ރަށެއްގައި ރޯގާއެއް ފެތުރިގެންދާނަމަ ޑޮކްޓަރުންގެ ލަފާގެ ދަށުން އެ ބޭނުންވާ ބޭސްތައް ފޯރުކޮށްދޭ: އެސްޓީއޯ މެޑިކަލް

ރަށެއްގައި ރޯގާއެއް ފެތުރިގެންދާނަމަ، ޑޮކްޓަރުންގެ ލަފާގެ ދަށުން އެ ބޭނުންވާ ބޭސްތައް ފޯރުކޮށްދެމުންދާ ކަމަށް އެސްޓީއޯ މެޑިކަލް ސަރވިސްއިން ބުނެފިއެވެ.

އެސްޓީއޯ މެޑިކަލް ސަރވިސްގެ ޖެނެރަލް މެނޭޖަރ، އަހުމަދު ނިއުޝާދު ވިދާޅުވީ ކޮންމެ ރަށަކީ މުހިންމު ރަށެއް ކަމަށާއި، އެރަށެއްގައި ރޯގާ ފެތުރޭ މިންވަރު ބަލައި، ބޭސް ފިހާރައަށް ބޭނުންވާ ބޭސްތައް ފޯރުކޮށްދެމުންދާ ކަމަށެވެ. އަދި ފާމަސިސްޓުން މެދުވެރިކޮށް، ރަށުގެ ޑޮކްޓަރުންނާ އަބަދުވެސް މަޝްވަރާކުރެވޭކަން ފާހަގަކުރައްވައި ނިއުޝާދު ވިދާޅުވީ، ރަށުގައި ރޯގާއެއް ފެތުރޭނަމަ ޑޮކްޓަރުގެ މަޝްވަރާގެ ދަށުން ބޭނުންވާ ބޭސްތައް ފޯރުކޮށްދޭ ކަމަށެވެ.

މީގެ އިތުރުން ނިއުޝާދު ވިދާޅުވީ ރާއްޖެއިން ނުލިބޭ ބޭސްތައް އެސްޓީއޯ މެދުވެރިކޮށް އާއްމު ރައްޔިތުންނަށް ފޯރުކޮށްދޭ ކަމަށެވެ. އެގޮތުން ބޭސް ސިޓީ ހިފައިގެން އެސްޓީއޯގެ ފިހާރައަށް އައުމުން ނުވަތަ ވެބްސައިޓަށް އަޕްލޯޑް ކުރުމުން އެ ބޭސް ރާއްޖެއަށް ގެނައުމުގެ މަސައްކަތްތައް ކުރާނެ ކަމަށް އޭނާ ވިދާޅުވިއެވެ. އަދި ވިދާޅުވީ އެފަދަ ބޭސްތައް ގެނައުމުގައި ގާތްގަނޑަކަށް މަސް ދުވަސް ނަގާ ކަމަށެވެ.

ބައެއް ރަށްރަށްގެ ފާމަސީތަކުން އެކަށީގެންވާވަރަށް ބޭސް ނުލިބޭ މައްސަލަ ދޭތެރެއަކުން ބޮޑުވެގެން ދެއެވެ. ނަމަވެސް މިފަދަ މައްސަލަ ފެންމަތިނުވާހެން އެސްޓީއޯއިން ހިންގަމުންދާ ފާމަސީތަކުގައި އިންތިޒާމްތައް ހަމަޖައްސާފައިވާ ކަމަށް އެކުންފުނިން ބުނެއެވެ.