ސެމީ ފައިނަލާއި ފައިނަލް މެޗު އިންޑޯ އަށް ބަދަލުކޮށްފި

މިހާރު ކުރިއަށްދާ އިންޓަރ އޮފީސް ވޮލީބޯޅަ މުބާރާތުގެ ސެމީ ފައިނަލް މެޗުތަކާއި، ފައިނަލް މެޗު ޒުވާނުންގެ މަރުކަޒުގެ އެތެރޭ ހޯލުގައި ކުޅެން ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) އިން ނިންމައިފި އެވެ.

މިހާތަނަށް މުބާރާތުގެ މެޗުތައް ކުޅެމުން އައި ހުޅުމާލޭ ވޮލީ ކޯޓުގަ އެވެ. ދެ ގްރޫޕަކަށް ބަހާލައިގެން ކުރިއަށް ގެންދާ މުބާރާތުގެ މެޗުތަކެއް މީގެ ކުރިން ވެސް ވަނީ ވިއްސާރައިގެ ސަބަބުން ފަސްކޮށްފަ އެވެ. ސެމީ ފައިނަލާ ހަމަ އަށް މުބާރާތް އައިސްފައިވާއިރު، ސެމީ ފައިނަލް މެޗު އެންމެ ފުރަތަމަ ތާވަލްކޮށްފައި އޮތީ ބުރާސްފަތި ދުވަހުގެ ހަވީރު އަދި ރޭގަނޑު ކުޅުމަށެވެ. ނަމަވެސް ވިއްސާރައިގެ ސަބަބުން ސެމީ ފައިނަލްގެ ދެ މެޗު ވަނީ ހުކުރު ދުވަހުގެ ހަވީރު އަދި ރޭގަނޑަށް ބަދަލުކޮށްފަ އެވެ. އެހެން ނަމަވެސް ވިއްސާރައިގެ ސަބަބުން ހުކުރު ދުވަހު ވެސް މެޗުތައް ކުރިއަށް ގެންދެވޭ ގޮތް ވަނީ ނުވެފަ އެވެ.

އެހެންކަމުން މުބާރާތް ހިންގާ ކޮމެޓީން ނިންމީ ސެމީ ފައިނަލްގެ ތިން މެޗާއި، ފައިނަލް މެޗު ޒުވާނުންގެ މަރުކަޒުގެ އެތެރޭ ހޯލަށް ބަދަލު ކުރުމަށެވެ. މުބާރާތް ކުރިއަށް ގެންދަނީ ތިން ސެމީ ކުޅޭ އުސޫލުންނެވެ. އެހެންކަމުން ދެ ވަނަ ސެމީ ފައިނަލް މެޗު އޮންނާނީ މެއި މަހުގެ 17 ވަނަ ދުވަހުގެ ހަވީރު އެވެ. އެ މެޗުގައި ބައްދަލު ކުރާނީ ޕޮލިސް އަދި ވޭސްޓް މެނޭޖްމަންޓް ކޯޕަރެޝާން (ވެމްކޯ) އެވެ. ސެމީ ފައިނަލްގެ ފުރަތަމަ މެޗު ކުޅުމަށް ހަމަޖެހިފައި ވަނީ އެ ދުވަހުގެ ރޭއެވެ. އެ މެޗުގައި ބައްދަލު ކުރާނީ އާބަންކޯ އާއި މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އެވެ. ތިން ވަނަ ސެމީ ކުޅުމަށް ހަމަޖެހިފައި ވަނީ މެއި މަހުގެ 18 ވަނަ ދުވަހުގެ ރޭއެވެ. އެ މެޗުގައި ބައްދަލު ކުރާނީ ސެމީ ފައިނަލްގެ ފުރަތަމަ މެޗުން ބަލިވާ ޓީމާއި، ދެ ވަނަ ސެމީ އިން މޮޅުވާ ޓީމެވެ. އެއަަށްފަހު މުބާރާތުގެ ފައިނަލް ކުޅުމަށް ހަމަޖެހިފައި ވަނީ މެއި މަހުގެ 20 ވަނަ ދުވަހުގެ ރޭ އެވެ.

އެކަމާ ގުޅިގެން ވީއޭއެމުން ބުނީ، މި ބަދަލު ގެންނަން ޖެހުނީ ވިއްސާރައިގެ ސަބަބުން ކަމަށެވެ. އެހެން ނަމަވެސް، މި ބަދަލާއެކު މުބާރާތުގެ ފޯރި ގަދަވެ، ޓީމުތަކުގެ ސަޕޯޓަރުންގެ ސަޕޯޓު އިތުރަށް ފެނިގެންދާނެ ކަމަށް އުންމީދު ކުރާ ކަމަށް ބުނެފައިވެއެވެ.