ޖަރުމަނު ލީގުގައު ވާޑާ ބްރެމެންއާ ދެކޮޅަށް ކުޅުނު މެޗުން މޮޅުވެ އެންމެ ފަހުގެ ޗެމްޕިއަން ބަޔާން މިއުނިކުން އެއް ވަނައިގައި ހަތަރު ޕޮއިންޓުގެ ލީޑެއް ނަގައިފި އެވެ.

ބްރެމެންގެ ދަނޑުގައި ކުޅުނު މެޗު ބަޔާނުން ކާމިޔާބު ކުރީ 2-1 އިންނެވެ. މެޗުގައި ދެ ޓީމުގެ ލަނޑުތައް ވެސް ފެނުނީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން މެޗުގެ 62 ވަނަ މިނެޓުގައި ބަޔާނަށް ލީޑު ނަގައިދިނީ ސާޖް ގްނަބްރީ އެވެ. އެއީ ޒުވާން ކުޅުންތެރިޔާ ޖަމާލް މުސިއާލާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ 10 މިނެޓު ފަހުން ބަޔާނަށް ލީޑު ފުޅާކޮށްދިނީ ލެރޯއި ސާނޭ އެވެ. އެއީ ނޫސައިރު މަޒްރައުއީ ތަނަވަސްކޮށްދިން ފުރުސަތެއްގައި ތިރިތިރިން ބޯޅަ ގޯލަށް ވައްދާލައިގެންނެވެ. ބްރެމެންގެ ހަމައެކަނި ލަަނޑު 86 ވަނަ މިނެޓުގައި ޖެހީ ނިކްލަސް ޝްމިޑްޓް އެވެ.

މޮޅާއެކު ބަޔާން އެއް ވަނައިގައި އޮތީ ކުޅުނު 31 މެޗުން 65 ޕޮއިންޓާއެކު އެވެ. ބަޔާނަށްވުރެ އެއް މެޗު މަދުން ކުޅެގެން ދެ ވަަނައިގައި އޮތް ބޮރޫޝިއާ ޑޯޓްމަންޑަށް ލިބެނީ 61 ޕޮއިންޓެވެ. ނަމަވެސް މެޗުގެ އަދަދު ހަމަކޮށްގެން، ފަރަގު އެއް ޕޮއިންޓަށް ކުޑަ ކުރުމުގެ ފުރުސަތު ޑޯޓްމަންޑަށް އޮންނާނެ އެވެ.