އެމްޑީޕީގެ ޕާލަމަންޓްރީ ގްރޫޕްގެ މަގާމުތަކަށް މެމްބަރުން އައްޔަނުކުރުމަށް އިންތިޚާބު ބާއްވާފައިވަނީ ފެބްރުއަރީ މަހުގެ 18 ވަނަ ދުވަހުއެވެ. އެއިންތިޚާބުގައި ވަނީ އެމްޑީޕީގެ ޕާލަމަންޓްރީ ގްރޫޕްގެ ލީޑަރުކަމަށް މެމްބަރަކު އިންތިޚާބުކޮށްފައެވެ. ޕީޖީ ލީޑަރުކަމަށް ވާދަކުރައްވާފައިވަނީ ޕީޖީ ގްރޫޕްގެ ލީޑަރުކަމުގައި އިންތިޚާބު ބޭއްވުމާ ހަމައަށް ހުންނެވި, މެދުހެންވޭރު ދާއިރާގެ މެމްބަރ އަލީ އާޒިމްއާއި ހިތަދޫ އުތުރު ދާއިރާގެ މެމްބަރ މުހައްމަދު އަސްލަމްއެވެ. 65 މެމްބަރުން ހިމެނޭ އެމްޑީޕީގެ ޕީޖީ ގްރޫޕްގައި އިންތިޚާބުން އަލީ އާޒިމްއަށް ލިބިވަޑައިގެންނެވީ 25 ވޯޓެވެ. ޕީޖީ ލީޑަރުކަމަށް އިންތިޚާބުވެވަޑައިގެންނެވި އަސްލަމްއަށް ލިބިވަޑައިގެންނެވީ 40 ވޯޓެވެ. ބޮޑު ތަފާތަކުން މިއިންތިޚާބު އަސްލަމު ކުރިހޯއްދެވިއިރު, 19 ވަނަ ރައްޔިތުންގެ މަޖިލީހުގައި ޕީޖީ ގްރޫޕްގެ ލީޑަރުކަން ކަނޑައެޅުމަށް އެންމެ ފުރަތަމަ ބޭއްވި އިންތިޚާބުގައި ވާދަކުރައްވާފައިވަނީ އާޒިމް އެކަންޏެވެ. އެފަހަރު ވޯޓުގައި ބައިވެރިވެވަޑައިގެންނެވި ހުރިހާ މެމްބަރުންގެ ވޯޓު އާޒިމަށް ލިބިވަޑައިގެންފައިވެއެވެ. އެއީ 57 ވޯޓެވެ.

ޕީޖީ ގްރޫޕްގެ އިންތިޚާބަށްފަހު ބޭއްވި ރައްޔިތުންގެ މަޖިލީހުގެ ފުރަތަމަ ޖަލްސާ މިވަނީ ހޯމަ ދުވަހު ބާއްވާފައެވެ. މިޖަލްސާގައި ވާހަކަދެއްކެވުމަށް ފުރުސަތު ހޯއްދެވުމަށްފަހު އާޒިމް ވަނީ, އިންތިޚާބު ކާމިޔާބުކުރެއްވި, ހިތަދޫ އުތުރު ދާއިރާގެ މެމްބަރ މުހައްމަދު އަސްލަމަށް މަރުހަބާ ވިދާޅުވެފައެވެ. އަދި ޕީޖީ ލީޑަރުކަމުގައި ހުންނަވައި ފާއިތުވި ދުވަސްތަކުގައި މުހިންމު ބިލްތަކެއްގެ މަސައްކަތްތަކެއް ކުރެވިފައިވާކަމަށް ވިދާޅުވިއެވެ. ފާއިތުވި ދުވަސްތަކުގައި އެމްޑީޕީ ޕީޖީ ގްރޫޕުން 79 ބައްދަލުވުމެއް ބާއްވާފައިވާކަމަށް އާޒިމް ވިދާޅުވިއެވެ.

ނަމަވެސް އެންމެފަހުން ޕީޖީން ބޭއްވި ބައްދަލުވުމުގައި ނިންމި އެއް ނިންމުމެއް ތަޅުމާ ހިސާބަށް އައިސްފައިނުވާކަން އާޒިމް ފާހަގަކުރެއްވިއެވެ. އާޒިމް ވިދާޅުވީ އެއީ ވަގުތުގެ ގޮތުންނާއި, އެކަމުގައި ބޮޑެތި ޚިޔާލު ތަފާތުވުންތަކެއް މެމްބަރުންގެ މެދުގައި ހުރުމުގެ ސަބަބުން ކަމަށެވެ. އެބިލަކީ ރާއްޖެއިން ބޭރުގެ ގައުމުތަކާއެކު ގާއިމުކޮށްފައިވާ ޚާރިޖީ ގުޅުންތަކަށް ނޭދެވޭ އަސަރު ކުރާނެ ފަދަ އަމަލުތައް ހުއްޓުވުމުގެ ބިލެވެ. އާޒިމް ވިދާޅުވީ މިބިލަށް, ސަރުކާރުގެ އެހީތެރިކަން ބޭނުންވާ މެމްބަރުން ގަބޫލުފުޅުނޫންކަމަށެވެ.

ހުށަހެޅިފައިވާ, ފެނާއި ނަރުދަމާގެ ގާނޫނުގެ އިސްލާހުގެ ބިލާ ގުޅޭގޮތުން ވާހަކަދައްކަވަމުން އާޒިމް ވިދާޅުވީ, ފެނާއި ނަރުދަމާއަކީ އަސާސީ ހައްގެއްކަމަށެވެ. ގާނޫނު އަސާސީން ރައްޔިތުންނަށް އެ ޚިދުމަތް ލިބެންޖެހޭކަން ފާހަގަކުރައްވައި އާޒިމް ވިދާޅުވީ, މިއަދާ ހަމައަށް އައިއިރު 4 ރައީސުންނަށް އެކަން ނުވިކަމަށާއި, ނަމަވެސް މިއަދުގެ ރައީސުލްޖުމްހޫރިއްޔާ މިވަނީ މިހައްގު ގާތްގަނޑަކަށް ރައްޔިތުންނަށް ކަށަވަރުކޮށްދެއްވާފައި ކަމަށެވެ. އެގޮތުން ހުރިހާ ރަށެއްގެ ފެނާއި ނަރުދަމާގެ ނިޒާމުގެ މަޝްރޫއުތަކުގައި ސޮއިކޮށް, އަމަލީ ގޮތުން މަސައްކަތް ގާތްގަނޑަކަށް ފެށިފައިވާކަމަށް ވިދާޅުވިއެވެ.

އެއަށްފަހު ދެން އާޒިމް ފެއްޓެވީ ބޯހިޔާވަހިކަމުގެ ވާހަކައެވެ. ގާނޫނު އަސާސީގައި ތަފާތުކުރުން ނޯންނަކަމަށް ވިދާޅުވެ, ބޯހިޔާވަހިކަމުގައި ފެންނަމުންދަނީ އަތޮޅުތަކާ މާލެއާ ދެމެދު ތަފާތުކުރުންތަކެއް ގެންގުޅެމުންދާތަން ކަމަށާއި, ހުރިހާ ސަރުކާރެއްގައިވެސް ކަންކުރަމުން އައީ އެގޮތަށް ކަމަށް އާޒިމް ވިދާޅުވިއެވެ.

އާޒިމް ވިދާޅުވީ މާލޭގެ ރައްޔިތުންނަށް ބޯހިޔާވަހިކަން ހޯއްދަވައިދެއްވާނެކަމަށް ރައީސް ކޮންމެ އަހަރެއްގެ ރިޔާސީ ބަޔާނުގައިވެސް ވިދާޅުވާކަމަށެވެ. ނަމަވެސް އަދި މިހާތަނަށް އެކަން ވެފައި ނުވާކަމަށެވެ.

އާޒިމް ވިދާޅުވީ ތަފާތުކުރުމެއް ނެތި ހުރިހާ ރައްޔިތުންނަށްވެސް އެއްގޮތަަކަށް ކަންކަން ކުރަންޖެހޭކަމަށެވެ.