ކ.ގުރައިދޫގައި ކުރިއަށްދާ ރައްޒާގުބެ މެމޯރިއަލް ކަޕްގައި އެންމެ ފަހުގެ ޗެމްޕިއަން އެކްސިޓޯ އާއި އޯލް އެޓޭކް ބައްދަލު ކުރި މެޗު އެއްވަރުވެގެން ނިމިއްޖެ އެވެ.

މިއީ މުބާރާތުގައި އެކްސިޓޯގެ ދެ ވަނަ މެޗެވެ. ފުރަތަމަ މެޗުގައި އެ ޓީމު ވަނީ ޓިމެލޯގެ މައްޗަށް ކުރި ހޯދައިފަ އެވެ. އަނެއްކޮޅުން މިއީ އޯލް އެޓޭކުގެ ފުރަތަމަ މެޗެވެ. ހުކުރު ދުވަހުގެ ހަވީރު ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުގައި ދެ ޓީމުން ވެސް ލަނޑު ޖެހީ ލިބުނު ޕެނަލްޓީންނެވެ. އެކްސިޓޯގެ ލަނޑު ޖަހައިދިނީ އާލިމް ޢަބްދުލް ޤައްޔޫމް އެވެ. އޯލް އެޓޭކުގެ ލަނޑު ޖެހީ އަނީސް އަލީ އެވެ. މެޗުގެ މޮޅު ކުޅުންތެރިޔަކީ އެކްސިޓޯގެ އާލިމް އެވެ.

މުބާރާތުގައި ބުރާސްފަތި ދުވަހު ކަަންމަތީ އެފްސީ އިން ވަނީ 5-1 އިން ސިކްސް އެކްސް ބަލިކޮށްފަ އެވެ. ކަންމަތި އެފްސީގެ ލަނޑުތައް ޖެހީ އަހްސަން ރަޝާދު، އަޙުމަދު ރިފްޝާން، މުޙައްމަދު ފަވާޒް އަދި ޙުސެއިން ފަޔާޒު އެވެ. މީގެ ތެރެއިން ރިފްޝާން ވަނީ ދެ ލަނޑު ޖަހައިފަ އެވެ. ސިކްސް އެކްސްގެ ހަމައެކަނި ލަނޑު ޖެހީ ލުގުމާން ޢަބްދުﷲ އެވެ. މެޗުގެ މޮޅު ކުޅުންތެރިޔަކީ ކަންމަތި އެފްސީގެ ރިފްޝާން އެވެ.

މުބާރާތުގައި ހޮނިހިރު ދުވަހު ބައްދަލު ކުރާނީ ޗެލެންޖާސް އާއި ވެޓަރަންސް އެންޑް ރިވޮލިއުޝަން އެފްސީ (ވީއޭއާރު) އެވެ.