މީގެ ފަހުން ޕޯލްޓްރީ ދޫންޏާއި ލައިވްސްޓޮކް އިމްޕޯޓް ކުރެވޭނީ ރަޖިސްޓްރީކޮށްފައިވާ ފާމުތަކަށް
16 މެއި 2023 | އަންގާރަ 13:21ގެތަކުގައި އޮސްޓްރިޗް ގެންގުޅޭ ކަމުގެ މައުލޫމާތު ލިބޭ ކަމަށް މިނިސްޓްރީން ބުނި
އޮޅުކޮށްގެން މާލޭގެ ގެއެއްގައި ގެންގުޅޭ އޮސްޓްރިޗެއް
މީގެ ފަހުން ޒިރާއީ ބޭނުންތަކަށް ޕޯލްޓްރީ ދޫންޏާއި ލައިވްސްޓޮކް އިމްޕޯޓް ކުރެވޭނީ ރަޖިސްޓްރީކޮށްފައިވާ ފާމުތަކަށް އެކަނި ކަމަށް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އިން ބުނެފިއެވެ.
އެ މިނިސްޓްރީން މިގޮތަށް ނިންމީ މާލޭގެ ގެެއެއްގައި ޕޯލްޓްރީ ދޫނީގެ ބާވަތެއް ކަމަށްވާ، އޮސްޓްރިޗް (ގިނިކާދޫނި) އެއް އޮޅުކުރި ޖަނަވާރެއްގެ ގޮތުގައި ގެންގުޅޭ ވާހަކަ ސޯޝަލްމީޑިއާގައި ދައުރުވަމުންދިއުމާ ގުޅިގެން ނެރުނު ބަޔާނެއްގައެވެ. އެ ބަޔާނުގައި އެ މިނިސްޓްރީން ބުނީ ޕޯލްޓްރީ ފާމުތަކުގައި ގެންގުޅުމަށް އެފަދަ ދޫނި އެތެރެ ކުރުމަށް ދޭ ހުއްދައިގެ ދަށުން ގިނިކާދޫނި ފަދަ ބޮޑެތި ދޫނިތައް އެތެރެކޮށް އޭގެ ދިރޭ ދޫނި ވިއްކަމުންދާތީ އެފަދަ ދޫނި ގަނެގެން ބައެއް ފަރާތްތަކުން ޕެޓެއްގެ ގޮތުގައި ޣޭގޭގައި ގެންގުޅޭ ކަމުގެ ޝަކުވާ ލިބޭ ކަމަށެވެ.
ފިޝަރީޒް މިނިސްޓްރީން ބުނީ މިފަދަ ޕޯލްޓްރީ ދޫނިތައް އެތެރެ ކުރުމަށް ހުއްދަ ދެނީ އެފަދަ ދޫނިތައް ގެންގުޅުމަށް މިނިސްޓްރީން ކަނޑައަޅާފައިވާ މިންގަނޑުތަކަށް ފެތޭ ޕޯލްޓްރީ ފާމުތަކުގައި ގެންގުޅުމަށް ކަމަށެވެ. މި މިންގަނޑުތައް ބިނާވެފައިވަނީ ޖަނަވާރު ގެންގުޅުމުގައި ބައިނަލްއަގުވާމީ ގޮތުން އަމަލު ކުރާ ދުޅަހެޔޮ މިންގަނޑުތަކާއި އެނިމަލް ވެލްފެއަރ އާއި ބަޔޯ ސެކިއުރިޓީ މިންގަނޑުތަކުގެ މައްޗަށް ކަމަށް ވެސް އެ މިނިސްޓްރީން ބުންޏެވެ. އެހެންމަުން އާއްމުންގެ ސަލާމަތާއި ރައްކާތެރިކަމަށްޓަކައި އެޅޭ ރައްކާތެރިކަމުގެ ފިޔަވަޅެއްގެ ގޮތުގައި އެފަދަ ދޫނި ގެންގުޅެން ޖެހޭނީ އާއްމުން ދުރިއުޅޭ ގެތަކާ އެކަހެރިކޮށް ފާމުތަކުގައި ކަމަށް ވެސް އެ މިނިސްޓްރީން ބުންޏެވެ.
މީގެ އިތުރުން އެ މިނިސްޓްރީން ވަނީ މިފަދަ ޖަނަވާރުތައް ރާއްޖެއަށް އެތެރެ ކުރާ ފަރާތްތަކުން ކަނޑައެޅިފައިވާ މިންގަނޑުތަކާ އެއްގޮތަށް އެތަކެތި ގެންގުޅުމަށް އިލްތިމާސްކޮށްފައެވެ.
މީގެ އިތުރުން އަންގާރަ ދުވަހުން ފެށިގެން އަޅާ ފިޔަވަޅެއްގެ ގޮތުން ދެން ޒިރާއީ ބޭނުންތަކަށް ޖަނަވާރު އެތެރެ ކުރުމަށް ހުއްދަ ދޭނީ އެފަދަ ތަކެތި ގެންގުޅެވޭނެ ފާމެއް އެ މިިނިސްޓްރީގައި ރަޖިސްޓްރީކޮށްފައިވާ ފަރާތްތަކަށް އެކަނި ކަމަށް ފިޝަރީޒް މިނިސްޓްރީން ބުންޏެވެ.
