ސާފް ޗެމްޕިއަންޝިޕުގައި ވާދަކުރާނީ ލުބުނާން
ލުބުނާނުގެ އިތުރުން ކުވޭތު ވެސް ވާދަކުރާނެ
ލުބުނާނުގެ ގައުމީ ފުޓްބޯޅަ ޓީމް: ސާފް ޗެމްޕިއަންޝިޕުގައި ވާދަކުރާނެ
އަންނަމަހު އިންޑިޔާގައި ފަށާ ސާފް ޗެމްޕިއަންޝިޕް ފުޓްބޯޅަ މުބާރާތުގައި ވާދަކުރާނެ އެންމެ ފަހު ގައުމަކީ ލުބުނާން ކަމުގައިވެއްޖެ އެވެ.
ސާކް ގައުމުތަކުގެ ފުޓްބޯޅަ މުބާރާތުގައި މިފަހަރު އަށް ޓީމު ހަމަކުރަނީ ސަރަހައްދުން ބޭރުގެ ދެ ގައުމަކާއެކުގަ އެވެ. ސާފްގެ ދައުވަތު ގަބޫލުކޮށް މުބާރާތުގައ ވާދަކުރަން ނިންމާފައިވަނީ ލުބުނާން އާއި ކުވޭތެވެ. މިއީ 1995 ވަނަ އަހަރު ފެށި މުބާރާތުގައި ސަރަހައްދުން ބޭރުގެ ގައުމުތައް ބައިވެރިކުރާ ފުރަތަމަ ފަހަރެވެ.
މި ދެ ގައުމާއެކު މުބާރާތުގައި ވާދަކުރާނެ ސާކް ގައުމުތަކަކީ އެންމެ ފަހުގެ ޗެމްޕިއަން އިންޑިޔާ އާއި ދިވެހިރާއްޖެ އާއި ބަނގްލަދޭޝް އަދި ނޭޕާލާއި ބޫޓާނާއި ޕާކިސްތާނެވެ. ސާކް ގައުމުތަކުގެ ތެރެއިން މުބާރާތުގައި ވާދަނުކުރަނީ ސްރީލަންކާއެވެ. މިއީ އެ ގައުމު މި މުބާރާތުގައި ވާދަނުކުރާ ފުރަތަމަ ފަހަރެވެ. އެއީ ފީފާއިން އެ ގައުމު ސަސްޕެންޑްކޮށްފައިވާތީ އެވެ.
ޖޫން މަހުގެ 21 އިން ޖުލައި 3 އަށް ބެންގަލޫރުގައި ބާއްވާ މުބާރާތް ކުޅެން ސާފުން ނިންމާފައިވަނީ ދެ ގްރޫޕަކަށް ބަލާހައިގެންނެވެ. ސެމީ އަށްދާނީ ކޮންމެ ގްރޫޕަކުން އެންމެ ކުރި ހޯދާ ދެ ޓީމެވެ.
ސާފް ޗެމްޕިއަންޝިޕަށް އިންޑިޔާއިން ފޮނުވަން ނިންމާފައިވަނީ އެ ގައުމުގެ 23 އަހަރުން ދަށުގެ ޓީމެވެ. ސަބަބަކީ މިއަށްވުރެ ވަރުގަދަ މުބާރާތްތަކުގައި ސީނިއާ ޓީމު ބައިވެރިކުރުމަށް އިންޑިޔާއިން ނިންމާފައިވުމެވެ.
