ސްޓޫޑަންޓް ލޯނަށް ބިލިއަނަކަށްވުރެ ގިނަ ރުފިޔާ ޚަރަދުކުރެވިއްޖެ: ރައީސް

ސްޓޫޑެންޓް ލޯނު ސްކީމަށް މި ސަރުކާރުން ގެނައި ބަދަލުތަކުގެ ދަށުން، ލޯނު އެހީގެ ގޮތުގައި މިހާތަނަށް ބިލިއަނަކަށްވުރެ ގިނަ ރުފިޔާ ދައުލަތުގެ ބަޖެޓުން ޚަރަދު ކުރެވިފައިވާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ، ރައީސުލްޖުމްހޫރިއްޔާގެ ޚާއްޞަ ސްކޮލަރޝިޕާއި ހައި އެޗީވަރސް ސްކޮލަރޝިޕް ޙަވާލުކުރުމުގެ ޖަލްސާ ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.

ލޯނު އެހީގެ ދަށުން މަތީ ތަޢުލީމާއި ތަމްރީނު ހޯދުމުގެ ފުރުސަތުތައް ކުރިއާ އަޅައި ބަލާއިރު މިހާރު ވަރަށް ބޮޑުތަން ވަނީ އިތުރުކުރެވިފައިވާކަން ފާހަގަކުރައްވައި ރައީސް ވިދާޅުވީ، މަތީ ތަޢުލީމާއި ތަމްރީނުގެ ލޯނަށް ކުރިމަތިލުމުގެ ފުރުސަތު 2019 ވަނަ އަހަރުން ފެށިގެން މިހާތަނަށް 6 ފަހަރަކު ހުޅުވައިލެވިފައިވާކަމަށެވެ. އަދި 1،986 ދަރިވަރަކަށް ލޯނު އެހީ ދެވިފައިވާކަމަށް ރައީސް ވިދާޅުވިއެވެ.

މި 1986 ދަރިވަރުންގެ ތެރެއިން ބައެއް ދަރިވަރުންގެ ކިޔެވުން މިހާރު ނިމިފައިވާކަމަށާއި، އަދި މިހާރުވެސް 831 ދަރިވަރުން އެކި ޕްރޮގްރާމްތައް ފުރިހަމަކުރަމުންދާ ކަމަށް ރައީސް ވިދާޅުވިއެވެ. އަދި ބައެއް ދަރިވަރުން ތިބީ ކިޔެވުން ފަށަންވެފައިކަން ރައީސް ފާހަގަކުރެއްވިއެވެ.

މީގެ އިތުރުން މިއަހަރު ހުޅުވައި 720 ފުރުސަތަށްވެސް 1،507 ދަރިވަރުން ކުރިމަތިލާފައިވާކަމަށާއި، މި ހުށަހެޅުންތައް ވަޒަންކުރުމުގެ މަސައްކަތް މިހާރު ކުރިއަށްދާކަމަށް ރައީސް ވިދާޅުވިއެވެ.

މަތީ ތަޢުލީމާއި ތަމްރީނު ހޯދައިދިނުމަށް، ސަރުކާރުން ދޭ އެހީތަކަކީ، ދައުލަތުން ކުރާ ޚަރަދުތަކެއްގެ ގޮތުގައި ދެކިވަޑައިނުގަންނަވާ ކަމަށް ރައީސް ވިދާޅުވިއެވެ. އެއީ އޭގެ އަންދާޒާ މުޤާބިލު ބޮޑު، އަދި ވަރަށް ދުރު ރާސްތާއަކަށް އަމާޒުކޮށް، ދައުލަތުން ޤާއިމުކުރާ ވަރަށް އަގު ބޮޑު އިންވެސްޓްމެންޓެއް ކަމަށް އެމަނިކުފާނު ވިދާޅުވިއެވެ. އެއީ އޭގެ ހެޔޮ ނަތީޖާ، އެތައް އަހަރަކަށް ލިބެމުންދާނެ، ވަރަށް އަގުހުރި މަސައްކަތެއް ކަމަށް ރައީސް ވިދާޅުވިއެވެ.