ޤައުމީ ދާރުލްއާސާރު ތަރައްގީ ކުރުމަށް ބަޔަކާ ހަވާލުކޮށްފި
3 މެއި 2023 | ބުދަ 07:49މިއީ ބީއެމްއެލް އިން ދޭ ދެ މިލިއަން ރުފިޔާގެ އެހީގެ ދަށުން ހިންގާ މަޝްރޫއެއް
ޤައުމީ ދާރުލްއާސާރު ތަރައްގީ ކުރުމުގެ އެއްބަސްވުމުގައި ސޮއިކުރުން
ޤައުމީ ދާރުލްއާސާރު ތަރައްގީ ކުރުމުގެ ގޮތުން ކުރަން ހުރި އަމަލީ މަސައްކަތްތައް ކުރުމަށް ސަގާފީ ތަރިކަ ރައްކާތެރިކުރާ ޤައުމީ މަރުކަޒުން ބަޔަކާ ހަވާލުކޮށްފިއެވެ.
އެ މަރުކަޒުން މި މަސައްކަތް ހަވާލުކޮށްފައިވަނީ ޑައިނޯ ކޮންސްޓްރަކްޝަން ޕްރައިވެޓް ލިމިޓެޑާއެވެ. އެގޮތުން، ބުދަ ދުވަހު ވަނީ މި އެއްބަސްވުމުގައި ސޮއި ކޮށްފައެވެ. ސަގާފީ ތަރިކަ ރައްކާތެރިކުރާ ޤައުމީ މަރުކަޒުގެ ފަރާތުން މި އެއްބަސްވުމުގައި ސޮއި ކުރެއްވީ ޑެޕިއުޓީ މިނިސަޓަރު އަހުމަދުﷲ ޖަމީލެވެ. އަދި ޑައިނޯގެ ފަރާތުން ސޮއި ކުރެއްވީ އެ ކުންފުނީގެ މެނޭޖިންގ ޑިރެކްޓަރު މުޙައްމަދު އަލީއެވެ.
ޤައުމީ ދާރުލްއަސާރު ތަރައްގީ ކުރުމަށް ހަމަޖެހިފައިވަނީ ބީއެމްއެލްގެ އިޖުތިމާއީ އާއްމު ޒިންމާގެ ދަށުން ދީފައިވާ ދެ މިލިއަން ރުފިޔާގެ އެހީގެ ދަށުންނެވެ. އެގޮތުން މި މަސައްކަތަށް 2،183،220 (ދެ މިލިއަން އެއްލައްކަ އައްޑިހަ ތިންހާސް ދުއިސައްތަ ވިހި ރުފިޔާ) ހޭދަވާއިރު ބީއެމްއެލުން ދޭ ދެ މިލިއަން ރުފިޔާގެ އިތުރަށް ހޭދަވާ ފައިސާ ޚަރަދުކުރަން ހަމަޖެހިފައިވަނީ ހެރިޓޭޖް ޓްރަސްޓް ފަންޑުން ކަމަށް ސަގާފީ ތަރިކަ ރައްކާތެރިކުރާ ޤައުމީ މަރުކަޒުން ބުންޏެވެ.
ޑައިނޯއާއެކު ވެފައިވާ އެއްބަސްވުމުގެ ދަށުން ޤައުމީ ދާރުލްއާސާރުގެ ޝޯކޭސްތައް ތައްޔާރުކުރުމާއި މަލްޓިމީޑިއާ ރޫމް ތައްޔާރު ކުރުމާއި މިއުޒިއަމް ޑިސްޕްލޭ އޭރިއާތަކުގައި ފްލޯ ރަނާ އެޅުމާއި ފާރުގައި ކުލަލުމުގެ މަސައްކަތް ކުރާނެއެވެ. މި މަޝްރޫއުގެ ދަށުން ތައްޔާރު ކުރާ 19 ޝޯކޭސްއަކީ ޒަމާނީ ފެންވަރުގެ، ބައިނަލްއަގުވާމީ އެކި މިއުޒިއަމްތަކުގައި ވެސް ހުންނަފަދަ ޝޯކޭސްތައް ކަމަށް ސަގާފީ ތަރިކަ ރައްކާތެރިކުރާ ޤައުމީ މަރުކަޒުން ބުންޏެވެ.
މީގެ އިތުރުން ދާރުލްއާސާރުގައި އަލަށް ގާއިމުކުރުމާއި މަލްޓިމީޑިއާ ރޫމަކީ ތަނަށް ޒިޔާރަތް ކުރާ ފަރާތްތަކަށް ދިވެހީންގެ ތާރީހާ ގުޅޭ ވީޑިއޯ ޕްރެޒެންޓޭޝަން ދިނުމަށާއި ދަރިވަރުންނަށް މައުލޫމާތު ސެޝަންތައް ހިންގުމަށް ގާއިމުކުރާ ތަނެއް ކަމަށް ވެސް އެ މަރުކަޒުން ބުންޏެވެ.
