ބަޔާނާއި ޑޯޓްމަންޑަށް ވެސް ބޮޑު މޮޅެއް، ލީގުގެ ވާދަވެރިކަން ބޮޑު

ޖަރުމަނު ލީގުގައި ބަޔާން މިއުނިކާއި ބޮރޫޝިއާ ޑޯޓްމަންޑު ކުޅުނު މެޗުން ދެ ޓީމު ވެސް މޮޅުވެ، ލީގުގެ ވާދަވެރިކަން ބޮޑުވެއްޖެ އެވެ.

ބަޔާންގެ އަމިއްލަ ދަނޑުގައި ޝާލްކާއާ ދެކޮޅަށް ކުޅުނު މެޗު އެ ޓީމުން ކާމިޔާބުކުރީ 6-0 ގެ ބޮޑު ތަފާތަކުންނެވެ. މެޗުގެ ފުރަތަމަ ހާފުގައި ބަޔާނުން ދެ ލަނޑު ޖެހިއިރު، އަނެއް ހަތަރު ލަނޑު ވެސް ފެނުނީ ދެ ވަނަ ހާފުގަ އެވެ. ފުރަތަމަ ހާފުގެ 21 ވަނަ މިނެޓުގައި ލެރޯއީ ސާނޭ ތަނަވަސްކޮށްދިން ފުރުސަތެއްގައި ބަޔާނަށް ލީޑު ނަގައިދިނީ ތޯމަސް މުލާ އެވެ. އޭގެ އަށް މިނެޓު ފަހުން ލިބުނު ޕެނަލްޓީއަކުން ލީޑު ފުޅާކޮށްދިނީ ޔޯސުއާ ކިމިކް އެވެ. ދެ ވަނަ ހާފު ފަށައިގެން ފަސް ވަނަ މިނެޓުގައި ބަޔާންގެ ތިން ވަނަ ލަނޑު ޖެހީ ސާޖް ގްނަބްރީ އެވެ. އެއީ ޔާއޯ ކަންސޭލޯ ތަނަވަސްކޮށްދިން ފުރުސަތެއްގަ އެވެ. އޭގެ ފަސް މިނެޓު ފަހުން ގްނަބްރީ ވަނީ އެ ޓީމުގެ ހަތަރު ވަނަ ލަނޑު ޖަހައިފަ އެވެ. ބަޔާންގެ ފަސް ވަނަ ލަނޑު ޖެހީ މަތީސް ޓެލް އެވެ. އަދި ފަހު ލަނޑު ޖެހީ ނުސައިރު މަޒްރައޮއީ އެވެ.

ޑޯޓްމަންޑުން އަމިއްލަ ދަނޑުގައި ބޮރޫޝިއާ މުންޗެންގްލަޑްބެކްއާ ދެކޮޅަށް ކުޅުނު މެޗު ކާމިޔާބުކުރީ 5-2 އިންނެވެ. ޑޯޓްމަންޑުން ފުރަތަމަ ހާފު ނިންމާލީ ވެސް ހަތަރު ލަނޑުގެ ލީޑަކުންނެވެ. އެއީ ޑޮންޔެލް މާލެން، ޖޫޑް ބެލިންހަމް، ސަބެސްޓިއަން އަލެއާ ޖެހި ލަނޑުންނެވެ. ބެލިންހަމް ލަނޑު ޖެހީ ލިބުނު ޕެނަލްޓީއަކުންނެވެ. އަލެއާ ވަނީ ދެ ލަނޑު ޖަހައިފަ އެވެ. ދެ ވަނަ ހާފުގައި މުންޗެންގްލަޑްބެކް އިން ވަނީ ދެ ލަނޑު ޖަހައިފަ އެވެ. އެއީ ރަމީ ބެންސެބޭނީ އާއި ލާސް ސްޓިންޑްލް އެވެ. ބެންސެބޭނީ ލަނޑު ޖެހީ ޕެނަލްޓީއަކުންނެވެ. މެޗުގެ އިތުރު ވަގުތުގައި ޑޯޓްމަންޑުގެ ފަސް ވަނަ ލަނޑު ޖެހީ ޖިއޮވާނީ ރޭނާ އެވެ.

މޮޅާއެކު ބަޔާން އެއް ވަނައިގައި އޮތީ ޕޮއިންޓުގެ ލީޑަކުންނެވެ. ކުޅުނު 32 މެޗުން އެ ޓީމަށް 68 ޕޮއިންޓު ލިބޭއިރު، ހަމަ އެ އަދަދަށް މެޗު ކުޅެގެން ދެ ވަނައިގައި ޑޯޓްމަންޑު އޮތީ 67 ޕޮއިންޓާއެކު އެވެ.