ޗާގޮސް މައްސަލާގައި ބާރ ކައުންސިލުގެ ރައުޔު ހާމަކުރުމަށް މައްސަލަ ދިރާސާކުރަނީ
15 މެއި 2023 | ހޯމަ 16:24މި މައްސަލަ ދިރާސާކުރުމަށް ބާރ ކައުންސިލުގެ ލޯ ރިފޯމް އެންޑް ރިސާޗު ކޮމިޓީއަށް ފޮނުވުމަށް، ދިވެހިރާއްޖޭގެ ބާރ ކައުންސިލުުގެ އެގްޒެކެޓިވް ކޮމިޓީން ވަނީ ނިންމާފައި
ބާރ ކައުންސިލް
ޗާގޮސް މައްސަލާގައި ބާރ ކައުންސިލްގެ ރައުޔު ހާމަކުރުމަށް ދިރާސާކުރަން އެ ކައުންސިލުން ނިންމައިފިއެވެ.
މިކަމާގުޅިގެން ބާރ ކައުންސިލުން ނެރުނު ނޫސްބަޔާނުގައި ވަނީ، މިއީ ގައުމީ މައްސަލައަކަށް ވާތީ، އާންމު މަސްލަހަތާ ގުޅުންހުރި ގާނޫނީ ނުވަތަ ދުސްތޫރީ މައްސަލަތަކާއި ކަންތައްތަކާ ގުޅިގެން ރައުޔާއި މައުލޫމާތު ހާމަކުރުމަކީ ރާއްޖޭގެ ފަންނީ ގާނޫނުގެ ދަށުން އެ ކައުންސިލާ ހަވާލުކޮށްފައިވާ މަސްއޫލިއްޔަތެއް ކަމަށެވެ.
ޗާގޮސް މައްސަލާގައި ބާރ ކައުންސިލުގެ ރައުޔު ހާމަކޮށްދިނުމަށް އެދި އެ ކައުންސިލުގެ މެމްބަރަކު މައްސަލައެއް ހުށަހަޅާފައިވާކަމަށާއި އެ މައްސަލަ އެ ކައުންސިލުގެ އެގްޒެކެޓިވް ކޮމެޓީން ބަލައިގަތުމަށް ނިންމާފައިވާކަމަށް ނޫސްބަޔާނުގައި ބުނެފައިވެއެވެ.
މި މައްސަލަ ދިރާސާކުރުމަށް ބާރ ކައުންސިލުގެ ލޯ ރިފޯމް އެންޑް ރިސަރޗް ކޮމިޓީއަށް ފޮނުވުމަށް ދިވެހިރާއްޖޭގެ ބާރ ކައުންސިލުުގެ އެގްޒެކެޓިވް ކޮމިޓީން ވަނީ ނިންމާފައިކަމަށް ބަޔާނުގައި ބުނެފައިވެއެވެ.
ރާއްޖެއާއި މޮރިޝަސްގެ ކަނޑުގެ ސަރަހައްދުން ފުށުއަރާ ސަރަހައްދުގެ އިން ވަކިކުރުމުގެ މައްސަލާގައި އިޓްލޮސްއިން ނިންމާފައިވަނީ ރާއްޖޭން ފާހަގަކުރި ނުކުތާތަކަށް ތާއީދުކޮށް، ރާއްޖެއަށް ފައިދާވާގޮތަށެވެ. އަދި އިޓްލޮސްގެ ނިންމުމާ ގުޅިގެން، ފުށުއަރާ ސަރަހައްދުން ރާއްޖެއަށް 47232 އަކަކިލޯމީޓަރުގެ ސަރަހައްދެއް ވަނީ ލިބިފައެވެ.
މިމައްސަލާގައި ސަރުކާރަށް ވަރަށް ބޮޑެތި ފާޑުކިޔުންތައް އިދިކޮޅުގެ ފަރާތްތަކުން އަމާޒުކޮށްފައިވާއިރު، މިމައްސަލައާ ގުޅުވައިގެން އެކި ހަރަކާތްތައްވެސް އަންނަނީ އިދިކޮޅުން ބާއްވަމުންނެވެ.
