ޑްރަގް ހުރި ޕެކޭޖާ ޙަވާލުވާން ދިޔަ މީހާއާއި އޭނާ އެތަނަށް ފޮނުވި މީހުންނަށްވެސް ކުށް ސާބިތެއް ނުވި
3 މެއި 2023 | ބުދަ 09:40އެމީހުންގެ މައްޗަށް އުފުލީ ޖަދުވަލު 1 ގައިވާ މަސްތުވާއެއްޗެއް ދިވެހިރާއްޖެއަށް އެތެރެކުރުމުގެ ކުށުގެ ދައުވާ
ކްރިމިނަލް ކޯޓް
މަސްތުވަތަކެތީގެ މައްސަލައެއްގައި ދައުވާ އުފުލާފައިވާ 3 މީހެއްގެ މައްޗަށް ކުށް ސާބިތުނުވާކަމަށް ކްރިމިނަލް ކޯޓުން ޙުކުމްކޮށްފިއެވެ.
މިއީ ކުރިއަރ މެދުވެރިކޮށް ރާއްޖެއަށް މަސްތުވާތަކެތި އެތެރެކުރި މައްސަލައެކެވެ. އެގޮތުން ކުރިއަރ މެދުވެރިކޮށް ގެނައި ޕެކޭޖެއްގައި މަސްތުވާތަކެތި ހުރިކަން އެނގުމުން، އެތަކެއްޗާ ޙަވާލުވާ ބަޔަކު ހޯދުމަށް ފުލުހުން ވަނީ ކޮންޓްރޯލްޑް ޑެލިވަރީ އޮޕަރޭޝަނެއް ހިންގާފައެވެ.
މި އޮޕަރޭޝަންގެ ތެރެއިން 3 މީހެއްގެ މައްސަލަ ތަހުގީގުކޮށްފައިވާއިރު، އެމީހުންގެ މައްޗަށް ދައުލަތުން ވަނީ ޖަދުވަލު 1 ގައިވާ މަސްތުވާއެއްޗެއް ދިވެހިރާއްޖެއަށް އެތެރެކުރުމުގެ ކުށުގެ ދައުވާ އުފުލާފައެވެ.
ދައުވާ ލިބޭ އެކަކު ބުނާ ގޮތުގައި އޭނާ ގާތުގައި އެ ޕެކޭޖް ނަގައިދިނުމަށް އެދުނީ އޭނަ ދަންނަ ބިދޭސީއެކެވެ.
އޭނާ މާލެ ދާން އުޅޭކަން އެނގުމުން އެ ބިދޭސީ މީހާ ވަނީ ޕޯސްޓް އޮފީސް މެދުވެރިކޮށް އަންނަ ޕާރުސަލެއް ނަގައިދިނުމަށް އޭނަގެ ކިބައިން އެދިފައެވެ. ބިދޭސީ މީހާ ބުނި ގޮތުގައި އޭގައި ހުންނާނީ ކުޅޭ އެއްޗެއްސެވެ.
ދައުވާ ލިބޭ ދެވަނަ މީހާއަކީ ފުރަތަމަ މީހާގެ އެދުމަށް، އެ ޕެކޭޖާ ޙަވާލުވާން ދާން އުޅުނު މީހާއެވެ. ނަމަވެސް އޭނާއަށް ދެވެން ނެތުމުން، އޭނާ ފޮނުވީ އޭނާއާއެކު ކެޑޭޓުގައި މަސައްކަތް ކުރާ ޖޫނިއަރ ފަރާތެކެވެ. އެއީ ދައުވާލިބޭ 3 ވަނަ މީހާއެވެ.
ޝަރީއަތުން ބުނެފައިވަނީ، ދައުވާގައި ބަޔާންކުރާ މަސްތުވާތަކެތި އެތެރެކުރުމުގެ އަމަލީ މަސައްކަތް ކޮށްފައިވަނީ ކާކުކަން ތަހުގީގުގެ އަލީގައި ހޯދިފައިނުވާ ކަމަށެވެ.
އެމީހުންގެ މައްޗަށް ކުރެވޭ ތުހުމަތަށް ބާރު ލިބިދޭ އިތުރު ހެކި ދައުލަަތަށް ހުށައެޅިފައިނުވާކަމަށްވެސް ޝަރީއަތުން ފާހަގަކޮށްފައިވެއެވެ.
ވުމާއެކު، ދައުވާލިބޭ ފަރާތްތަކުގެ މައްޗަށް ކޮށްފައިވާ ދައުވާގެ މާއްދީ ރުކުން ޝަރީއަތަށް ސާބިތުނުވާކަމަށް ވަނީ ނިންމަވާފައެވެ.
އަދި މި މައްސަލައިގައި އުފުލާފައިވާ ދައުވާ އެކަށީގެންވާ ޝައްކެއް ނެތް މިންވަރަށް ޝަރީއަތަށް ސާބިތުނުވާކަމަށް ޙުކުމް ކުރައްވާފައިވެއެވެ.
