ސިޔާސީގޮތުން ބަލިވުމުން ސިމްޕަތީ ކާޑު ކުޅުމަކީ ފެއިލްވެފައިވާ އުކުޅެއް: އަލީ ޒާހިރު
މިއީ ރައްޔިތުންނަށް ފަރިތަ، ފެއިލްވެފައިވާ އުކުޅަކަށް ނޫނީ ނުވާނެ
އަލީ ޒާހިރު
ސިޔާސީ ގޮތުން ބަލިވުމުން ސިމްޕަތީ ކާޑު ކުޅުމަކީ މިހާރު ފެއިލްވެފައިވާ އުކުޅެއް ކަމަށް ރައީސް އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވެއްޖެއެވެ.
ބުދަ ދުވަހު ކުރެއްވި ޓްވީޓެއްގައި އަލީ ޒާހިރު ވިދާޅުވީ ސިޔާސީ ގޮތުން ބަލިވެ، ބާކީވާ ކޮންމެ ފަހަރަކު ސަޕޯޓަރުންނަށް އޮޅުވާލަން ސިމްޕަތީ ކާޑު ކުޅެ، ސަރުކާރުގެ ބޮލުގައި ދޮގު ތުހުމަތު އެޅުވުމަކީ ބައެއް ސިޔާސީ ބޭފުޅުންގެ ސަގާފަތަކަށް ވެފައިވާ ކަމެއް ކަމަށެވެ. އެހެންކަމުން އެކަމަކީ ރައްޔިތުންނަށް ފަރިތަ، ފެއިލްވެފައިވާ އުކުޅަކަށް ނޫނީ ނުވާނެ ކަމަށް ވެސް އޭނާގެ ޓްވީޓުގައި ވަނީ ވިދާޅުވެފައެވެ.
އަލީ ޒާހިރުގެ ޓްވީޓުގައި ވަކި ބޭފުޅެއްގެ ނަމެއް ހާމަކޮށްފައެއް ނުވެއެވެ. ނަމަވެސް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރިޔާސީ ޕްރައިމަރީން ލިބިވަޑައިގެންނެވި ނާކާމިޔާބީއާއެކު ކުރީގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު އާއި އެމަނިކުފާނަށް ތާއީދު ކުރައްވާ ބައެއް ބޭފުޅުން ގެންދަވަނީ ސަރުކާރަށް ވަރަށް ބޮޑަށް ފާޑު ވިދާޅުވަމުންނެވެ. އަދި ނަޝީދަށް އަމާޒުކޮށްގެން 6 މެއިގައި ދިން ހަމަލާއާ ގުޅިގެން ވެސް ސަރުކާރަށް އެތައް ތުހުމަތުތަކެއް އެފަރާތްތަކުން ދަނީ ކުރަމުންނެވެ.
ކުރީގެ ރައީސް ނަޝީދަށް ތާއީދު ކުރައްވާ ބައެެއް ބޭފުޅުން ވަނީ އެމްޑީޕީން ވަކިވެ، އައު ޕާޓީއެއް އުފެއްދުމުގެ މަސައްކަތް ވެސް ފަށައިފައެވެ. "ދި ޑިމޮކްރެޓްސް" ގެ ނަމުގައި ޕާޓީއެއް އުފެއްދުމަށް މިހާރު ވަނީ އިލެކްޝަން ކޮމިޝަނަށް ވެސް ހުށަހަޅައިފައެވެ. ނަމަވެސް ނަޝީދު އަދިވެސް ހުންނެވީ އެމްޑީޕީގެ ރައީސްގެ މަގާމުގައެވެ.
