އެފްއޭ ކަޕު ފައިނަލުގައި ސިޓީގެ މުހިންމު ހަތަރު ކުޅުންތެރިޔަކަށް ނުކުޅެވިދާނެ

އެފްއޭ ކަޕު ފައިނަލުގައި މެންޗެސްޓާ ސިޓީގެ މުހިންމު ހަތަރު ކުޅުންތެރިޔަކަށް އަނިޔާގެ ސަބަބުން ނުކުޅެވިދާނެކަމަށް އެ ޓީމުގެ ކޯޗު، ޕެޕް ގާޑިއޯލާ ބުނެފިއެވެ.

ފައިނަލް މެޗުގައި މެންޗެސްޓާ ޔުނައިޓެޑާ ދެކޮޅަށް ކުޅެވޭނެ ކަމުގެ ޔަގީންކަމެއް ނެތީ، ފަހަތަށް ކުޅޭ ރުބެން ޑިއަސް އާއި އަކަންޖީ އަދި ޖެކް ގްރީލިޝްގެ އިތުރުން ޓީމުގެ އެންމެ މުހިންމު ކުޅުންތެރިޔާ ޑިބްރައިނާއެވެ. މި ހަތަރު ކުޅުންތެރިންނަކީވެސް މި ސީޒަނުގައި ގިނަ މެޗުތަކު ފުރަތަމަ 11 ގައި ހިމަނާ ކުޅުންތެރިންނެވެ. ލީގު ފަހު މެޗުގައި ބްރެންޓްފޯޑް އަތުން 1-0 އިން ބަލިވިއިރުވެސް މި ހަތަރު ކުޅުންތެރިން ޓީމުގައި ހިމަނާފައެއް ނުވެއެވެ.

ވެމްބްލީ ސްޓޭޑިއަމްގައި ޔުނައިޓެޑާ ދެކޮޅަށް ކުޅޭ މެޗުގައި ސިޓީ ޓީމުން ގިނަ ބަދަލުތަކެއް ފެންނާނެކަމަށް ބެލެވެއެވެ. ޔުނައިޓެޑުންވެސް ވަނީ އަނިޔާގެ ސަބަބުން އެންތޮނީ އާއި މާޝިއަލްއަށް ނުކުޅެވޭ ވާހަކަ ބުނެފައެވެ.

މި ސީޒަނުގައި ލީގު ކާމިޔާބުކޮށްފައިވާ ސިޓީއަށް އަދި އިތުރު ދެ ތަށި ލިބުމުގެ ފުރުސަތު އެބައޮތެވެ. ކުރިޔަށް އޮތީ އެފްއޭ ކަޕު ފައިނަލާ ޗެމްޕިއަންސް ލީގު ފައިނަލެވެ.