ކޯޗުން ހޮވި އެންމެ މޮޅު ކޯޗަކަށް ގާޑިއޯލާ
31 މެއި 2023 | ބުދަ 02:33މިއީ ގާޑިއޯލާ މިއެވޯޑް ހޯދި ތިންވަނަ ފަހަރު
ސިޓީން ރެއާލާ ދެކޮޅަށް ކުޅުނު މެޗަށްފަހު ގާޑިއޯލާ
ލީގުގެ ކޯޗުންގެ އެންމެ މޮޅު ކޯޗަކަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ހޮވައިފިއެވެ.
"ސަރ އެލެކްސް ފަގަސަން" ޓްރޮފީ ދެނީ އިނގިރޭސި ހުރިހާ ޑިވިޝަންތަކެއްގެ ކޯޗުންގެ ވޯޓުން ހޮވާ އެންމެ މޮޅު ކޯޗަށެވެ. މިއީ މިމަޤާމަށް ގާޑިއޯލާ ހޮވި ތިންވަނަ ފަހަރެވެ. ޕްރިމިއަރ ލީގުގެ އެންމެ މޮޅު ކޯޗަކީވެސް 52 އަހަރުގެ ކޯޗު ގާޑިއޯލާއެވެ. ގާޑިއޯލާ ވަނީ ވިދިވިދިގެން ތިންވަނަ ފަހަރަށް މެންޗެސްޓަރ ސިޓީއަށް އިނގިރޭސި ޕްރިމިއަރ ލީގުގެ ޗެމްޕިއަންކަން ހޯދައިދީފައެވެ. މިއީ ހަ ސީޒަންގައި ސިޓީން ލީގު ހޯދި ފަސްވަނަ ފަހަރެވެ.
ގާޑިއޯލާ ވެފައިވަނީ ލީގުގެ ކޯޗުން ހޮވާ މޮޅު ކޯޗުގެ އެވޯޑް ތިންފަހަރަށް ވުރެ ގިނައިން ހޯދި ތިންވަނަ ކޯޗަށެވެ. އެވޯޑް އެންމެ ގިނައިން ހޯދީ މެންޗެސްޓަރ ޔުނައިޓެޑްގެ ކުރީގެ ކޯޗު ފަގަސަންއެވެ. ސީޒަންގައި ސިޓީއަށް އަދި މުހިއްމު ދެ މެޗު އެބައޮތެވެ. އެއީ ހޮނިހިރު ދުވަހު އެފްއޭކަޕް ފައިނަލްގައި މެންޗެސްޓަރ ޔުނައިޓެޑާ ވާދަކުރާ މެޗާއި, ޖޫން 10 ގައި އިންޓަރ މިލާނާ ދެކޮޅަށް ކުޅޭ ޗެމްޕިއަންސް ލީގު ފައިނަލެވެ.
