ޔޫރޮޕާ ކޮންފަރެންސް ލީގު ފައިނަލަށް ވެސްޓް ހޭމް އާއި ފިއޮރެންޓީނާ ދަތުރުކޮށްފިއެވެ.

ވެސްޓް ހޭމް ފައިނަލަށް ދަތުރުކުރީ ސެމީ ގައި އޭޒެޑް އަލްކްމާ ކައިރިން ދެ ލެގުންވެސް މޮޅުވެގެނެވެ. ދެ ޓީމު ބައްދަލުކުރި ފުރަތަމަ މެޗު 2-1 ން ވެސްޓް ހޭމް މޮޅުވި އިރު، ބުރާސްފަތި ދުވަހުގެ ރޭގައި ކުޅުނު މެޗުން މޮޅުވީ 1-0 ގެ ނަތީޖާއަކުންނެވެ. މެޗުގެ ހަމައެކަނި ލަނޑު 94 ވަނަ މިނެޓުގައި ވެސްޓް ހޭމް އަށް ކާމިޔާބުކޮށްދިނީ ޕަބްލޯ ފޯނަލްސްއެވެ. މިއާ އެކު ވެސްޓް ހޭމް ވަނީ 3-1 ގެ އެގްރީގޭޓް ނަތީޖާއަކުން މޮޅުވެފައެވެ.

1980 ވަނަ އަހަރު އެފްއޭ ކަޕު ނެގިފަހުން ވެސްޓް ހޭމް އަށް ތައްޓެއް ލިބިފައެއް ނުވެއެވެ. އަދި ޔޫރަޕުގެ ފައިނަލެއްގައި އެންމެ ފަހުން ކުޅެފައިވަނީ 1976 ވަނަ އަހަރުއެވެ.

މުބާރާތުގެ ފައިނަލަށް ފިއޮރެންޓީނާ ދަތުރުކުރީ 4-3 ގެ އެގްރިގޭޓް ނަތީޖާއަކުން ބާސެލް މައްޗަށް ކުރިހޯދައިގެނެވެ. ފުރަތަމަ ލެގުގައި 2-1 ން ބާސެލް މޮޅުވެފައިވީނަމަވެސް، ދެވަނަ ލެގުގެ 90 މިނެޓް ހަމަވީ 2-1 ން ފިއޮރެންޓީނާ މޮޅުކޮށް އޮވެގެނެވެ. އެގްރިގޭޓް އެއްވަރުވުމުން އިތުރު ވަގުތު ކުޅެ، ފިއޮރެންޓީނާ މޮޅުވެފައިވަނީ 129 ވަނަ މިނެޓުގައި އެންޓޮނިން ބަރަކް ކާމިޔާބުކުރި ލަނޑުންނެވެ.

ޔުއެފާ ޔޫރޮޕާ ކޮންފަރެންސް ލީގަކީ 2021 ވަނަ އަހަރު ފެށި މުބާރަތެކެވެ. މި މުބާރާތުގެ ފުރަތަމަ ތަށި ކާމިޔާބުކުރީ ރޯމާ އިންނެވެ.