސް: ފެމިލީ ޕްރޮޓެކްޝަން އޮތޯރިޓީ