މެސީގެ ސަސްޕެންޝަންގެ ވާހަކަދައްކަން ކޯޗު ގަލްޓިއޭ ބޭނުމެއް ނުވި

ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ އަށް ކުލަބުން ދީފައިވާ ސަސްޕެންޝަންގެ ވާހަކަ ދެއްކުމަށް އެ ޓީމުގެ ކޯޗު ކްރިސްޓޮފާ ގަލްޓިއޭ ދެކޮޅު ހަދައިފި އެވެ.

ޕީއެސްޖީގެ ހުއްދަ ނެތި މެސީ ސައުދީ އަރަބިއްޔާ އަށް ދަތުރު ކުރުމުން އެ ކުލަބުން ވަނީ އޭނާ ދެ ހަފްތާގެ މުއްދަތަކަށް ސަސްޕެންޑުކޮށްފަ އެވެ. އެ މުއްދަތުގައި ޕީއެސްޖީން މުސާރައެއް ވެސް ނުދޭނެ އެވެ. އެކަމާ ގުޅިގެން މެސީ އާއި ޕީއެސްޖީއާ ދެމެދު ވަނީ މަައްސަލަ ބޮޑުވެފަ އެެވެ.

ފްރާންސް ލީގުގައި ޓްރޮޔީސްއާ ދެކޮޅަށް ކުޅޭ މެެޗުގެ ކުރިން އޮތް ޕްރެސް ކޮންފަރެންސްގައި ނޫސްވެރިން ވަނީ ގަލްޓިއޭ އަށް އެ ސުވާލު ބަރިޔަކަށް "އޮއްސާލައިފަ" އެވެ. އެ ސުވާލުތަކަށް ޖަވާބު ދެމުން ގަލްޓިއޭ ބުނީ، މިދިޔަ ހަފްތާގެ ތެރޭގައި މެސީ އަށް ސަސްޕެންޝަނެއް ދިނުމަށް ނިންމާފައިވާ ކަމަށް ކުލަބުން އޭނާ އަށް އަންގާފައިވާ ކަމަށެވެ. ނަމަވެސް އެކަމުގެ އޭނާއާ އިތުރު މަޝްވަރާއެއް ނުކުރާ ކަމަށް ވެސް ގަލްޓިއޭ ވަނީ ބުނެފަ އެވެ. އިތުރަށް އޭނާ ބުނީ، މިހާރު އޭނާ ނިންމާފައި ވާނީ އެ ހާދިސާއާ ގުޅުވައިގެން އިތުރު އެހެން އެއްވެސް ކޮމެންޓެއް ނުކުރުމަށެވެ.

ދެ ހަފްތާގެ ސަސްޕެންޝަނަށް ފަހު މެސީ އަލުން ޕީއެސްޖީގެ ސްކޮޑާ ގުޅޭނެ ކަމަށް ބެލެވޭއިރު، ބާކީ އެ ޓީމަށް ސީޒަނުގައި އޮންނާނީ ތިން މެޗެވެ. އެކަމާ ގުޅިގެން ގަލްޓިއޭ ބުނީ، އެކަން ކުރިއަށް ދާނެ ގޮތެއް ބަލަން ޖެހޭނީ މެސީ ސަސްޕެންޝަނުން އެނބުރި އައުމުން ކަމަށެވެ. އޭނާ ބުނީ ކޮންމެ ގޮތެއްވީ ނަމަވެސް އެކަމުގައި މުޅި ކުލަބާއެކު މަޝްވަރާ ކުރަން ޖެހޭނެ ކަމަށާއި، އަނެއްކޮޅުން މެސީ އަކީ މިވަގުތަށް ބަލާއިރު އެންމެ މުހިންމު އެއް ފަރާތް ކަމަށެވެ. ގަލްޓިއޭ އެހެން ބުނުމާއެކު ނޫސްވެރިޔަކު ވަނީ އެކަމުގައި އޭނާ އިޚްތިޔާރު ކުރަނީ މެސީގެ ކޮޅުތޯ ސުވާލުކޮށްފަ އެވެ. ނަމަވެސް ގަލްޓިއޭ ބުނީ އިތުރަށް ބުނާނެ އެހެން އެއްޗެއް ނެތް ކަމަށެވެ.

މެސީ ޕީއެސްޖީ އަށް ބަދަލުވީ ދެ އަހަރު ދުވަހަށެވެ. އެ ކުލަބާއެކު އޭނާ ހަދާފައިވާ އެއްބަސްވުމުގެ މުއްދަތު ހަމަވާނީ މިއަހަރުގެ ޖޫން މަހު އެވެ. ނަމަވެސް މިހާތަނަށް އެއްބަސްވުން އައު ކުރުމަށް މެސީ ނިންމާފައެއް ނުވެ އެވެ. އޭގެ ބަދަލުގައި މީގެ އެއް މަސް ދުވަސް ކުރިން އޭނާ ނިންމާފައި ވަނީ އެ ކުލަބު ދޫކޮށްލުމަށް މީޑިއާތަކުގައި ވަނީ ބުނެފަ އެވެ. ނަމަވެސް ޕީއެސްޖީ ދޫކޮށްލުމަށް ފަހު މެސީ ބަދަލުވާނެ ކުލަބެއް ހާމަކޮށްފައެއް ނުވެ އެވެ.

މެސީ އޭނާގެ ކުރީގެ ކުލަބު ބާސެލޯނާ އަށް ދާން ބޭނުންވާ ކަމަށާއި، ބާސެލޯނާ އިން އަންނަނީ މެސީ ހޯދުމުގެ މަސައްކަތް ވަރުގަދަޔަށް ކުރަމުން ކަމަށް ވެސް ރިޕޯޓުތައް ބުނެ އެވެ.