ވެށިފަހި ފްލެޓްތައް މަރާމާތުކުރުމުގެ ފުރަތަމަ ފިޔަވަހީގެ މަސައްކަތްތައް ނިންމާލައިފި

ހުޅުމާލޭގެ ފޭސް އެކެއްގައި ތަރައްގީ ކޮށްފައިވާ ވެށިފަހި ފްލެޓްތަކުގެ މަރާމާތު ކުރުމުގެ ފުރަތަމަ ފިޔަވަހީގެ މަސައްކަތް ނިމިފައިވާ ކަމަށް އަރބަންކޯއިން ބުނެފިއެވެ.

އެ ކުންފުނިން ބުނީ ހުޅުމާލޭގެ 1000 (ވެށިފަހި މާލެ) ފުލެޓު މަޝްރޫއުގެ ދަށުން ތަރައްގީ ކޮށްފައިވާ ފުލެޓު ނަންބަރު 83 އިން 112 އާ އެއްމެދު އިމާރާތްތަކުގެ ބޭރުފާރު ކުލަ އައުކުރުމުގެ މަސައްކަތް މިދިޔަ އަހަރުގެ އޮކްޓޯބަރު މަހުން ފެށިގެން ކުރަމުން އަންނަ ކަމަށެވެ. އެގޮތުން މި މަސައްކަތުގެ ދަށުން އިމާރާތުގެ ބޭރު ފާރާއި ފްލެޓުތަކުގެ ބެލްކަނީގެ އެތެރެފާރުތަކުގައި ކުލަ ލާފައިވާއިރު އެ ފްލެޓުތަކުގައި ހުރި ރެނދު ބެއްދުމުގެ މަސައްކަތް ވެސް ވަނީ ކޮށްފައެވެ.

ފުރަތަމަ ފިޔަވަހީގެ ދަށުން 504 ޔުނިޓު ހިމެނޭ 30 އިމާރާތެއްގެ މަސައްކަތް ކޮށްފައިވާއިރު ދެވަނަ ފިޔަވަހީގެ ދަށުން ބާކީ ހުރި ފްލެޓުތަކުގެ މަސައްކަތް ފަށަން ތައްޔާރުވެފައިވާ ކަަމަށް ވެސް އަރބަންކޯއިން ބުންޏެވެ. އެގޮތުން، ދެވަނަ ފިޔަވަހީގެ ދަށުން ކުރާނީ 113 އިން 138 އެއްމެދު ފްލެޓުތަކުގެ މަސައްކަތެވެ. އެ ކުންފުނިން ބުނީ ކޮންމެ އިމާރާތެއްގެ މަސައްކަތް ފެށުމުގެ ކުރިން އެ އިމާރާތުގައި ދިރިއުޅޭ މީހުންނަށް ދުރާލާ ނޯޓިސް ދެވޭނެ ކަމަށެވެ.

އަރބަންކޯއިން ބުނީ މަސައްކަތް ކުރުމަށް ހަމަޖެހިފައިވާ ފުލެޓުތަކުން އެ ފުލެޓުތަކުގެ ބެލްކަނީގެ ފާރުގައި ކުލަލުމަށް މަސައްކަތްތެރިންނަށް މަގުފަހިކޮށްދިނުމަކީ އެ ފުލެޓެއްގެ ވެރިފަރާތުގެ ޒިންމާއެއް ކަމަށެވެ. އަދި ފާރުގައި ކުލަ ލުމަށް ސިޑި ފަދަ ތަކެތި ބޭނުން ކުރުމަށް ހަމޖެހިފައިވާއިރު އިމާރާތުގެ ބޭރުގައި ބަހައްޓާފައި ހުންނަނ ގަސްމުއްޓާއި ހަރާއި ފެންސާއި ގަހާއި އާއްމު ބައިތަކުގައި ބަހައްޓާފައި ހުންނަ ތަކެތި އެއްކައިރި ކުރުމަކީ ވެރިފަރާތުގެ ޒިންމާއެއް ކަމަށް ވެސް އެ ކުންފުނިން ވަނީ ބުނެފައެވެ.