ޙައްޖަށް މީހުން ގެންދިއުމަށް ހުއްދަދީފައިވާ ބައެއް ކުންފުނިތަކުން އިތުރަށް ފައިސާ ނަގަމުންދާކަމުގެ ޝަކުވާތަކެއް

1444 ވަނަ އަހަރު ޙައްޖަށް މީހުން ގެންދިއުމަށް ހުއްދަދީފައިވާ ބައެއް ކުންފުނިތަކުން ދިވެހިރާއްޖެއިން މީހުން ޙައްޖަށް ގެންދިއުމާގުޅޭ އުސޫލާ ޚިލާފަށް ކަނޑައަޅާފައިވާ އަގަށްވުރެ އިތުރަށް ފައިސާ ނަގަމުންދާކަމުގެ ޝަކުވާތައް ލިބެމުންދާކަމަށް އިސްލާމިކް މިނިސްޓްރީން ބުނެފިއެވެ.

މިދިޔަ އޭޕްރީލް މަހު މިނިސްޓްރީން ވަނީ މި އަހަރު ރާއްޖެ އިން ޙައްޖަށް މީހުން ގެންދިއުމުގެ ހުއްދަ ތިން ކުންފުންޏަކަށް ދީފައެވެ. އެއީ އަލްހަރަމައިން ހައްޖު އެންޑް އުމްރާ ކޮމްޕެނީ މޯލްޑިވްސް ޕްރައިވެޓް ލިމިޓެޑް، ސިސިލްފަރު ހައްޖު އެންޑް އުމްރާ ޕްރައިވެޓް ލިމިޓެޑް އަދި އަލްމަނާސިކް ޕްރައިވެޓް ލިމިޓެޑްއެވެ.

Advertisement

މި ތިން ކުންފުންޏަށްވެސް ދީފައިވަނީ 90 ކޯޓާކަމަށް އިސްލާމިކް މިނިސްޓްރީން ބުނެފައިވެއެވެ. އެހެންނަމަވެސް އަގުތައް ތަފާތެވެ.

ބުދަ ދުވަހު މިނިސްޓްރީން ބުނީ، 1444 ވަނަ އަހަރު ޙައްޖަށް މީހުން ގެންދިއުމަށް ހުއްދަދީފައިވާ ބައެއް ކުންފުނިތަކުން ދިވެހިރާއްޖެއިން މީހުން ޙައްޖަށް ގެންދިއުމާގުޅޭ އުސޫލާ ޚިލާފަށް ކަނޑައަޅާފައިވާ އަގަށްވުރެ އިތުރަށް ފައިސާ ނަގަމުންދާކަމުގެ ޝަކުވާތައް ލިބެމުންދާކަމަށެވެ.

އަދި އެކަމާ ގުޅިގެން ބަލަންޖެހޭ ކަންކަން ބަލަމުންދާ ކަމަށާއި، މިކަން ބެލުމަށްފަހު އުސޫލާ ޚިލާފަށް ޢަމަލުކުރާ ފަރާތްތަކާމެދު ފިޔަވަޅު އަޅާނެކަމަށްވެސް މިނިސްޓްރީން ވަނީ ބުނެފައެވެ.

އަލްހަރަމައިން ހައްޖު އެންޑް އުމްރާ ކޮމްޕެނީ މޯލްޑިވްސް ޕްރައިވެޓް ލިމިޓެޑުން މީހުން ގެންދިއުމަށް ކަނޑައަޅާފައިވާ އަގަކީ 75،250 (ހަތްދިހަފަސްހާސް ދުއިސައްތަ ފަންސާސް) ރުފިޔާއެވެ. ސިސިލްފަރު ހައްޖު އެންޑް އުމްރާ ޕްރައިވެޓް ލިމިޓެޑުން މީހުން ގެންދިއުމަށް ކަނޑައަޅާފައިވާ އަގަކީ 75،465 (ހަތްދިހަފަސްހާސް ހަތަރުސަތޭކަ ފަސްދޮޅަސް ފަހެއް) ރުފިޔާއެވެ. އަދި އަލްމަނާސިކް ޕްރައިވެޓް ލިމިޓެޑުން މީހުން ގެންދިއުމަށް ކަނޑައަޅާފައިވާ އަގަކީ 75،000 (ހަތްދިހަފަސްހާސް) ރުފިޔާއެވެ.