ސިކްސް އެކްސް ބަލިކޮށް ޗެލެންޖާސް އަށް ރަނގަޅު ފެށުމެއް

ކ.ގުރައިދޫގަައި ބާއްވާ އެންމެ ބޮޑު ފުޓުބޯޅަ މުބާރާތް ކަމުގައިވާ ރައްޒާގުބެ މޯރިއަލް ކަޕްގައި ޗެލެންޖާސް އިން ކުޅުނު ފުރަތަމަ މެޗު ކާމިޔާބުކޮށްފި އެވެ.

ގްރޫޕް އޭ ގައި އަންގާރަ ދުވަހުގެ ހަވީރު ކުޅުނު މެޗުގައި ޗެލެންޖާސް އިން ވަނީ 4-0 އިން ސިކްސް އެކްސް ބަލިކޮށްފަ އެވެ. މެޗުގައި ޗެލެންޖާސްގެ ލަނޑުތައް ޖެހީ ޢަބްދުﷲ ރާފިއު، ސާމިއު އިބްރާހީމް، އަޙުމަދު ނައުޝާދު އަދި އަޙުމަދު ޝަމާލް އެވެ. މެޗުގެ މޮޅު ކުޅުންތެރިޔަކަށް ހޮވުނީ ޗެލެންޖާސްގެ ޝަމާލް އެވެ. މުބާރާތުގައި ހޯމަ ދުވަހު ކަންމަތި އެފްސީ އާއި ވެޓަރަންސް އެންޑް ރިވޮލިއުޝަން އެފްސީ (ވީއޭއާރު) ބައްދަލު ކުރި މެޗު 2-1 އިން ކާމިޔާބު ކުރީ ކަންމަތި އެފްސީ އެވެ. މި ދެ ޓީމަކީ ވެސް ގްރޫޕް އޭ ގައި ހިމެނޭ ދެ ޓީމެވެ.

ގްރޫޕް އޭގެ ކޮންމެ ޓީމަކުން ވެސް އެއް މެޗު ކުޅެފައިވާއިރު، ޗެލެންޖާސް އާއި ކަންމަތި އެފްސީ އަށް ލިބެނީ ތިން ޕޮއިންޓެވެ. ނަމަވެސް ފައިދާ ލަނޑު ކުރި ހޯދައިގެން އެއް ވަނައިގައި މިވަގުތު އޮތީ ޗެލެންޖާސް އެވެ.

މުބާރާތުގައި ބުދަ ދުވަހު ހަވީރު ކުޅޭނީ ގްރޫޕް ބީގައި ހިމެނޭ އެކްސިޓޯ އާއި ޓިމެލޯ އެވެ. މި މުބާރާތަކީ އެރަށުގެ ފުޓުބޯޅަ ޗެލެޖެންޑު އަލްމަރުހޫމް އަބްދުއް ރައްޒާގު މޫސާގެ ހަނދާނުގައި 2015 ވަނަ އަހަރުން ފެށިގެން ބާއްވަމުން އަންނަ މުބާރާތެކެވެ. އެންމެ ފުރަތަމަ މި މުބާރާތް ބާއްވާފައިވަނީ "ތުއްތޮންބެ ކަޕް"ގެ ނަމުގައެވެ. އޭގެ ފަހުން 2019 ވަނަ އަހަރު މުބާރާތުގެ ނަން ވަނީ ރައްޒާގުބެ މެމޯރިއަލް ކަޕަށް ބަދަލުކޮށްފައެވެ.