ދުނިޔެ މިހާރު މިދަނީ ވަރަށް ބޮޑެތި ބަދަލުތަކަކާ ކުރިމަތިލަމުންކަމަށާއި ރަޝިއާއިން މިހާރު ކުރަމުން މިދާ ހުރިހާ މަސައްކަތްތަކަކީ އެގައުމުގެ މުސްތަގުބަލުގެ ދިފާއުގައި ކުރަމުންދާ ވަތަނީ މަސައްކަތްތަކެއް ކަމަށް ރަޝިއާގެ ރައީސް ވްލެޑްމިއަރ ޕުޓިން ވިދާޅުވެއްޖެއެވެ.
ޕުޓިން މިހެން ވިދާޅުވެފައިވަނީ ދެވަނަ ބޮޑުހަނގުރާމާގައި ނާޒީ ޖަރުމަނުގެ ކައިރިން ރަޝިއާއިން ހޯދި ކާމިޔާބީ ފާހަގަކުރުމަށް، ކޮންމެ އަހަރެއްގެވެސް މެއި މަހުގެ ނުވަވަނަ ދުވަހު އެގައުމުން ފާހަގަކުރާ "ވިކްޓްރީ ޑޭ" ފާހަގަކުރުމަށް އަންގާރަ ދުވަހު ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
އެގޮތުން މޮސްކޯގެ ރެޑް ސްކޮޔަރގައި ޕުޓިން ވަނީ 10 މިނެޓްގެ ތަގުރީރެއް ދެއްވާފައެވެ.
މި ތަގުރީރުގައިވެސް ޕުޓިން އެންމެ ބޮޑަށް އަލިއަޅުއްވާލައްފައިވާ އެއް ކަމަކަށް ވެގެންގޮސްފައިވަނީ "ޚާއްސަ އަސްކަރީ އޮޕަރޭޝަނެއް"ގެ ނަމުގައި ރަޝިއާއިން ޔޫކްރެއިންގައި ކުރިއަށްގެންދާ ހަރަކާތަށެވެ. ޕުޓިންގެ އަމުރަށް ރަޝިއާގެ އަސްކަރިއްޔާއިން ޔޫކްރެއިނަށް އެރިފަހުން މިހާރު ވަނީ 15 މަސް ދުވަހާ ގާތްވެފައެވެ.
ޕުޓިން ވަނީ ހުޅަނގުން ރަޝިއާއާމެދު މީހުންގެ ހިތްތަކުގައި ނުރުހުން އުފެދޭފަދަގޮތަށް "ރަސޯފޯބިކް" ހަރަކާތްތައް ކުރަމުންދާކަމަށް ވިދާޅުވެފައެވެ. ޔޫކްރެއިންގެ ރައްޔިތުން ވަނީ "ދައުލަތުގެ ބަޣާވާތެއްގެ ރަހީނުން"މަށާއި އަދި ހުޅަނގުގެ އުންމީދުތަކަށް ވެފައި ކަމަށްވެސް ޕުޓިން ވަނީ ވިދާޅުވެފައެވެ.
މީގެ އިތުރުން، ޔޫކްރެއިނުން ރަޝިއާއަށް އަމާޒުކޮށްފާނެ، ބަދަލުހިފުމުގެ ވަރުގަދަ ހަމަލާއަކަށް ރަޝިއާގެ އަސްކަރިއްޔާއިން ތައްޔާރުވަމުންދާކަމަށްވެސް ޕުޓިން ވިދާޅުވިއެވެ.
