ބަންޑާރަ ނާއިބު އަލްއުސްތާޛު އިބްރާހީމް ރިފްއަތުގެ އިތުބާރު ނެތްކަމަށް ހުށަހެޅި މައްސަލަ ހުށަހެޅީ 13 މެންބަރުން ސޮޔާއެކު ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ބުރާސްފަތި ދުވަހު ބޭއްވި މަޖިލީހުގެ ޖަލްސާގައި ނަޝީދު ވިދާޅުވީ އެ މައްސަލައާ ގުޅިގެން ރައްޔިތުންގެ މަޖިލީހުގެ ޤާނޫނާއި ޤަވާއިދުތަކާއި އެއްގޮތަށް ބަހުސްކުރަން ފެށުމުގެ ކުރިން ދިނުމަށް ކަނޑައަޅާފައިވާ 14 ދުވަހުގެ ނޯޓިސް މި މަހުގެ 16 ވަނަ ދުވަހު ރިފްއަތު އަށް ފޮނުއްވާފައިވާ ކަމަށެވެ. އެހެންކަމުން އެ މައްސަލަ މަޖިލީހުގައި ކުރިއަށް ދާނެ ކަމަށާއި އެ މަސައްކަތް ތާވަލްކުރާނެ ދުވަހެއް ފަހުން އަންގަވާނެކަމަށް ވެސް ނަޝީދު ވަނީ ވިދާޅުވެފައެވެ.
ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 101 ވަނަ މާއްދާގެ (ހ) އާއި ރައްޔިތުންގެ މަޖިލީހުގެ ގަވާއިދުގެ 207 ވަނަ މާއްދާގެ (ހ) ގެ ދަށުން ހުށަހަޅުއްވާފައިވާ އެ މައްސަލަ ހުށަހަޅާފައި ވަނީ 11 މޭއި 2023ގައެވެ.
އެ މައްސަލަ ހުށަހެޅުމަށް ސޮއިކުރެއްވި މެންބަރުންގެ ތެރޭގައި ހިމެނެނީ
1. އޭދަފުށީ ދާއިރާގެ މެންބަރު، އަހުމަދު ސަލީމް
2. މަޑުއްވަރީ ދާއިރާގެ މެންބަރު، އާދަމް ޝަރީފް އުމަރު
3. މަހިބަދޫ ދާއިރާގެ މެންބަރު އަހުމަދު ތޯރިގު
4. މާވަށު ދާއިރާގެ މެންބަރު މުހައްމަދު ސައީދު
5. މެދު ހެންވޭރު ދާއިރާގެ މެންބަރު އަލީ އާޒިމް
6. ކެންދޫ ދާއިރާގެ މެންބަރު އަލީ ހުސެއިން
7. ނައިފަރު ދާއިރާގެ މެންބަރު އަހުމަދު ޝިޔާމް
8. ތ.ގުރައިދޫ ދާއިރާގެ މެންބަރު މުހައްމަދު ޣައްސާން މަޢުމޫން
9. ދަނގެތި ދާއިރާގެ މެންބަރު މުހައްމަދު ނާޒިމް
10. ތިމަރަފުށީ ދާއިރާގެ މެންބަރު އަބްދުﷲ ރިޔާޒް
11. ވިލިމާލެ ދާއިރާގެ މެންބަރު އަހުމަދު އުޝާމް
12. ފެލިދޫ ދާއިރާގެ މެންބަރު ފަޒުލް ރަޝީދު
13. ފަރެސްމާތޮޑާ ދާއިރާގެ މެންބަރު ހުސެއިން މުހައްމަދު ލަތީފް
ބަންޑާރަ ނާއިބުގެ އިތުބާރު ނެތް ކަމަށް ހުށަހަޅާފައި ވަނީ ރާއްޖެއާއި މޮރިޝަސް ދެމެދު އޮތް ފުށުއަރާ ސަރަހައްދު ވަކިކުރުމުގައި އެމަނިކުފާނު މަސައްކަތްކުރެއްވީ ދިވެހިންގެ މަސްލަހަތާ ޚިލާފަށް ކަމަށް ބުނެއެވެ.
އިދިކޮޅުން މި މައްސަލަ ހުށަހެޅުމުން ވެރިކަން ކުރާ މައި ޕާޓީ އެމްޑީޕީން ވަނީ މިކަން ކުށްވެރިކޮށްފައެވެ.
އެ ޕާޓީން ބުނީ ޗާގޮސް މައްސަލައިގައި ބަންޑާރަ ނާއިބު ވަކާލާތުކުރައްވާފައި ވަނީ ރާއްޖޭގެ އެންމެ މަތީ މަސްލަހަތަށް އިސްކަން ދެއްވައިގެން ކަމަށާއި އެމަނިކުފާނު ދިވެހި ދައުލަތުގެ ހައްގުގައި ކުރެއްވީ އިހްލާސްތެރި އަދި ކާމިޔާބީ ހާސިލްވި މަސައްކަތެއް ކަމަށެވެ.
