ފިރްމީނޯ ހޯދުމަށް ރެއާލުން މަޝްވަރާ ކުރަނީ

މި ސީޒަނަށްފަހު އިނގިރޭސި ޕްރިމިއާ ލީގުގެ ލިވަޕޫލް ދޫކޮށްލަން ނިންމާފައިވާ ރޮބާޓޯ ފިރްމީނޯ ހޯދުމަށް ސްޕެއިންގެ ރެއާލް މެޑްރިޑުން މަޝްވަރާކުރަމުން އަންނަ ކަމަށް މީޑިއާ ރިޕޯޓުތައް ބުނެފި އެވެ.

ފިރްމީނޯ ލިވަޕޫލާއެކު ހަދާފައިވާ އެއްބަސްވުމުގެ މުއްދަތު ހަމަވާނީ ޖޫން މަހުގެ ނިޔަލަށެވެ. އެ އެއްބަސްވުމުގެ މުއްދަތު ހަަމަވުމުން އެ ކުލަބު ދޫކޮށްލުމަށް އޭނާ ވަނީ ނިންމައިފަ އެވެ. އެހެންކަމުން އަންނަ ސީޒަނުގައި ފިރްމީނޯ ފެންނާނީ އެހެން ކުލަބަކުންނެވެ. ނަމަވެސް މިހާތަނަށް އޭނާ ބަދަލުވާނެ ސީދާ ވަކި ކުލަބެއް ހާމަކޮށްފައެއް ނުވެ އެވެ. ސްޕެއިންގެ މީޑިއާ ތަކުގައި ބުނެފައިވާ ގޮތުން ފިރްމީނޯ ހޯދުމަށް ރެއާލުން އަންނަނީ އެ ކުލަބުގެ އެތެރޭގައި މަޝްވަރާ ކުރަމުންނެވެ. ނަމަވެސް މިކަމާ ގުޅިގެން ފިރްމީނޯއާ ރަސްމީ ގޮތަކުން މިހާތަނަށް އެއްވެސް ވާހަކައެއް ދައްކާފައި ނުވާ ކަމަށް ވެސް ވަނީ ބުނެފަ އެވެ. ރެއާލުން އެ ކުލަބުގެ އެތެރޭގައި ފިރްމީނޯ ހޯދުމުގެ މަޝްވަރާތައް ކުރިއަށް ގެންދިޔަ ނަމަވެސް، މިވަގުތު އެންމެ ބޮޑު އިސްކަމެއް ދެނީ ޖޫޑް ބެލިންހަމް ހޯދުމަށް ކަމަށް ވަނީ ބުނެފަ އެވެ. ބޮރޫޝިއާ ޑޯޓްމަންޑު ދޫކޮށް، ބެލިންހަމް ރެއާލަށް ބަދަލުވުމުގެ ކަންކަން އޮތީ އެންމެ ފަހު މަރުހަލާގައި އެވެ.

އެއަށްފަހު ރެއާލުން އަންނަ ސީޒަަނަށް ހޯދަން ބޭނުންވާ ހަތަރެއް ނުވަތަ ފަަސް ސްޓައިކަރުންގެ ތެރޭގައި ފިރްމީނޯ ހިމެނޭ ކަމަށް ބުނެފައިވެ އެވެ. ފިރްމީނޯގެ އިތުރުން ބައެއް އެހެން ކުޅުންތެރިން ވެސް އެ ލިސްޓުގައި ހިމެނޭ ކަމަށް ރިޕޯޓުތައް ބުނެ އެވެ. ރެއާލުން އަންނަ ސީޒަނަށް އެ ޓީމުގެ ސްކޮޑު ވަރުގަދަ ކުރުމަށް އައު ކުޅުންތެރިން ހޯދުމަށް ކުރިއަށް އޮތް ޓްރާންސްފާ މާކެޓުގައި މަސައްކަތް ކުރާނެ ކަމަށް ބުނެފައިވެ އެވެ.

ފިރްމީނޯ ވަނީ ލިވަޕޫލަށް ކުޅެދިން 362 މެޗުގައި 111 ލަނޑު ޖަހައިފަ އެވެ. ނަމަވެސް މި ސީޒަނުގައި އަނިޔާގެ ސަބަބުން އޭނާ އަށް ވަނީ ގިނަ މެޗުތައް ގެއްލިފަ އެވެ. މި ސީޒަނުގައި ލިވަޕޫލަށް ކުޅެދިން 35 މެޗުގައި އޭނާ ވަނީ 13 ލަނޑު ޖަހައިފަ އެވެ. ފިރްމީނޯ ވަނީ ލިވަޕޫލާއެކު ކުލަބު ފުޓުބޯޅައިގެ ހުރިހާ ކާމިޔާބީތަކެއް ހޯދައިފަ އެވެ. އޭނާ ވަނީ އެ ޓީމާއެކު ހަތް ތަށި ކާމިޔާބުކޮށްފަ އެވެ.